ءماجىلىستىڭ كەشەگى وتكەن جالپى وتىرىسىندا دەپۋتات الماس تۇرتاەۆ قر ينۆيستيتسيالار جانە دامۋ ءمينيسترى اسەت يسەكەشەۆكە دەپۋتاتتىق ساۋال جولدادى. «قۇرمەتتى اسەت ورەنتايۇلى! مىنا ماسەلەلەردى ەسكەرە وتىرىپ، «قازپوشتا» اق قىزمەتىنىڭ ساپاسىن جاقسارتۋعا بايلانىستى اتقارىلىپ جاتقان جۇمىستار بويىنشا اقپارات بەرۋىڭىزدى سۇرايمىز» دەپ كەلەتىن حالىق قالاۋلىسىنىڭ ساۋالىندا بىرقاتار ماسەلەلەر ءسوز بولادى.  

«قازپوشتا» اق ەلىمىزدىڭ بۇكىل اۋماعىندا پوشتالىق جانە قارجىلىق قىزمەتتەردىڭ تولىق سپەكترىن ۇسىناتىن قازاقستان رەسپۋبليكاسى پوشتالىق بايلانىسىنىڭ ۇلتتىق وپەراتورى بولىپ بەلگىلەنگەن. 2013 جىلى قازپوشتا كىرىستەرى 2012 جىلمەن سالىستىرعاندا 14 پايىزعا ءوسىپ، 30,8 ملرد تەڭگەنى قۇراعان. قازپوشتانىڭ تيىمدىلىگى جانە تازا تابىسى ءۇش جىل قاتارىنان وسۋدە، بىراق پوشتا باسشىلىعى جۇمسالعان شىعىننىڭ اقتالماۋى تۋرالى ايتىپ، ۇنەمى سۋبسيدياعا سۇيەنگەندى ءجون كورەدى.

2014 جىلعى 1 اقپاننان باستاپ قازپوشتا قىزمەتتەر تاريفتەرىن كوتەرگەن. بۇل رەتتە، باعانى كەزەكتى جوعارىلاتۋ دەۆالۆاتسيامەن تۇسىندىرىلەدى، بىراق تەڭگە قۇنى 19 پايىزعا تومەندەپ، كەيبىر پوزيتسيالارعا (جازبا حات-حابارلاردى جونەلتۋ) باعالار 27 پايىزعا ارتقان.

قىزمەتتەر قۇنىنىڭ كەزەكتى ارتۋىنان كوپتەگەن باسپا باسىلىمدارى كۇردەلى جاعدايعا تاپ بولۋدا. ايتالىق، كەيبىر باسىلىمدار جازىلۋدان جانە باسپا نوبايىنان باس تارتىپ، تولىعىمەن «ونلاينعا» كوشۋدە. بۇعان قوسا، قازپوشتانىڭ نەگىزگى پروبلەمالارىنىڭ ءبىرى – ءتيىمسىز مەنەدجمەنتتە دەپ ەسەپتەيمىز. ەگەر الىنعان تابىس پوشتاشىلاردىڭ ەڭبەكاقىلارىن يندەكستەۋگە جىبەرىلمەسە، پوشتانىڭ قاراجاتى قايدا جۇمسالاتىنى تۇسىنىكسىز. مىسالى، وڭىرلەردە پوشتاشىلار ءوز جۇمىسى ءۇشىن 5 مىڭنان 15 مىڭعا دەيىنگى كولەمدە جالاقى الادى. ال ورتالىق اپپاراتتاعى قىزمەتكەرلەر 10 ەسە جوعارى السا، باسشىلىق ءتيىستى سىياقى دا الادى. 

