قازاق ۇلتتىق ونەر ۋنيۆەرسيتەتىنىڭ پروفەسسورى، قر ەڭبەك سىڭىرگەن ءارتيسى، تانىمال تالانت باۋىرجان يبراگيموۆپەن قازىرگى تاڭداعى ەلىمىزدىڭ مادەني ومىرىندەگى وزەكتى ماسەلەلەر جونىندە سۇحباتتاستىق. اڭگىمە بارىسىندا قوعامدا شۋ  كوتەرىپ، ءار ءتۇرلى پىكىرلەردىڭ ايتىلۋىنا سەبەپ بولعان   كەيبىر جايلار دا نازاردان تىس قالعان جوق. اۋەلى، اڭگىمە اۋانى تۋپ-تۋرا مادەنيەت ءمينيسترى ا. مۇحامەديۇلىنا قاتىستى كەيبىر جايلاردان وربىگەن بولاتىن.

-باكە، بۇگىنگى تاڭدا اقپارات ايدانىندا اسا تانىمال، كەيبىر مالىمدەمەسىمەن، ءىس-ارەكەتىمەن  بىرەۋلەردىڭ سىنىنا  ۇشىراپ قالىپ جۇرگەن   قر مادەنيەت جانە سپورت ءمينيسترى ارىستانبەك مۇحامەديۇلىنىڭ زامانداسى ءارى ونەر سالاسىنىڭ ىستىعىنا كۇيىپ، سۋىعىنا توڭىپ جۇرگەن ءوز وكىلى، تانىمال قايراتكەرىنىڭ ءبىرى رەتىندە ەلىمىزدەگى مادەنيەت ساياساتىنىڭ تىزگىنىن ۇستاپ وتىرعان اتالمىش تۇلعا جايىندا جەكە پىكىرىڭىزدى بىلسەك دەپ ەدىك. ءسىز بىلەتىن ارىستانبەك مۇحامەديۇلى قانداي جان؟ ول كىسىنىڭ بۇگىنگى مادەنيەت ءمينيسترى رەتىندەگى قىزمەتىنە قالاي باعا بەرەسىز؟ ول كىسىگە قاراتا ايتاتىن سىن، ءار ءتۇرلى سيپاتتاعى اڭگىمە قانشالىقتى شىندىققا جاقىن؟ 

-ارينە، ەلدىڭ مادەني ومىرىندە بولىپ جاتقان ءاربىر وقيعادان ونەر ادامى رەتىندە تىس قالمايمىز. اسىرەسە، سالانى باسقارىپ وتىرعان ۇكىمەتتىڭ بىلدەي ءبىر ءىرى لاۋازىم يەسى جايىندا ەشتەڭە بىلمەي، مۇلدەم بەيحابار وتىرساق، وندا كىم بولعانىمىز؟ قازىر مينيستر ارىستانبەك تۋرالى ەكىنىڭ ءبىرى، ەگىزدىڭ سىڭارى  بىردەمە ايتىپ قالۋعا تىم اۋەس. اقپارات قۇرالدارىنا زەر سالىپ قاراساڭىز، ول كىسى جايلى سانقيلى پىكىرلەر كوز سۇرىندىرەدى. اسىرەسە، قاقاعان قىستىڭ سارى ايازىمەن بىرگە قاتتى ءورشىپ كەتكەن داۋ-داماي ەندى عانا سايابىرسىپ كەلە جاتقان سياقتى كورىنەدى. ءار نارسەنىڭ شەگى بار، ەندى ءبىر نۇكتە قويىلاتىن ۋاقىتى دا بولدى عوي.

جالپى، قاي سالادا بولماسىن تىڭنان تۇرەن سالىنىپ، قىزۋ جۇمىس جۇرسە  ءتۇرلى كوزقاراستاردىڭ ءبىلدىرىلىپ جاتۋى - زاڭدىلىق. ال، مۇنداي شارالاردىڭ باسىندا ءاربىر قادامى  ەلگە ءمالىم بولىپ وتىراتىن بەلگىلى ساياسي تۇلعالار تۇرسا نەبىر الىپقاشتى اڭگىمەنىڭ ءورشۋى - قالىپتى جاعداي. قازاق «جاقسىنىڭ ارتىنان ءسوز ەرەدى» دەۋشى مە ەدى. راسىندا دا   ەشنارسە جاسالماسا ايتىلار اڭگىمەگە سەبەپ تە تابىلماسى باسى اشىق اڭگىمە.

