مامانداردىڭ تاپشىلىعى جۇمىسشى ىزدەگەن كاسىپكەرلەرگە ايقىن بىلىنەدى. بىلايعى جۇرت قانشاما ماماندار ديپلوم الىپ جۇمىس تاپپاي جۇرگەنىن ءسوز ەتەدى. شىنتۋايتىنا كەلگەندە ديپلومى بار مامانداردىڭ كوپشىلىگى جۇمىسقا كەلگەندە نە ىستەرىن بىلمەي ساسقالالاقتاپ تۇرعانى. جۇمىستىڭ قىرى مەن سىرىن ءتۇسىندىرىپ بەرىپ، ال ەندى جالعاستىر دەۋگە دە يكەمدەلە المايتىندار كوپ. سوندا جۇمىس بەرۋشىنىڭ «ديپلوم بەرگەن مەكەمەدەن دىم ۇيرەنبەگەن ەكەنسىڭ» دەپ ديپلومىن قولىنا ۇستاتىپ، قايتا بەر دەۋدەن باسقا امالى قالمايدى.

ال كەيبىر جۇمىس بەرۋشىلەر ۇلكەن قايىرىمدىلىق جاساپ، جاڭا كەلگەندەرگە قايتادان ۇستاز بولۋعا بەل بايلايدى. ويتكەنى دايىن مامان دەپ كەلىپ وتىرعانداردىڭ 90 پايىزى دەرلىك ءىس جۇزىندە جۇمىستى الىپ كەتۋى نەعايبىل. سوندىقتان ۇيرەتۋدەن جالىقپايتىن جۇمىس بەرۋشىلەر دە بار. الايدا بۇل ورايدا ۇيرەتەم دەپ ءجۇرىپ، ۋاقىتتان ۇتىلىپ، تۇتاس وندىرىستىك ءۇردىستى توقتاتىپ الۋ قاۋپى تاعى بار. ال مۇنىڭ جالپى ەلدىڭ ەكونوميكاسىنىڭ دامۋىنا كەرى ىقپالى بولاتىنى باسەنەدەن بەلگىلى جايت.

جۇمىس بەرۋشى ءوز ىسىنە شەبەر مامانعا تاپ بولا قالسا سودان ايرىلماۋدىڭ امالىن جاسايدى. بىلىكتى ماماننىڭ قويعان تالاپتارىن تۇگەل ورىنداپ، جۇمىس ىستەۋگە بارىنشا جاعداي جاسايدى. بۇگىنگى نارىقتىق ەكونوميكانىڭ تالابى ەڭ الدىمەن جۇمىسشى جاقسى بولسا دەپ تىلەۋ. جۇمىسشى جاقسى بولسا، جۇمىستىڭ ناتيجەسى دە جاقسى. جاقسى، ساپالى جۇمىستىڭ ونىمىنە سۇرانىس كوپ. سۇرانىس كوپ بولعاننان كەيىن تابىس تا كوپ. وسى قاعيدا كەز كەلگەن سالاعا قاتىستى. مەديتسينا، ءبىلىم، قۇرىلىس، اۋىل شارۋاشىلىعى، ماشينا جاساۋ، ساۋدا-ساتتىق، ءتىپتى قۇقىق قورعاۋ ورگاندارىنا دا قاتىستى. ءوز ءىسىنىڭ بارلىق نورماتيۆتەرىن جاقسى بىلەتىن جانە شەشۋشى ساتتەردە باتىل ارەكەت ەتە الاتىن مامان، جاعدايدىڭ كۇردەلى كەزدەرىندە نەنىڭ بۇرىس، نەنىڭ دۇرىس ەكەنىن انىقتاي الاتىن مامان ەلدىڭ ريزاشىلىعىنا بولەنىپ جۇرەدى. سايكەسىنشە بىلىكتى ماماننىڭ تابىسىندا مول بەرەكە بولماق.

بىلىكتى مامان بولۋعا دەگەن جاۋاپكەرشىلىكتى بىزدەر ەرتە جاستان-اق بالالاردىڭ بويىنا سىڭىرۋگە ءتيىسپىز. بالا-باقشادان باستاپ ومىردە وزىنە ءبىر ماماندىق بولۋى قاجەتتىگىن جانە سول ماماندىقتىڭ ناعىز يەسى بولۋعا ءتيىس ەكەندىگىن ساناسىنا ءسىڭىرۋ ماڭىزدى. مەكتەپ قابىرعاسى جاس بۋىننىڭ ومىردە دۇرىس باعىت-باعدار الۋىنا، دارىنى مەن يكەمدىلىگىنە قاراي ءوز ماماندىق جولىن ايقىن تانۋىنا زور ىقپال ەتەدى.

ءاربىر اتا-انا بالانى دۇنەگە اكەلگەن، وسىرگەن وزدەرى بولعانىمەن ونى قوعام الدىندا ەلدىڭ ازاماتىنا اينالاتىن تۇلعا ەتىپ دايىنداۋ كەرەكتىگىن تۇسىنەدى. اركىم ءوز بالاسىنىڭ ەرتەڭگى كۇنى قىلمىسكەر ەمەس، ەلىنە ادال قىزمەتكەر بولىپ شىعۋىنا شىن تىلەكتەس. بالانىڭ جەكە تۇلعا بولىپ قالىپتاسۋىنا مەملەكەتتىك جۇيە، اتاپ ايتقاندا بالا-باقشا، مەكتەپ، وقۋ ورىندارى مەن جۇمىسپەن قامتاماسىز ەتۋشى ورىندار كومەكتەسەدى.

قازىرگى تاڭدا قايسىبىر سالانى الساق تا مامان جەتىسپەۋشىلىگى كوزگە ۇرىپ تۇر. كينويندۋستريا، شوۋ بيزنەس، باسپا ءىسى، بۇقارالىق اقپارات قۇرالدارىندا، اسىرەسە ءونىمدى حالىققا تاراتۋ، جاريالاۋ، جارنامالاۋ، دۇرىس ءتۇسىندىرۋ تۇرعىسىنان بىلىكتى ماماندار وتە قاجەت.

تەك قانا جاستارعا ەمەس، ەل ازاماتتارى مەن اتا-انالارعا، ۇستازدارعا، اكىمشىلىك ورىنداعى قىزمەتكەرلەرگە دە ەلىمىزدى جاقسى ماماندارمەن قامتاماسىز ەتەيىك دەگىم كەلەدى.

گۇلجان ءىزتاي

Abai.kz