ۇلتتىق قاۋىپسىزدىك كوميتەتىنە قاراستى شەكارا قىزمەتىنىڭ بۇرىنعى ديرەكتورى نۇرلان جولامانوۆقا (سۋرەتتە) قاتىستى سوت ءىسى جالعاسۋدا. سوتتىڭ كەزەكتى وتىرىسىنا كۋاگەر رەتىندە كەلگەن شەكارا قىزمەتى باسقاراماسىنىڭ بۇرىنعى باس قارجىگەرى نۇرجان قيلىباسوۆ قيلى جايتتاردى جايىپ سالدى.

قيلىباسوۆتىڭ سوزىنە قاراعاندا، ول جولامانوۆپەن بۇرىننان تانىس-ءبىلىس كورىنەدى. «ۇقك شەكارا قىزمەتى باسقاراماسىنىڭ باس قارجىگەرى قىزمەتىنە تاعايىندالعان كەزىمدە مەن ءوزىمدى جولامانوۆقا قارىزدار ادامداي سەزىنىپ ءجۇردىم، ءارى ودان قىزمەتىمنەن ءبىر-اق كۇندە قاعىپ تاستاي ما دەپ ولەردەي قورقاتىن ەدىم» دەدى قيلىباسوۆ سوتتاعى كۋالىك سوزىندە.

جولامانوۆتان زارە-قۇتى قالماي قورىققان قيلىباسوۆتىڭ ءارى قارايعى اڭگىمەسىنە قۇلاق تۇرسەك، ول (جولامانوۆ) نە ايتسا دا بۇل (قيلىباسوۆ) بۇلجىتپاي ورىنداي بەرگەن كورىنەدى.

- بىردە، - دەيدى قيلىباسوۆ، -  گەنەرال ىسساپارعا شىعاتىن بولدى دا، مەن وعان 5 مىڭ دوللار بەردىم. 3 مىڭ دوللاردى سوڭىنان «كىشى زالدا» تاعى دا قولىنا ۇستاتتىم. «بۇل 3 مىڭ دوللار الماتىداعى توقالىمنىڭ جۇمىسىنا كەرەك» دەدى ول.

قيلىباسوۆ ءوزىنىڭ زاڭسىز ارەكەتتەرگە بارعانىنا قىنجىلا وتىرىپ: ء«بارىن امالدىڭ جوقتىعىنان جاسادىم»، - دەپ اقتالادى.

ەكس-قارجىگەردىڭ سوزدەرىنە سەنسەك، گەنەرال نۇرلان جولامانوۆ بارلىق كەلىسىم-شارتتاردان وزىنە تيەسىلى «سىباعاسىن» سۇراپ، پارا الىپ وتىرعانعا ۇقسايدى. ء«بىز قارجى ماسەلەسىن جولامانوۆتىڭ ۇيىندە، ءۇيىنىڭ كەڭ اۋلاسىندا، كەڭسەدەگى دەمالىس بولمەسىندە كەڭەسۋشى ەدىك»، - دەيدى گەنەرالدىڭ ىلىكىدەگى سەنىمدى سەرىگى.

قيلىباسوۆ سوتتا جولامانوۆتىڭ مىنەزىنىڭ قيىندىعىن دا جايىپ سالدى:

- گەنەرال - اشۋشاڭ ادام. شەكارا قىزمەتىندەگىلەردى تىم قاتتى قىسىپ ۇستادى. ولارعا ءتۇن جارىمىنا دەيىن جۇمىس ىستەتىپ، كەيدە جەكسەنبى كۇندەرى دە تىنىشتىق بەرمەيتىن. سونداي قىتىمىر، مازاسىزدىعىمەن قوسا بارىمىزگە بەتىڭ بار، ءجۇزىڭ بار دەمەي بوقتاپ-بورالاپ، دورەكى سويلەيتىن.

وسىلاي دەي كەلىپ، قيلىباسوۆ گەنەرال جولامانوۆتىڭ تىقىر تاياعاندا پالەنىڭ ءبارىن اينالاسىنا جاۋىپ، ءوزى سۋدان تازا، سۇتتەن اق بولۋعا تىرىسقانىن ايتتى.

