2017 جىلدىڭ باستى وقيعاسى ءسوزسىز «استانا ەكسپو-2017» حالىقارالىق كورمەسى.  حالىقارالىق شارانىڭ شىمىلدىعى اشىلدى. وتكەندە عانا كورمە ۇيىمداستىرۋشىلارى 2 ميلليونىنشى قوناقتى دۇركىرەتىپ قارسى الدى.

سول كورمەنىڭ اشىلۋ سالتاناتىندا كورشىلەس  قىتاي، رەسەي، قىرعىزستان، وزبەكستان، سونداي-اق وزگە ەلدىڭ 8 پرەزيدەنتى قاتىسقانى بەلگىلى. ەلىمىزدىڭ جانە شەتەلدىك باق-تىڭ ەكى مىڭنان استام وكىلى اقپارات تاراتتى. اشىلۋ سالتاناتى تۋرالى 2997 ماقالا جارىق كورسە، ونىڭ 718-ءى شەتەلدىك باسىلىم ەكەنىن وسىعان دەيىن جازعان ەك.

سونىمەن شەتەلدىك باسىلىمدار ەلورداداعى ەكسپو كورمەسى تۋرالى نە جازىپ جاتىر؟       

امەريكالىق  «FORBES» جۋرنالى حالىقارالىق كورمە تۋرالى بىرنەشە جازبا جاريالاپتى. ءبىرىنشىسى، «استانادا ءوتىپ جاتقان كورمەگە بارۋدىڭ 5 سەبەبى». وندا قازاقتىڭ ۇلتتىق سالت-داستۇرىنەن بولەك، الەمنىڭ جاسىل تەحنولوگيا سالاسىندا جەتكەن جەتىستىگىمەن تانىسۋعا بولاتىندىعى ايتىلعان. سونداي-اق، «استانا كورمەنى وتكىزىپ وتىرعان تاڭعاجايىپ قالانىڭ  ءبىرى» دەپ باعا بەرىلگەن. از عانا ۋاقىتتا، فۋتۋرۋستىك ستيلدە جاڭا قالا بوي كوتەردى. ماقالا اۆتور قالا تۇرعىندارىنىڭ قوناقجايلىلىعىن ەرەكشە اتاپ وتكەن.  وسى جۋرنالدا جاريالانعان تاعى ءبىر ماتەريال – «EXPO 2017 قازاقستاننىڭ الەمدىك ارەناعا جاساعان تاعى ءبىر قادامى»  –  دەپ اتالادى.

انگليالىق «DAILY MAIL» باسىلىمى ەلىمىزدىڭ «استانا «ەكسپو 2017» حالىقارالىق كورمەسىنە وتە جاقسى دايىندالعانىمىزدى اتاپ وتكەن.

ال امەريكالىق «CNN INTERNATIONAL» ەلوردامىزعا «بولاشاقتىڭ عاجايىبى» دەپ باعا بەردى. سونداي-اق استانانىڭ كوركەم عيماراتتارىمەن قوسا ءار نىساننىڭ انىقتاماسىن دا كورسەتىپ وتكەن ەكەن.

«بولاشاقتىڭ قالاسى –  عارىشتان قاراعاندا ، جەر عالامشارىنىڭ كەرەمەتى ىسپەتتى كورىنۋى عاجاپ ەمەس. جەرگىلىكتى حالىق ءوز اتاۋىمەن اتايتىن نىساندار دا بارشىلىق. سوڭعى جىلدارى قازاقستان استاناسى فۋتۋريستىك ارحيتەكتۋرانىڭ دا كوركەم ۇلگىسىن جاساۋ ۇستىندە» دەپتى اگەنتتىك.

«استانادا ءوتىپ جاتقان «ەكسپو-2017» قىتايلىق ۇزدىك كاسىپورىندارىن تانىستىرۋعا مۇمكىندىك بەرەدى»، -دەپ جازادى «RUSSIAN.CHINA.ORG.CN» سايتى.

ال قىتايلىق «CGTN»: «استاناداعى ەكسپو كورمەسى كوپتىڭ نازارىن اۋدارىپ جاتىر. اسىرەسە بولاشاق تاۋەلسىز ەنەرگەتيكانى جاسىل تەحنولوگيامەن بايلانىستىرعان ەلدەردى. قاق ورتاداعى «نۇر الەم» اتتى نىسان «بولاشاق ەنەرگيانىڭ مۋزەيى» رەتىندە تانىستىرىلدى»، دەپتى.

