رەداكتسيا: اتا زاڭنىڭ 26-بابىنا ەنگىزىلگەلى وتىرعان وزگەرتۋلەرگە قاتىستى ساياساتتانۋشى دوس كوشىم مىرزا  «Abai.kz» اقپاراتتىق پورتالى ارقىلى ءوز پىكىرىن ءبىلدىردى.

-------------------------------------------------------------------------------------------------------------------------------

بىرىنشىدەن، ەگەر قر كونستيتۋتسياسىن حالىقتىق رەفەرەندۋم ارقىلى قابىلداساق، كونستيتۋتسياعا ەنەتىن بارلىق وزگەرىستەر مەن تولىقتىرۋلار دا رەفەرەندۋم ارقىلى قابىلدانۋى ءتيىس. وكىنىشكە وراي، بۇگىنگە دەيىن كونستيتۋتسيا باپتارىنىڭ، كەم دەگەندە، ۇشتەن ءبىرى وزگەرىسكە ءتۇستى، بىراق بيلىك ءبىر دە ءبىر باپتى حالىقتىڭ تالقىسىنا سالعان جوق.

ەكىنشىدەن, وتكەن جىلعى داۋعا قالعان جەر ماسەلەسىنىڭ ەكى سۇراعى شەشىمىن تاپپاي تۇرعاندا، كونستيتۋتسياداعى مەنشىككە قاتىسى بار باپتى وزگەرتۋگە كۇش سالۋ – حالىقتى كوشەگە شىعارۋ ءۇشىن جاسالعان ارنايى جوسپار سياقتى.

ۇشىنشىدەن, بۇگىنگى كۇنى قۇدايدىڭ بەرگەن جەرىن، وزەن-كولىن، اۋاسىن جەكەمەنشىككە جاتقىزۋدى قازاق قوعامى قابىلدامايدى. ارينە، سان ءتۇرلى ايلا-شارعىلارمەن كەز كەلگەن زاڭدى قابىلداۋعا (قابىلداتۋعا) بولاتىن شىعار، بىراق ونىڭ ءتۇبى ۇلكەن جارىلىسقا الىپ كەلەتىنى انىق.

تورتىنشىدەن, ءوز باسىم، «جەر – مەملەكەتتىڭ مەنشىگى» دەگەن تۇجىرىممەن كەلىسپەيمىن. جەر – سونى ساقتاپ قالعان، وزدەرىنىڭ قاندارىمەن قورعاعان حالىقتىكى، قازاق ۇلتىنىڭ، الاشتىڭ مەنشىگى. قازاق جەرى حالىقتىڭ ەمەس، مەملەكەتتىڭ مەشىگى بولعاندا – ۇلت ءوزىنىڭ جەرىنەن ايرىلا باستايدى ەكەن: كەڭەس وداعىنا كىرگەن قازاق مەملەكەتىنىڭ باسشىلارى «ەكونوميكالىق قاجەتتىلىك» دەگەن سىلتاۋمەن «وزدەرىنىڭ  مەنشىگىندەگى جەردى» رەسەيگە دە، وزبەكستانعا دا تاراتتى...بيلىككە بەرۋگە بولمايتىن ەكى نارسە بار; بىرەۋى – ادامداردىڭ قۇقىعى مەن ەركىندىگى (مەملەكەت تەك سول قۇقىقتىڭ ساقتالۋىنىڭ كەپىلى عانا), ەكىنشىسى – جەر (مەملەكەت جەردى ءتيىمدى پايدالانۋدى رەتتەۋشى عانا)    

بەسىنشىدەن, ارينە، «اركىمنىڭ مەنشىگى» قورعالۋى كەرەك، بىراق، بۇل ۇعىمعا ۇلتتىڭ مەنشىگى كىرمەيدى. مەنىڭشە، ءبىرىنشى كەزەكتە، وسى ماسەلەنى زاڭداندىرۋ كەرەك سياقتى.

التىنشىدان, قۇرمەتتى دوستار، 26-باپ تۋرالى پىكىرلەرىڭىزدى الەۋمەتتىك جەلىدە بىلدىرگەندەرىڭىز دۇرىس، بىراق ونى، مىندەتتى تۇردە، تومەندەگى مەكەن-جايعا، حالىقتىڭ پىكىرىن جيناقتايتىن رەسمي ورىنعا جىبەرىڭىزدەر. ەرتەڭ بيلىك الەۋمەتتىك جەلىدە قانشا ادام ءوزىنىڭ پىكىرىن ءبىلدىردى دەپ ساناپ جاتپايدى، «بىزدەرگە وسىنشاما پىكىر ءتۇستى، ونىڭ وسىنشا پايىزى 26-باپقا وزگەرىس ەنگىزۋگە قارسى، ال مۇنشاسى جاقتادى» دەگەن قورىتىندى جاريالايدى. سول ۋاقىتتا سانىمىزدى سوعىپ قالمايىق.

(پىكىرلەرىڭىزدى مىنا مەكەن-جايعا جىبەرىڭىزدەر: 010000, استانا قالاسى، ەسىل اۋدانى. ۇكىمەت ءۇيى. قازاقستان رەسپۋبليكاسى پرەزيدەنتى اكىمشىلىگىنىڭ مەملەكەتتىك قۇقىق ءبولىمى.  ەلەكتروندى پوشتاسى: ap.2017@akorda.kz)  

دوس كوشىم

Abai.kz