مۇقاعاليمەن 7 سىنىپتا وقىپ جۇرگەن كەزىمدە «اۋىردىم». ەڭ العاش ونىڭ «باسىرە» اتتى جىر جيناعىن قۇنىعا وقىپ شىقتىم. ودان كىتاپ­حانانى اۋدارىپ-توڭكەرىپ ءجۇرىپ، «سوعادى جۇرەك» دەگەن كىتابىن تاۋىپ الىپ، جاتا-جاستانا وقىدىم. جوق، وقىپ قانا قويعان جوقپىن، ءتىپتى بۇكىل ولەڭدەرىن جاتتاپ الدىم. سودان ول اقىننىڭ جيناقتارىن ىزدەپ ءجۇرىپ وقيتىن حالگە جەتتىم. سۋرەتىن ۇلكەيتىپ، تورگە ءىلىپ قوي­دىم. ستۋدەنت كەزىمدە ءبىراز دوس­تارىما «مۇقاعالي» اۋرۋىن جۇقتىر­دىم. سوڭعى كۋرستا وقىپ ءجۇرىپ، اقىنعا ارنالعان ولەڭدەردى جيناقتاپ، ءبىر كىتاپ ەتتىم. ونى تاسقا باسۋعا شامام كەلمەگەن سوڭ، فاريزا اپاما اپارىپ، كومەك بەرۋىن سۇرادىم. كەيىن ول كىسى «جازۋشى» باسپاسىنىڭ ديرەك­تورى سەيداحمەت بەردىقۇلوۆقا تاپ­سىر­عا­نىن ايتتى. سودان ول كىتاپتان حابا­رىم جوق. ەگەر سول كiتاپ تۋرالى قاندايدا ءبىر مالىمەت بىلەتىن كىسىلەر بولسا، ماعان حابارلاسۋىن سۇرايمىن. ەندى ونى كىتاپ ەتىپ شىعاراتىن ۋاقىت جەتكەن سەكىلدى.

 بۇگىن قازاقتىڭ اقيىق اقىنى مۇ­قاعالي ماقاتاەۆتىڭ تۋعان كۇنى. وسىعان وراي ءبىز جاقسىنىڭ كوزى جۇل­دىز مۇحاممەدقاليۇلىمەن اڭگىمە­لەسكەن ەدىك. سول سۇحباتتى نازارلا­رىڭىزعا ۇسىنعاندى ءجون سانادىق.

– مۇقاعالي – تانىستىرۋدى قاجەت ەتپەيتىن ەسىم. دەسەك تە، وقىرماندارىمىزدىڭ ىشىندە جاس شىبىقتاي بۇرالىپ ءوسىپ كەلە جاتقان جەتكىنشەكتەردىڭ دە بارىن ەسكەرىپ، ولاردىڭ الىپ اقىننىڭ ءومىربايانىن بىلە ءجۇرۋى ءۇشىن اكەڭىزدىڭ تۋعان جەرى مەن وسكەن ورتاسى تۋرالى كەڭىنەن ايتىپ بەرگەنىڭىز ءجون بولار ەدى؟