تۇركيانىڭ «TRT Haber» اگەنتتىگى اتالعان كورمەگە قاتىستى ءوز تاجىربيەلەرىن ءبولىسۋدى ءجون كورىپتى. كورمە اشىلعان كۇنى تۇركيا پاۆيلونىنىڭ دا سالتاناتتى اشىلۋ ءراسىمى وتكەن ەدى. پاۆيلونىڭ اشىلۋىنا  استاناداعى ەكسپو تۇركيا كوميسسارى تارىك سونمەز، ەلىمىزدىڭ ينۆەستيتسيا جانە دامۋ ءمينيسترى جەڭىس قاسىمبەك، تۇركيانىڭ استاناداعى ەلشىسى نەۆزات ۋيانىك قاتىسقان. ماقالا اۆتورى ءسوز سوڭىندا كورمەنىڭ اشىلۋىنا جوعارى باعا بەرىپ، ەرەكشە اسەر قالدىرعانىن ايتقان.

بەلارۋسيالىق «BELTA.BY» سايتى «ەكسپو كورمەسى –  قازاقستانداعى سوڭعى جىلداردا ۇيىمداستىرىلعان ەڭ اۋقىمدى شارانىڭ ءبىرى»، دەپ جازادى.  «كوپتەن كۇتكەن ۇلى تويدىڭ ۇيىمداستىرۋ دەڭگەيى وتە جوعارى. مۇنداي ءىس-شارانى تاماشالايتىن قوناقتىڭ سانى وليمپيادا مەن فۋتبولدان الەم چەمپيوناتىنا كەلەتىن تۋريستەرمەن پارا-پار» دەيدى ارمەن قاراي.

ال ۋكراينالىق «DAY.KYIV.UA» سايتى ۋكرايناعا ينۆەستييا تارۋدا استانا ەكسپو-2017 كورمەسىنىڭ بەرەرى كوپ ەكەندىگىن ايتىپتى.

«ۋكرايناعا ينۆەستيتسيا تارتۋ، سونداي-اق سوڭعى ۇلگىدەگى تەحنولوگيانى اكەلۋ ءۇشىن  «استانا EXPO-2017» حالىقارالىق كورمەسىنىڭ مۇمكىندىگىن پايدالانامىز. ۋكراينادان كورمەگە 100-دەن اسا كاسىپورىن قاتىسادى. ءبىزدىڭ ماقساتىمىز – ەلىمىزدەگى ءوندىرىس دەڭگەيىن كوتەرۋ ءۇشىن كورمە بارىسىندا وزگە ەلدەرمەن بايلانىس ورناتۋ»، دەلىنگەن سايت جازباسىندا.

ءازىربايجاننىڭ مەملەكەتتىك  «AzTV» ارناسى  ەلورداداعى كورمە تۋرالى بىرقاتار سيۋجەت دايىنداعان. «EXPO-2017 مامانداندىرىلعان كورمەسىنىڭ الەمنىڭ ەكونوميكالىق دامىعان جەتەكشى ەلدەرىنەن كەيىن قازاقستاندا ءوتۋى ەنەرگەتيكا سالاسىنداعى ىنتىماقتاستىقتىڭ ارى قاراي دامىپ، قاتىسۋشى ەلدەردە جۇزەگە اسىرىلعان جاڭا تەحنولوگيالاردىڭ الماسۋىنا مۇمكىندىك بەرەدى» دەپتى ازىربايجاندىق جۋرناليستەر. كەلەسى EXPO-2025 حالىقارالىق كورمەنى وتكىزۋگە رەسەي، فرانتسيا جانە جاپونيامەن قاتار ءازىربايجاننىڭ دا ۇمىتكەر ەكەندىگى باسا ايتىلدى.

ءتۇيىن: وسىلايشا كورمەگە قاتىسىپ جاتقان 100-دەن استام ەلدىڭ ءباسپاسوز قۇرالىنىڭ «استانا ەكسپو-2017» تۋرالى جازعانىن مىسال رەتىندە كەلتىرە بەرۋگە بولادى. سەبەبى وسى ۋاقىتقا دەيىن ءبىزدىڭ نازارىمىزعا ىلىككەن ماقالا، سيۋجەتتىڭ سانى مىڭنان اسادى. سىننان گورى سالماقتى، ساراپتاما باسىم. «بولاشاقتىڭ ەنەرگياسى» تاقىرىبى كوپشىلىكتىڭ كوكەيىندە جۇرگەنى بەلگىلى بولدى.

Abai.kz