ناۋرىز ايىنىڭ 5-ءى ۇلت كوسەمى ءاليحان بوكەيحانوۆتىڭ تۋعان كۇنى.

بۇل كۇنى، بۇدان ءجۇز جىل بۇرىن، الەكەڭ باتىس مايداندا، سوعىستىڭ قارا جۇمىسىنداعى جىگىتتەر اراسىندا جۇرگەن ەدى.

سول جاقتا ول اقپان رەۆوليۋتسياسىنىڭ باستى ناتيجەسىن – يمپەراتوردىڭ تاقتان تۇسكەنىن ەستىدى.

سول جاقتا قازاقتىڭ دا باسىنا ءوز شاڭىراعىن كوتەرۋىن مۇمكىن ەتەتىن جاڭا مەملەكەتتىك قۇرىلىم جاسايتىن قۇرىلتايشى جينالىس شاقىرۋعا ناقتى جاعداي تۋعانىن پارىقتادى. سەرىكتەرىمەن بىرگە الدا تۇرعان مىندەتتەردى تالقىلاپ، ازاتتىق تاڭى اتقانىن، بوستاندىق كۇنى شىققانىن، ەل ىشىندەگى لايىقتى ازاماتتاردى تاڭداپ، ەلدىك كۇرەسكە قوسۋ قاجەتتىگىن ايتىپ، قازاق حالقىنا جار سالدى.

قازاق ۇلت-ازاتتىق قوزعالىسىنىڭ باس قاھارمانى سوققان دابىلدى ونىڭ سەنىمدى ۇزەڭگىلەسى احاڭ – احمەت بايتۇرسىنوۆ باسقاراتىن «قازاق» گازەتى شارتاراپقا تاراتتى.

سودان باستاپ ازاتتىق جولىنداعى كۇرەس جاڭا مازمۇنمەن تولىقتى. ءسويتىپ،  توعىز ايدان كەيىن قازاق اۆتونومياسى مەن ونىڭ ۇكىمەتىن – «الاش-وردا» حالىق كەڭەسىن ومىرگە اكەلدى. ءتورت عاسىر تاۋەلسىز عۇمىر كەشكەن، ودان ۇزاق جىلدار بويى وتارلىق قامىت تۇرالاتقان قازاق مەملەكەتتىگى تۇڭعىش رەت الاش-وردا بولىپ قايتا جاڭعىردى.

ءبىز بۇگىن سول ۇلى وقيعانىڭ ءجۇز جىلدىعى قارساڭىندا باس قوسۋدامىز. 

وسى تۇرعىدان قاراعاندا، الاش ارىستارىنا احاڭنىڭ مۇراجايىندا بەرىلمەك بۇگىنگى استىڭ ەرەكشە سيمۆولدىق ءمانى بار. وتانشىل جاس ۇرپاق ۇيىمداستىرىپ وتىرعان قازىرگى اس الاش-وردانىڭ الدا كەلە جاتقان ءبىر عاسىرلىق مەرەيلى بەلەسىنە قالىڭ جۇرتشىلىق نازارىن اۋدارۋعا ءتيىس. اۋدارىپ قانا قويماي، توعىز ايدان كەيىن مەرەكەلەنبەك وسى ۇلى وقيعانى لايىقتى اتاپ ءوتۋ ءۇشىن جان-جاقتى دايارلىق جۇمىستارىنا كۇللى تاۋەلسىزدىك كۇرەسكەرلەرىن جۇمىلدىرۋعا ءتيىس.

ءبىزدىڭ ويىمىزشا، ۇلتىمىزدىڭ ار-وجدانى اتانعان احاڭ مەكەن ەتكەن مىنا عيماراتتىڭ جانىنان ونىڭ بارشا ۇزەڭگىلەستەرىنىڭ ءومىرى مەن قىزمەتىن، الەكەڭ باسقارعان الاش-وردانىڭ تاريحىن كورنەكى تۇردە ناسيحاتتايتىن مۋزەي سالىنعانى ءجون بولار ەدى.

قوعامدىق كۇشتەر بىرىكسە، جانە، ارينە، قالا ۇكىمەتى ءتيىستى قولداۋ كورسەتسە، وسى جازدا الاش-وردا مۇراجايىن سالىپ الۋعا تولىق مۇمكىندىك بار.

قازىر ءبارىمىز اسقا جينالىپ وتىرعان وسى الاڭدا، احاڭنىڭ مىنا مۋزەي-ۇيىنە ۇيلەستىرە، تۋرا جانىنان الاش-وردا مۋزەيى بوي كوتەرسە – ول، ءسوز جوق، ءجۇز جىلدىقتىڭ قۇرمەتىنە تۇرعىزىلعان تاماشا كەشەندى ەسكەرتكىش بولادى.

الاش-وردا مۋزەيى رۋحتى كوتەرىپ، ەلىمىزدىڭ بىرلىگى مەن قۋاتىنىڭ ارتا تۇسۋىنە قىزمەت ەتەتىن اعارتۋشىلىق، تاريحي-تانىمدىق ءمان-ماعىناسى زور ەلەۋلى عىلىمي مەكەمەگە اينالادى.  

حالقىمىزدى بۇدان ءبىر عاسىر ىلگەرىدە ءامىرشىل جۇيە قىسپاعىنان بوساتىپ، ەل بولۋ جولىنا باستاعان ازاتتىق كۇرەسكەرلەرىنىڭ رۋحى بارشا قازاقستاندىققا دارۋىن تىلەيىك. بۇگىنگى استا ەسكە الىناتىن ارۋاقتار تاۋەلسىزدىك تۋىن العا اپارۋشىلاردى ءاردايىم قورعاپ، قولداپ، جەبەپ ءجۇرسىن!

بەيبىت ورىنبەكۇلى قويشىباەۆ، «ادىلەت» تاريحي-اعارتۋ قوعامى توراعاسىنىڭ ورىنباسارى، جازۋشى، تاريح عىلىمدارىنىڭ كانديداتى

2017 جىلى 5 ناۋرىزدا احمەت بايتۇرسىنوۆ مۋزەيىندە الاش ارىستارىنا بەرىلگەن استاعى ءسوز

Abai.kz