– مەنىڭ اكەمنىڭ ازان شاقىرىپ قويعان اتى – مۇحاممەدقالي. اكەسى – سۇلەيمەن. اناسى – ناعيمان. ول رەسمي قۇجات بو­يىنشا 1931 جىلدىڭ 9 اقپانىندا الماتى وبلىسى قازىرگى رايىمبەك (بۇرىنعى نارىنقول) اۋدانىنىڭ قاراساز اۋىلىندا دۇنيەگە كەلگەن. الايدا اكەمنىڭ تۋعان كۇنى جونىندە ءالى كۇنگە دەيىن ەكى ءتۇرلى مالىمەت بەرىلەدى. ال ناعيمان اجەمىزدىڭ ايتۋىنشا، ناۋرىز تويىنىڭ قارساڭىندا، ياعني، 8 ناۋرىز كۇنى دۇنيە ەسىگىن اشقان. نەگىزى، اكەم اتادان تورتەۋ بوپ تۋعان ەكەن. ۇلكەن ءىنىسى مەن قارىنداسى بالا كۇنىندە قايتىس بولادى. ال توقتارباي مەن كورپەش سول ەلدە ءوسىپ-ءونىپ، ۇلكەن اۋلەتكە اينالدى. ءتولباسى بولعاندىقتان، اكەم اتا-اجەسىنىڭ قولىندا ءوسىپ، ءوز اتا-اناسىن اعا-جەڭگە­سىندەي قابىلدايدى. سۇلەيمەن اتام – قاراسازعا قاراستى ۇجىمشاردىڭ توراعاسى بولعان، ەل باسقارعان ادام. 1941 جىلى ۇلى وتان سوعىسىنا شاقىرىلىپ، سول جىلى كالينينگراد مايدانىندا قازا تابادى. ءسويتىپ، اكەم تيىن اجەسىنىڭ تاربيەسىندە بولادى. ءوزى ايتقانداي، كۇلشەسىن قورعا­سىنعا ايىرباستاپ، جەتىم بولا ءجۇرىپ جەتىلەدى.

– اقىن تىرناقالدى تۋىندىلارىن قاي كەزدە جازا باستادى؟ ول شىعارمالارى قاي باسىلىمداردا جارىق كوردى؟

– اكەم ولەڭ جازۋمەن ەرتە اينالىسقانعا ۇقسايدى. ويتكەنى العاشقى ولەڭدەرى اۋداندىق «سوۆەتتىك شەكارا» گازەتىندە، «ادەبيەت جانە يسكۋسستۆو» جۋرنالىندا جارىق كورە باستايدى. مۇنان كەيىن ول كوپ وقىپ، كوپ ىزدەنەدى. بالا كەزىندە الا الماعان ءبىلىمىن ەسەلەپ قايتارۋعا تىرى­سادى. قازاق، ورىس، الەم ادەبيەتىنىڭ تۋىن­دىلارىمەن سۋسىندايدى. ءسويتىپ ءجۇرىپ وندىرە جازادى.

– ول كىسى قاي جەردە وقىدى؟

– 1948-1949 وقۋ جىلدارى قازمۋ-دىڭ فيلولوگيا فاكۋلتەتىندە، كەيىن شەت تىلدەر ينستيتۋتىنىڭ نەمىس ءتىلى فاكۋل­تەتىندە وقيدى. وكىنىشكە قاراي، ەكى وقۋىن دا تۇرمىستىق جاعدايعا بايلانىستى تاستاۋعا تۋرا كەلەدى. نەگىزى، ادام نيەت قىلسا، سول ماقساتىنا جەتەدى ەكەن عوي. كوپ ۇزاماي، ماسكەۋ قالاسىنداعى م. گوركي اتىنداعى الەم ادەبيەتى ينستيتۋتىندا ءبىلىمىن جەتىلدىرەدى.

– قاي جەردە قىزمەت اتقاردى؟

– جوعارىدا ايتقانىمداي، 1949 جىلى وقۋدى تاستاعاننان كەيىن، شيبۇت اۋىلدىق كەڭەستىڭ حاتشىسى بوپ قىزمەت اتقارادى. سول جىلى انام ەكەۋى وتاۋ قۇرادى. 1954 جىلى قاراسازداعى باستاۋىش مەكتەپتە ورىس جانە نەمىس تىلىنەن ساباق بەرەدى. 1957 جىلى قازاق راديوسىنىڭ ديكتورى بوپ قىزمەت ەتەدى. مۇنان كەيىن «سوۆەتتىك شەكارا» گازەتىندە ءبولىم مەڭگەرۋشىسى بوپ جۇمىس ىستەيدى. 1963 جىلى الماتى قالا­سىنا قونىس اۋدارادى. سودان باستاپ «مادەنيەت جانە تۇرمىس»، «سوتسياليستىك قازاقستان»، «جۇلدىز» باسىلىمدارىندا، سونداي-اق قازاقستان جازۋشىلار وداعىندا ەڭبەك ەتەدى. مىنە،وسىنداي ادەبي ورتادا جۇرگەن كەزىندە ول ءوزىنىڭ اقىندىق قابىلەتى مەن دارىنىن كورسەتە ءبىلدى. كوپتەگەن شى­عارمالارىن جازدى، كىتاپتارىن شىعاردى.