- بىردە ول جينالىس اشىپ، شەكاراداعى لاۋازىمدى قىزمەت يەلەرىنە «وڭباعاندار، سەندەر كەلەڭسىز ىسكە ۇرىنعالى جۇرسىڭدەر، بەتتەرىڭ جامان، شەتىڭنەن ۇرىسىڭدار!» دەي باستادى. مەن سودان كەيىن جاعدايدى تەز ءتۇسىنىپ، بۇدان بىلاي ونىڭ قوقان-لوققىسىنا توزە بەرۋدىڭ مۇمكىن ەمەستىگىن ويلادىم دا، قارسى بارلاۋ مەكەمەسىنە ارىز جازدىم جانە جاسىرىپ قويعان 24 ميلليون تەڭگەنى قازىناعا قايتا قۇيدىم، - دەپ اعىنان اقتارىلدى قيلىباسوۆ سوتتاعى كۋالىك سوزىندە.

ەستەرىڭىزگە سالا كەتەيىك، شەكارا قىزمەتى باسقاراماسىنىڭ ەكس-ديرەكتورى نۇرلان جولامانوۆ بىلتىر قازان ايىندا لاۋازىمىن اسىرا پايدالانىپ، ءىرى كولەمدە پارا الدى دەگەن كۇدىكپەن تۇتقىندالعان بولاتىن. جولامانوۆتىڭ «جولدان تاپقان» قارجىسى 252 ميلليون دەگەن ءسوز بار. جولامانوۆتىڭ قاسىندا 2458-ءشى بولىمشەنىڭ كومانديرى قايرات بالماعانبەتوۆ تە وتىر. كوماندير قازىر بارلىق كىناسىن مويىنداۋدا. ال، جولامانوۆ بولسا، تەرگەۋگە الىنىپ، تۇتقىندالۋىن ساياسي تاپسىرىس دەپ زار قاعادى.

- مەن ەشقانداي قىلمىس جاساعان جوقپىن. مەنىڭ وسىلاي اباقتىعا جابىلۋىم ۇيىمداسقان ءبىر توپقا كەرەك بولدى. مەنىڭ باسىمداعى حال – ساياسي تاپسىرىس، - دەپ قالدى ول سوت زالىنان شىعىپ، ايداۋدا كەتىپ بارا جاتقان كەزىندە ءباسپاسوز وكىلدەرىنە قاراپ.

راسىندا، جولامانوۆتىڭ باسىنداعى احۋال ساياسي تاپسىرىس پا، الدە ول جاساعان قىلمىسى ءۇشىن قاماۋعا الىندى ما؟ بۇل سۇراقتاردىڭ جاۋابىنا ازىرگە جەتە المايمىز. ونىڭ ۇستىنە، بىزدە ادام تاعدىرىنا قاتىستى قانداي دا ءبىر جايتتىڭ ۇشپاق-پۇشپاعىنا جەتۋ قيىننىڭ قيىنى. الايدا، قىزمەتىن ادال اتقارىپ، ءوز ءىسىن عانا بىلەتىن كىسىدە بىلايعى جۇرتتىڭ شارۋاسى بولا بەرمەسى انىق. قيلىباسوۆ پارمەنى كۇشتى الدەبىر توپتىڭ قىسىمىمەن قيىستىرىپ سويلەدى دەسەك تە، جولامانوۆتىڭ جولدان تايعانىن مۇلدە جوققا شىعارا المايمىز. انشەيىندە «جەرىمىز كەڭ بايتاق» دەگەندە كەرەمەتپىز. سول كەڭ بايتاق جەرىمىزدىڭ تىنىشتىعى مەن قاۋىپسىزدىگىن قالت جىبەرمەي قورعاۋعا، كۇزەتۋگە ءتيىس تۇلعالارىمىزدىڭ ءتۇرىن قارا. جەتىباستى جالماۋىز سياقتى اينالاسىن توناپ، ۇرلاپ، جالماڭداپ تويماي ءجۇر. ءبىز، ارينە، ايىپتاۋشى ەمەسپىز، بىراق جولامانوۆتار قايتكەندە سوت تاراپىنان ناقتى جازاسىن الۋى كەرەك.

Abai.kz