عالامتور تاريحىنداعى ەڭ ءىرى قاسىرەت اتالاتىن «كوك كيت»، «تىنىش ءۇي»، «كيت كولى»، «4:20» دەگەن توپتار قوعامنىڭ داۋلى ماسەلەسىنە اينالىپ وتىر. جاسوسپىرىمدەرگە ءولىم سەبەتىن وسى توپتاردىڭ اتاۋىندا نە جاتقانىن بىلەسىزدەر مە؟ ال قىزمەتى تۋرالى شە؟

«4:20»

«4:20-دا مەنى ويات» اتاۋىنىڭ بۇل وقيعالارعا قاتىسى جوق. بۇل ۋاقىت – سولتۇستىك امەريكادا ماريحۋانا شەگەتىن ناشاقورلاردىڭ ۋاقىتى. بۇل ءساۋىردىڭ 20-جۇلدىزى دەگەندى دە بىلدىرەدى. ءدال وسى كۇنى 4:20-دە ناشاقورلار ء"بىز بىرگەمىز" دەگەن سيمۆولمەن ءشوپ شەگەدى. ويىندى قۇراستىرۋشىلار وسى سيمۆولدى وزدەرىنە اينالدىرىپ، 4:20-دا بارلىق قۇربان ويانادى دەگەن نيەتپەن اتاعان.

نەگە «كوك كيت»؟

نە سەبەپتى سۋ استى عالامشارىندا ءومىر سۇرەتىن بەيكۇنا ءارى ماڭعاز بالىقتىڭ اتاۋىن وسىنداي جاۋىز ويىنعا تەلىدى؟ بۇعان نەشە ءتۇرلى جاۋاپ بار. سونىڭ ەڭ العاشقىسى – جالعىزدىق. سۋ استى «تۇرعىندارىنىڭ» اراسىندا جالعىز جۇزەتىن – كيت. بالاسىن قورەكتەندىرىپ، ءوز جەمتىگىن ءوزى تاۋىپ جەي الاتىن شاققا كەلگەنشە بالاسى جانىندا جۇرەدى. كەيىن جەكەلەنىپ كەتەدى. بۇل – جالعىزدىقتىڭ بەلگىسى دەپ ەسەپتەلەدى.

ەكىنشىسى، قول جۇمساۋ.

بالىقتاردىڭ اراسىندا ءوز-وزىنە قول جۇمسايتىن – كيت پەن دەلفيندەر. ولار ومىرلەرىنە قاۋىپ تونسە، دەنساۋلىعى سىر بەرسە، جاعالاۋعا ءوز-وزدەرىن تاستاپ جىبەرەدى.

ءۇشىنشى، سيمۆول.

ءبىر كەزدەرى وسى ويىن باستالماس بۇرىن كيتتەردىڭ ۇشىپ جۇرەتىنى، بۇلتتاردىڭ اراسىندا قالىقتاپ جۇرەتىنى بەينەلەنگەن انيماتسيالار تاراي باستادى. بۇعان كوپشىلىك نازار اۋدارا قويمادى. تەك جاسوسپىرىمدەر قىزىقتى. ويتكەنى، كيت سۋدان سەكىرىپ شىعىپ، ەركىن قالىقتاعىسى كەلەدى. سوندىقتان، جاڭا ءرومانتيزمنىڭ بەلگىسى رەتىندە كيت – ارمان مەن قيالدىڭ سيمۆولى دەپ ەسەپتەلدى. انيماتسيالار سىرتتاي قورقىنىشتى كورىندى، كەيدە تىنىشتىقتىڭ، جالعىزدىقتىڭ بەلگىسىندەي ەدى. نەمىس تىلىنەن «كوكتەگى كيت» ءولىم پەرىشتەسى دەگەن ماعىنانى بىلدىرەدى ەكەن. بۇل – وتپەلى كەزەڭدە جالعىزدىقتا، تىنىشتىقتا جۇرگىسى كەلەتىن جاسوسپىرىمگە ءولىم سيمۆولى.

ال «تىنىش ءۇي» اتاۋى شە؟

عالامتوردا ءبىر ويدى، ماقساتتى ۇستانعان ادامدار توبى نەتستالكەرلەر دەپ اتاعان. ولار وزدەرىن «تىنىش ءۇي» دەپ اتاعان. بۇل توپتان ەشكىم شىعا المايدى، سونىڭ جەتەگىندە ءجۇرىپ، تۇڭعيىعىنا باتىپ كەتەدى. سونداي يدەيامەن اشىلعان «تىنىش ءۇي» دەپ اتالاتىن ۆكونتاكتە جەلىسىندەگى توپتار دا ميى ۋلانعان جاستاردى ءبىر ۇيىرگە جينايدى. ولار ماقساتتارىنا جەتپەي تىنبايدى، ارتقا شەگىنۋگە جول دا جوق، ءۇمىت تە سەيىلەدى. ولار قيالي، بىراق وتە قورقىنىشتى سۋرەتتەر جۇكتەپ، تەرىس ويدى، بۇل ومىردەن باز كەشۋدى ناسيحاتتايتىن اۋەندەر تىڭداتادى. مۇنداي نەشە ءتۇرلى توپ بار. بۇل توپقا تىركەلۋشىلەردىڭ ماقساتتارى بىردەي: جان تىنىشتىعىن تابۋ، ەشكىمگە كەدەرگى كەلتىرمەۋ. تەك مىندەتتەرى ءارتۇرلى: كوك تامىردىڭ بويىنا ءبىرى كوبەلەك پەن كيتتىڭ سۋرەتتەرىن سالعىزادى، ءبىرى پويىزدىڭ استىنا جەتەلەيدى، ءبىرى كوپىردەن قۇلاتادى…

قۇرمەتتى وقىرمان! قارىنداسىڭىز، ءىنىڭىز، باۋىرىڭىز، دوسىڭىز، سىنىپتاسىڭىزدى، ءتىپتى ءوزىڭىزدى الەۋمەتتىك جەلىنىڭ جەگى قۇرتتارىنان ساقتاڭىز. پوشتاعا، جەكەگە كەلگەن حاتتاردى ساقتىقپەن اشىڭىز. كەز كەلگەن سىلتەمەنى اشپاڭىز. ساقتىق شارالارىن مۇقيات قاداعالاڭىز. بۇل تۋرالى تانىستارىڭىزدى دا حاباردار ەتىڭىز. ءومىرىڭىز بىرەۋدىڭ بالتاسىندا كەتپەسىن!

نۇرسۇلۋ نايمانوۆا.

Abai.kz