– جالپى، اكەڭىز قانداي ادام ەدى؟

– اكەم وتە بالاجان، جانى نازىك، اقكوڭىل، قولى اشىق، مىنەزى جايلى ازامات ەدى. تالانتتى دا تالاپتى، پاراساتتى دا پايىمدى، زەردەلى دە زەيىندى، اق تا ادال ادام بولاتىن. جانارى جانىپ تۇراتىن. ىلعي دا كەۋدەسىن تىك ۇستاپ جۇرەتىن. بالالارىنان اكەلىك مەيىرىمىن اياعان جوق. ادامزاتقا قيانات جاسامايتىن. بىرەۋگە جاقسىلىق جاساعاندى جانى سۇيەتىن. بىردە ۇيگە ءبىر توپ جىگىتتەر كەلىپ، اكەمە العىس ايتىپ، ريزاشىلىقتارىن ءبىلدىردى. سويتسە، ولار تۇرمەدە جاتىپ، اكەمنىڭ ولەڭدەرىن وقىپ، سودان ءتالىم-تاربيە الىپتى، مىنەز-قۇلىقتارىن تۇزەپتى. ءتىپتى اكەممەن حات الىسىپ تۇرىپتى. ولاردىڭ ىزدەپ كەلگەنىنە اكەم كادىمگىدەي ريزا بولىپ قالدى.
جالپى، اكەم جاس اقىندارمەن ءجيى ارالاساتىن. ولاردى ۇيگە ەرتىپ كەلىپ، ءومىر مەن ونەر ءھام ولەڭ جايلى اڭگىمەلەسەتىن.

– ول كىسىنىڭ مايگۇلگە، ايبارعا، شول­پانعا ارناعان ولەڭدەرىن بىلەمىز. جالپى، ونىڭ نەشە ۇل-قىزى بار؟

– ءبىز اتادان التاۋ ەدىك. ۇلدان ۇلكەنى – مەنمىن. مەنىڭ الدىمدا ءلاززات، مايگۇل ەسىمدى اپكەلەرىم بولعان. ءلاززات ءسابي كۇ­نىندە شەتىنەپ كەتكەن ەكەن، ەسىمدە قال­ماپتى. ال مايگۇل ەكەۋمىز تەتە وستىك.ول قايتىس بولعاندا مەن 10 جاستا ەدىم. اكەم قاتتى قايعىردى. مايگۇلگە ارناپ، بىرنەشە ولەڭ جازدى. زيراتقا دا ءجيى بارىپ تۇراتىن. وكىنىشكە قاراي، مايگۇلدىڭ بەيىتىنىڭ كەڭسايدا ەكەنىن بىلەمىز، بىراق ناقتى قاي جەرگە جەرلەنگەنىن تاپپاي قالدىق.
قىزىم مەنىڭ، گۇلىم مەنىڭ، اياۋلىم!
جاتىر مولاڭ جوتاسىنداي قوياننىڭ.
قۇلپىتاستىڭ قۇنى ماعان بەس تيىن،
بىراق تاسپەن قالاي جانشىپ قويارمىن؟! – دەپ ءوزى جىرلاعانداي،اكەم «قالاقتاي» قىزىنا قورشاۋ قويماعان ەدى. سوندىقتان اكە-شەشەمىزدىڭ زيراتىنا بارعاندا، وعان دا قۇران باعىشتاپ تۇرامىز.
قازىر ءبىز – ءبىر اتادان تاراعان ءتورت بالا الماتىدا تۇرىپ جاتىرمىز. وزىمنەن كەيىنگى قارىنداسىم الماگۇل شاعىن كا­سىپكەرلىكپەن اينالىسادى. ايبار دەن­ساۋلىعىنا بايلانىستى جۇمىس ىستەمەدى. ءتىل ءتيدى مە، كوز ءتيدى مە، بىلمەيمىن… جانىپ تۇرعان بالا ەدى، امال نەشىك، ناۋقاس بوپ قالدى. 2014 جىلى جۇرەك اۋرۋىنان قايتىس بولدى. شولپان – شەت ءتىلىنىڭ مامانى، ءال-فارابي اتىنداعى قازاق ۇلتتىق ۋنيۆەرسيتەتىندە ءدارىس بەرەدى. اكەمنىڭ وتە بالاجان ەكەنىن جوعارىدا ايتتىم.ۇل-قىزدارىنىڭ كىشىسى – ايبار مەن شولپاندى قاتتى ەركەلەتەتىن. ەكەۋىنە دە ولەڭ ارنادى.

