سيريا ەلىندە قايعىلى جاعداي ورىن الىپ، 58 ادام كوز جۇمدى. قازىر بەلگىسىز اۋە شابۋىلى بارىسىندا حيميالىق قارۋ قولدانىلعانى تۋرالى اقپارات تاراپ جاتىر. ساراپشىلاردىڭ ءبىر توبى "بۇل شابۋىلدى سيريا ۇكىمەتى وزدەرى ۇيىمداستىردى" دەسە ەندى بىرەۋلەرى قاندى قىرعىنعا رەسەيلىك ۇشاقتاردىڭ قاتىسى بار ەكەنىن مالىمدەۋدە. 

يدليب پروۆينتسياسىنداعى حان-شەيحۋندەگى اۋە شابۋىلىنان  58 ادام قازا تاپقان. اۋە شابۋىلى بارىسىندا حيميالىق قارۋ قولدانىلعانى راستالسا، پۋتين مەن اسادتىڭ باسىنا تاعى دا قارا بۇلت ءۇيىرىلۋى مۇمكىن. قازىر بۇل ءىستى بۇۇ ءوز قاداعالۋىنا الىپ، اسكەري قىلمىس جونىندەگى ساراپشىلار  بۇل  اقپاراتتى تەكسەرە باستادى.

بۇگىن بۇۇ قاۋىپسىزدىك كەڭەسى وسى ماسەلەگە قاتىستى شۇعىل جيىن وتكىزىپ، 4 ءساۋىر كۇنى جاسالعان شابۋىل تۋرالى بايانداما جاسادى. بۇۇ-نىڭ سيريا جونىندەگى ارنايى وكىلى ستاففان دە ميستۋرانىڭ ايتۋىنشا، بۇنى اۋەدەن جاسالعان حيميالىق شابۋىل دەۋگە بولادى ەكەن-ءمىس.

كەشە عانا پەتەربۋرگتەگى تەراكتىدەن ەسەڭگىرەپ قالعان رف  قورعانىس مينيسترلىگى وزدەرىنىڭ يدليب پروۆينتسياسىندا اۋە شابۋىلىن جاساماعانىن مالىمدەدى. ال سيريا پرەزيدەنتى باشار اسادتىڭ ۇكىمەتى بولسا، بۇل ىسكە قاتىسى جوعىن حابارلاپ، ونى بۇلىكشىلەردىڭ مويىنىنا ءىلدى.

ءشارىپحان قايسار

اباي-اقپارات