سونىمەن بىرگە قىزمەتتەر قۇنى ارتقانىمەن، قىزمەتتەر ساپاسى جاقسارعان جوق، ياعني حات-حابارلار استانا جانە الماتى قالالارىنا 2-3 كۇنگە، وبلىستارعا 7 كۇنگە كەشەۋىلدەپ جەتكىزىلەدى. وڭىرلەردە ينتەرنەت دامىماعانىن، جۇرتشىلىق ءالى كۇنگە دەيىن گازەت وقيتىنىن ەسكەرسەك، وندا «قازپوشتا» اق ءوزىنىڭ الەۋمەتتىك-ساياسي مىندەتتەرىن ءالى سەزىنبەي كەلەدى. قازپوشتا باسپا باسىلىمىن بوساتۋ باعاسىنا كوميسسيا قوساتىندىقتان، وقىرماندار ءۇشىن گازەت باعاسى كوتەرىلىپ وتىر.

پوشتا قىزمەتى ساپاسىنىڭ تومەندەۋىمەن بىرگە، پوشتا قىزمەتكەرلەرى تاراپىنان جاسالعان زاڭ بۇزۋشىلىقتار جىل سايىن ارتىپ كەلەدى. مىسالى، 2014 جىلدىڭ سوڭىندا ورال قالاسىندا «قازپوشتا» اق-نىڭ 9 قىزمەتكەرى مۇگەدەك بالالار شوتىنان اقشا جىمقىردى دەگەن ايىپپەن ءار ءتۇرلى مەرزىمگە سوتتالسا، وسى جىلدىڭ باسىندا بۇقارالىق اقپارات قۇرالدارى اقتاۋ قالاسىندا پوشتا قىزمەتكەرلەرى سالەمدەمەلەردى اشىپ، وزدەرىنە ۇناعان زاتتاردى العاندارى ءۇشىن ۇستالدى دەگەن مالىمەتتى تاراتتى.

قازىرگى كەزدە پوشتا ارقىلى جىبەرىلەتىن زاتتاردى جونەلتۋ ءۇشىن حالىق پويىز جولسەرىكتەرىنىڭ نەمەسە ۇشاق ەكيپاجدارىنىڭ قىزمەتىنە جۇگىنەدى. ءدال وسى پوشتا جۇمىسىنا ازاماتتار سەنىمسىزدىكپەن قارايتىندىقتان، قازاقستانداعى پوشتالىق قىزمەتتەر نارىعىندا شەتەلدىك كۋرەر قىزمەتتەرى (مىسالى، DHL) پايدا بولىپ، تابىستى جۇمىس ىستەۋدە. ال مەرزىمدى باسىلىمداردى قابىلداۋمەن جانە جەتكىزۋمەن قازپوشتادان باسقا وزگە دە كومپانيالار اينالىسادى.

«وتكەن جىلى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قازاقستان رەسپۋبليكاسىنىڭ پوشتا بايلانىسى سالاسىنداعى زاڭنامانىڭ نورمالارىن دۇنيەجۇزىلىك پوشتا وداعى اكتىلەرىنىڭ نورمالارىمەن بىرىزدەندىرۋ جانە پوشتا وپەراتورلارىنىڭ قىزمەتىن رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىن قابىلداپ، قازپوشتانىڭ حالىقارالىق دەڭگەيدە قىزمەت ەتۋىن قامتاماسىز ەتتىك. بىراق ونىڭ ىشكى قىزمەتى تومەن دەڭگەيدە قالىپ وتىر. بۇل ماسەلەلەردى بۇرىن بىرنەشە كوتەرگەنىمىزدە ۇكىمەت تاراپى پوشتا قىزمەتىن رەتتەۋگە قاتىستى جاڭا رەداكتسياداعى زاڭ جوباسىن ازىرلەپ، ماجىلىسكە ۇسىناتىندىعىن ايتقان بولاتىن. بىراق ونداي زاڭ جوبا ءالى كۇنگە دەيىن دەپۋتاتتاردىڭ قولىنا تيگەن جوق» دەي كەلە دەپۋتات الماس تۇرتاەۆ  «قازپوشتانىڭ» حالىققا قىزمەتىن جەتىلدىرۋدى ۇسىنادى.

اباي.kz