– اكەڭىزدىڭ قانداي قادىر-قاسيەتتەرى مەن ەرەكشەلىكتەرى ەسىڭىزدە قالدى؟ ول كىمدەرمەن ءجيى ارالاسۋشى ەدى؟

– اكەم ەڭبەكقور ەدى. شابىتى كەلسە، كۇي تالعاماي جازا بەرەتىن. جاقسى ولەڭ جازسا، بالاشا قۋانىپ، بارلىعىمىزدى داۋىستاپ شاقىراتىن. انامىز قازاق ءتىلى مەن ادەبيەتىنىڭ مامانى بولعاندىقتان، ەڭ اۋەلى جارىنىڭ پىكىرىن سۇرايتىن. «يليچ»، «ماۆر» پوەمالارىنىڭ العاشقى تىڭداۋ­شىسى ءبىز ەدىك. سول كەزدە ارقالانا ولەڭ وقىعان ساتتەرى ءالى ەسىمدە. كەيدە ناقىشىنا كەلتىرىپ، ءان شىرقايتىن. سونداي ساتتەرى حالىق جانە ورىس اندەرىن اۋەلەتە ورىن­دايتىن. ول كىسىنىڭ قۇلاققا جاعىمدى قو­ڭىر داۋىسى بار ەدى. الماتىعا العاش كەل­گەندە بوكسپەن اينالىسىپتى. اكەممەن بىرگە جاتتىققان روجكوۆتى كەيىننەن مىقتى جاتتىقتىرۋشى بولدى دەپ ەستىدىم. سوسىن ساياتشىلىقپەن اينالىساتىن. قىستا شاڭعى تەبەتىن. جازدا كوبىنە كوكپار تارتاتىن. سونداي-اق شاحمات، بيليارد ويىندارىن جاقسى وينايتىن. تاعى ءبىر ەسىمدە قالعانى، ءبىزدىڭ ۇيگە ءشامشى قالداياقوۆ ءجيى كەلەتىن. ەكەۋى بىردە دايىن اۋەنگە ءماتىن جازدى. قازىر ويلاساق، سول «تالدىقورعان» ءانى ەكەن. ول كەزدە پانفي­لوۆ كوشەسىندە تۇراتىنبىز. ءشامشى اعا: «مىنا سوزدەرىڭ مەنىڭ اۋەنىمە ساي كەلمەي تۇر، قايتادان جازشى» دەسە، اكەم شىر-پىرى شىعىپ: «ىشىمنەن شىققان دۇنيەنى مەن نەگە وزگەرتۋىم كەرەك؟» دەپ كونە قويمايدى. ءسويتىپ، ەكەۋى ءبىراز ايتىسقان ەدى. ۇزەڭگىلەس دوستارى دا ۇيدەن ۇزىلمەيتىن. ۇلى وتان سوعىسىنا قاتىسقان اقىن توقاش بەردياروۆ قاراسازداعى قارا شاڭىراققا ءجيى كەلەتىن.تۇرسىنزادا ەسىمجانوۆ، بەكەن ابدىرازاقوۆ، كەڭشىلىك مىرزابەكوۆتەر ىلعي دا اكەمنىڭ جانىنان تابىلاتىن. قازىر قاراسازداعى اكە-شەشەم تۇرعان تو­قال تام جوق. ەسكى قاراسازدىڭ سازى كوبە­يىپ، تۇرۋ مۇمكىن بولماعاندىقتان، بارلىق تۇرعىندار جاڭا قاراسازعا كوشىرىلدى.سونداعى مۇراجايدا ءبىزدىڭ ءۇيدىڭ ماكەتى ساقتاۋلى.