سوندىقتان، مينيستر جايىنا كەلسەك، مەن كىمنىڭ بولسا دا الدىمەن ىستەگەن ىسىنە قاراپ باعا بەرۋگە تىرىساتىن اداممىن. بىرەۋلەردىڭ دۇرمەگىنە ەرىپ، شۋلاعان توپقا اۋەن قوساتىن البىرت بالا-شاعا ەمەسپىز. ول ماعان لايىق شارۋا دا ەمەس.

دەگەنمەن، مادەني الەمنىڭ جاقسىسى مەن جامانىنا بەيتاراپ قاراي المايتىن، وسى سالانىڭ شىن جاناشىرى   مەنىڭ دە ءوز پىكىرىمنىڭ، جەكە كوزقاراسىمنىڭ بولۋى زاڭدى ءارى قيسىندى شىعار. ول كىسى جايلى نە  ويلايتىنىم،  قانداي پىكىر بىلدىرەتىنىم شىنىمەن قىزىقتى ءارى ماڭىزدى بولسا، ونى ءباسپاسوز الدىندا ەش بۇكپەسىز اشىق بىلدىرۋدەن قاشپايمىن.

-البەتتە، ءسىز ساتيرا سالاسىنىڭ ساردارى، ەركىن ويلى ازاماتسىز. سول سەبەپتەن دە، ءبىزدىڭ وقىرماندار سىزدەن قارا قىلدى قاق جارعان ءادىل ءسوزدى عانا كۇتەدى.

-ولاي بولسا، الدىمەن ءسوزدى مىنادان باستايىقشى. وسى ارىستانبەك دەگەن جىگىت مينيستر بولىپ كەلگەلى نە تىندىردى؟ وسى جونىندە ەشبىر ەموتسياسىز، ياعني، سەزىمگە بەرىلمەي، اشۋعا بوي الدىرماي  ناقتى دەرەك-دايەككە سۇيەنىپ، ايتايىقشى.

بۇرىن جەرگىلىكتى وڭىرلەردەگى مادەني وشاقتاردى سونداعى اكىم-قارالار تاراتىپ جىبەرۋگە، جاۋىپ تاستاۋعا قۇزىرەتى بولعانىن بىلەسىزدەر. وسىنىڭ سالدارىنان قانشاما كلۋب، كىتاپحانالاردان ايرىلدىق. ولاردىڭ كوبى دۇكەنگە اينالىپ، كەيبىرىنىڭ ەسىگىنە قارا قۇلىپ سالىندى. قاراۋسىزدان، يەسىزدىكتەن توزىپ كەتكەنى قانشاما؟   بۇل جاعداي جالعاسىپ،  اۋىل-ايماق مۇلدە رۋحاني وشاقسىز قالار ما ەدى، ەگەر «مادەنيەت تۋرالى» زاڭعا وزگەرىستەر ەنگىزىلمەسە؟! وڭىرلەردەگى حالىقتىڭ باقىتىنا وراي،  مينيسترلىكتىڭ كەلىسىمىنسىز اكىمدەردىڭ مادەنيەت مەكەمەلەرىنە قاتىستى دەربەس شەشىم قابىلداۋ قۇزىرەتىنىڭ جويىلۋى بۇل جاعدايعا  توسقاۋىل قويدى.  اسا ءبىر كۇردەلى پروبلەما وسىلايشا، ارەكەڭنىڭ مادەنيەت سالاسىنا كەلىپ، باتىل شەشىمدەر قابىلداۋى ارقاسىندا  زاڭنامالىق تۇرعىدان رەتتەلدى.

تەاترلار ومىرىندە دە بىلايعى جۇرتقا اڭعارىلا بەرمەيتىن كۇردەلى پروبلەمالار بارشىلىق. مىسالى، ەلىمىزدەگى تەاترلار بىرىڭعاي رەپەرتۋارلىق ساياساتتىڭ اياسىندا كوركەمدىك كەڭەستەردىڭ كومەگىمەن زاڭنامالىق نەگىزدە رەتتەلەتىن بولدى. بۇل دا جىلدارعا سوزىلعان داۋلى ماسەلەلەر بولاتىن. قاراپايىم حالىق اراسىندا بