نازارباەۆ رەسمي ساپارمەن بىرىككەن اراب امىرلىكتەرىنە باردى
قازاقستان پرەزيدەنتى نۇرسۇلتان نازارباەۆتىڭ بىرىككەن اراب امىرلىكتەرىندەگى ەكى كۇندىك رەسمي ساپارى باستالدى. مەملەكەت باسشىسى ابۋ-دابي حانزاداسى مۇحاممەد بين زايد ءال-ناحايانمەن، مەملەكەت قايراتكەرلەرىمەن جانە وسى ەلدىڭ ىسكەر توپ وكىلدەرىمەن كەزدەسەدى.
قازاقستاننىڭ ابۋ-دابيدەگى ەلشىسى قايرات لاما ءشاريفتىڭ "ەگەمەن قازاقستان" گازەتىنە حابارلاۋىنشا، ەكى مەملەكەت اراسىندا تۋريزم، قارجى جانە ەنەرگەتيكا سالالارىنداعى ارىپتەستىك تۋرالى كەلىسىم-شارتتارعا قول قويىلادى.
"قازىرگى تاڭدا امىرلىكتەر اراب جانە مۇسىلمان الەمىندە قازاقستاننىڭ سەنىمدى سەرىگىنە اينالدى", - دەپ مالىمدەدى قايرات لاما شاريف.
16 قاڭتاردا نۇرسۇلتان نازارباەۆ ابۋ-دابيدە "بولاشاقتىڭ قۋاتى" حالىقارالىق سامميتىنە قاتىسادى. قازاقستان پرەزيدەنتى 2017 جىلى ءبىرىنشى مارتە شەتەلگە رەسمي ساپارمەن شىقتى.
اباي-اقپارات