– مۇقاڭنىڭ ءومىر سۇرگەن كەزى – كوم­مۋنيستىك پارتيانىڭ «اق دەگەنى – العىس، قارا دەگەنى – قارعىس» بوپ تۇرعان شاق ەدى. بىراق سوعان قاراماستان، ول دىنگە بەكەم بولعانعا ۇقسايدى… 

– دۇرىس ايتاسىز. اكەم دىنىنە بەرىك ادام ەدى. ونىڭ اسىل ءدىنىمىزدى دارىپتەگەن، اللا تاعالانى ماداقتاعان ولەڭدەرى وتە كوپ. ول قاسيەتتى قۇراندى دا، مۇحاممەد (س.ع.س.) پايعامبارىمىزدىڭ حاديستەرىن دە كوپ وقىعان. سەبەبى، حالقىمىزدى يمان­دىلىققا شاقىرىپ، اللا تاعالاعا قۇلشىلىق جاساۋعا شاقىردى. سونداي-اق قاسيەتتى قۇران سۇرەلەرىمەن اۋىرعان بالاعا دەم سالاتىن.

– اتاقتى ادامنىڭ تەگىن الىپ ءجۇرۋ دە وڭاي ەمەس شىعار؟

– وسى ۋاقىتقا دەيىن ەشقاشان جانە ەش جەردە «مەن مۇكاعاليدىڭ بالاسىمىن» دەپ كەۋدە قاققان جوقپىن. قاي جەردە قانداي قىزمەت اتقارسام دا اكەم سەكىلدى ادال ءجۇرىپ، تىك تۇردىم.ەشكىمنىڭ كومەگىنە جۇگىنگەنىم جوق. جۇمىس كابينەتىمدە اكەمنىڭ كىتاپتارى تۇراتىن. قولىم تيگەن سايىن سول كىتاپتاردى وقىپ تۇرۋشى ەدىم. قازىر زەينەتكە شىقتىم. زايىبىم با­قىتگۇل – م.ماقاتاەۆ اتىنداعى حالىق­ارالىق قوردىڭ ءتورايىمى. ايمان، ايجان، اسەل اتتى ءۇش قىزىم بار ەدى. ايمانىمدى ارسىز اجال كوكتەي جۇلىپ كەتتى. كىشى قىزىمنىڭ ازداپ ولەڭ جازاتىنى بار. سوعان قاراپ «اتاسىنا تارتقان-اۋ» دەپ قويامىن. جىلىنا ءبىر-ەكى رەت وتباسىمىزبەن اكە-شەشەمىزدىڭ قابىرىنە بارىپ، زيارات ەتىپ تۇرامىز. شەشەم وتىز جىل بويى ەسكەرتكىشىن ءسۇرتىپ، جان-جاعىن تازالاۋدى داعدىعا اينالدىرىپ كەتتى. قازىر ءبىز دە وسى ءۇردىستى جالعاستىرىپ كەلەمىز. ونىڭ ۇستىنە، قازاق ۇلى پەرزەنت­تەرىن ءپىر تۇتقان حالىق قوي. ءبىز بارساق، ىلعي تازا تۇرادى. مۇمكىن، ولار اكەمنىڭ ولەڭدەرىن سۇيەتىن، ونى قۇرمەت تۇتاتىن وقىرماندارى شىعار…

