2050 جىل ەكەن، انا ءتىلىم ءتىرى ءجۇر ەكەن، ءبىر كۇنى ءبىر بۇتاققا ىلىنگەن كۇيى تۇر ەكەن... كەنەت قازاق ءتىلى سالبىراااپ تۇردى دا، اۋىر كۇرسىنىپ، جەرگە قۇلاپ ءتۇستى، قازاق ءتىلىم، انا ءتىلىم قىپ-قىزىل بولىپ، سۇلاپ ءتۇستى... دەرەۋ «جەدەل جاردەم» كەلىپ الىپ كەتتى،  «نوسيلكانى ۇستا!» دەگەن شالا قازاق دارىگەرلەر كەنەپ كوتەرگىشىمەن الىپ كەتتى...

ءتىل رەانيماتسيادا جاتتى، سول كۇنى كۇن كۇرسىنىپ، كۇڭگىرتتەنىپ باتتى.  حالىق اسسامبلەياسىنىڭ  مەكەن–جايىنا جينالعان ورىس ءتىلى مەن وزبەك ءتىلى تىلدەر الدىنا شىعىپ: « و، دوستاس تىلدەر! قازاق تىلىنە شابۋىل توقتار ەمەس، ول ولەيىن دەپ جاتىر، سوندا دا جوقتار ەمەس! اۋرۋحانادا ءحال ۇستىندە جاتقان قازاق ءتىلى باۋىرىمىزعا بارىپ، كوڭىل ايتىپ شىعايىق! كوڭىلىن كوتەرەيىك!» – دەدى. ونى قىرعىز، ءازىربايجان، ۋكراين جانە باسقا دا ەتنوس  تىلدەرى قوشتاي كەتتى.

– بۇل كىمنىڭ ءتىلى؟ – دەپ سۇرادى ءبىر كەزدە باۋىرمال شەشەن ءتىلى.

– قازاق ءتىلى دەيمىن، سونىڭ كۇيىن ويلاپ، ۋايىم جەيمىن...

– جوعا، ءتىلدىڭ  يەسى كىم دەيمىن؟

– ءبىر ءمينيستردىڭ...

– ويباي–اۋ، سوندا قالاي؟

– ءبىلىم ءمينيسترى ۇلتتىق بىرىڭعاي تەستىلەۋگە دايىندىق سۇراقتارىنان انا ءتىلىن الىپ تاستاپتى. سودان ونىڭ ءتىلى وكپەلەپ، قاشىپ كەتكەن دەيدى.  ونىڭ ورنىنا ايان دەگەن ورىسشا سويلەيتىن ايەلدىڭ ءتىلى مەن «جالاڭاش كەلىنشەك» دەگەن ۇياتسىز فيلم تۇسىرگەن بەرمەك دەگەن بالانىڭ،  باس سۇقپايتىن جەرى جوق قۇرتاس دەگەن ىنىشەكتىىڭ تىلدەرى ءجۇر دەيدى... ەندى بولاشاق ستۋدەنتتەر «كوڭىلدى» جۇرەدى ەكەن! «تەست شوۋ» دەپ اتالاتىن كورىنەدى...

شىنىندا، 2050 جىل ەكەن، انا ءتىلىم ءالى ءتىرى ءجۇر ەكەن... ءبىلىم ءمينيسترى بۇيرەكتەن سيراقوۆ  تاڭەرتەڭ تۇرسا، اۋزىندا ءتىلى جوق. ء«بىر جاپاراق قاعازعا: «مەن سىزگە قاتتى وكپەلەدىم. كەشىر، ەندى ساعان ورالمايمىن!» دەپ جازىپ كەتىپتى. ءتىلى جوق، مينيستر قالاي سويلەي السىن؟ شارق ۇرىپ، تىلىنە ىزدەۋ جاريالادى. ونىڭ ۇستىنە پرەزيدەنت شاقىرىپ جاتىر ەكەن، ءولااا، ەندى قالاي سويلەمەك؟ اۋزىن باسىپ وتىرا بەرمەك پە؟   ال، رەانيماتسياداعى  تىلىنگەن ءتىلىم جىلاپ جاتتى، وزگە دوستاس تىلدەر «قازاق ءتىلى باۋىرىم، الدىڭ اشىق بولسىن!» دەپ ونىڭ جاعادايىن سۇراپ جاتتى...

مۇحتار شەرىم

Abai.kz