– «كوپ قاتەلىك جىبەرىپپىن، امال نە، كەشىر، ۇلىم، مويىندادىم، جارايدى!». اقىن وسى ولەڭى ارقىلى سىزدەردەن كەشىرىم سۇراعان سياقتى…

– ءيا،اكەم كەيدە مەنىمەن تەڭ قۇربى-قۇرداستارىنداي سىرلاساتىن. اندا-ساندا قاتەلىكتەرىن دە مويىندايتىن. ماعان ساباق بولسىن دەگەنى شىعار. «بۇل قاتەلىكتەر ماعان جاراسادى، جۇلدىز. بىراق سەن قايتالاما، ونى كوتەرە المايسىڭ» دەيتىن جارىقتىق. ونداي ساتتەردە انامىز ء«بارى دۇرىس بولادى» دەپ باسۋ ايتاتىن. ءسال مۇڭايىپ وتىرىپ، اكەم قايتا ەڭسەسىن كوتەرەتىن. سوندايدا بولمەدە ەرسىلى-قارسىلى ءجۇرىپ: ء«اي، مەنى تۇسىنگىسى كەلگەن ادام ولەڭدەرىمدى وقيدى. نيچەگو، ءتورت ميلليون قازاعىم امان بولسا، مەن ەشقاشان ولمەيمىن» دەيتىن. مەنىڭ كوزىم جەتكەن ءبىر جاعداي، اكەم ءوزىنىڭ ۇلى ادام ەكەنىن سول كەزدە-اق سەزدى.

– كوزى ءتىرى كەزىندە قانداي كىتاپتارى جا­رىق كوردى؟

– عۇمىرىنىڭ سوڭعى جىلدارى اكەم وندىرتە جازدى.ۇيدە دە، تۇزدە دە، ءتىپتى ەمحانادا جاتىپ تا جازۋدان باس المادى. ءومىرىنىڭ ۇزاققا بارماسىن اقىن جۇرەك سەزگەن سەكىلدى. سونىڭ ناتيجەسىندە ءبىراز جيناعى جارىققا شىقتى. ماسەلەن، «يليچ»، «ارمىسىڭدار، دوستار»، «داريعا – جۇرەك»، «قارلىعاشىم، كەلدىڭ بە؟»، «ماۆر»، «اققۋلار ۇيىقتاعاندا»، «شۋاعىم مەنىڭ» اتتى جىر جيناقتارى – جوعارىدا ايتقان ءسوزىمىزدىڭ دالەلى. سونداي-اق ۋ.ۋيتمەننىڭ ء«شوپ جاپىراقتارى»، ۋ.شەكس­پيردىڭ «سونەتتەر»، د.اليگەريدىڭ «قۇدىرەتتى كومەدياسى» اتتى 3 اۋدارما كىتابى باسپا بەتىن كوردى.

– ول كىسىنىڭ فانيدەن باقيعا وزعانىنا دا قىرىق جىلدان اسا ۋاقىت ءوتىپتى. وسى جىل­دار ارالىعىندا نەشە كىتابى تاسقا باسىلدى؟

– ء«ومىرداستان»، «سوعادى جۇرەك»، «شولپان»، «جىرلايدى جۇرەك»، ء«ومىر-وزەن»، «قوش، ماحاببات!»، «امانات» جانە «قاراسازدان ۇشقان قارلىعاش» اتتى جيناعى، سونداي-اق شاعىن كۇندەلىگى جارىق كورىپ، قولدان-قولعا تيمەي تاراپ كەتتى. اباي ەنتسيكلوپەدياسىنان كەيىن، ەكىنشى بولىپ مۇقاعالي ەنتسيكلوپەدياسى تاسقا باسىلدى. 1999 جىلى ەلباسىنىڭ قولداۋى­مەن ءھام مۇحتار قۇل-مۇحاممەدتىڭ مۇرىن­دىق بولۋىمەن «امانات» اتتى كىتابى مەملەكەتتىك سىيلىققا يە بولدى. سول جىلى «عاسىر اقىنى» اتاعى بەرىلدى. 2016 جىلى تالدىقورعان قالاسىندا ەسكەرتكىش اشىلدى.

– اقيىق اقىننىڭ تۋىندىلارى وزگە تىلدەرگە اۋدارىلدى ما؟

– ءيا، اكەمنىڭ شىعارمالارى ورىس، اعىلشىن، نەمىس، تۇرىك، وزبەك، قىرعىز، ت.ب. تىلدەرگە اۋدارىلدى. ورىس تىلىندە «زوۆ دۋشي» دەگەن ولەڭدەر جيناعى جارىققا شىقتى. ول كىتاپقا ەنگەن ولەڭدەردى ورىستىڭ بەلگىلى اقىندارى يۋ.الەكساندروۆ پەن م.كۋرگانتسەۆ ءتارجىمالادى. دەگەنمەن ءالى دە باسقا تىلدەرگە اۋدارۋدى قولعا الساق، نۇر ۇستىنە نۇر بولار ەدى. كەزىندە ءوزى دە ورىستىڭ تالانتتى اقىندارى ن.تيحونوۆ، ر.بەرنس، ف.انساري، ا.اكوپيان، ا.يسااكيان، ە.ەۆتۋشەنكو، ف.مورگۋننىڭ ولەڭدەرىن قازاقشا سويلەتتى.

– جەر بەتىندە قازاق دەگەن حالىق باردا اقىننىڭ اتى دا، زاتى دا ولمەسى انىق. دەي تۇرساق تا، ونىڭ ەسىمىن ماڭگى ەستە قالدىرۋ ماق­ساتىندا قانداي شارالار جۇزەگە اسى­رىلدى؟

– قازاقستان جازۋشىلار وداعى 1985 جىلى مۇقاعالي ماقاتاەۆ اتىنداعى ادەبي سىيلىق تاعايىندادى. الپىس جىلدىق مەرەيتويى قارساڭىندا تۋعان جەرىندە مەكتەپ جانە مۇراجاي اشىلدى. الماتىدا اقىن اتىندا مەكتەپ، كوشە جانە سول كوشە بويىندا مۇقاعاليعا ارنالعان ەسكەرتكىش بار. باسقا ايماقتاردا دا مەكتەپ، كوشە اتاۋلارى بولۋى ابدەن مۇمكىن. ونى مەن تاپ باسىپ ايتا المايمىن. اكەمنىڭ ولەڭدەرىنە ن.تىلەنديەۆ، د.راقىشەۆ، ش.قالداياقوۆ، ءى.جاقانوۆ، ا. قورازباەۆ، ت.راحيموۆ، م.رۇستەموۆ، ت.مۇحامەدجانوۆ، ءا.تىناليەۆ، ب.ورالۇلى، ت.دوسىموۆ، تاعى باسقا سازگەر­لەر ءان شىعاردى. ول تۋرالى ءتۇرلى جانردا مىڭعا جۋىق شىعارمالار جازىلدى. ءالى دە جازىلا بەرەتىنى حاق. 2011 جىلى اكەمنىڭ 80 جىلدىعى جوعارى دەڭگەيدە اتالىپ ءوتتى. وسىنىڭ ءوزى اكەمنىڭ اتى مەن مۇراسى حالىقپەن بىرگە ماڭگى جاسايتىنىن بىلدىرسە كەرەك.

– اڭگىمەڭىزگە راقمەت!

سۇحباتتاسقان ەرماحان شايحىۇلى

Aيقىن گازەتى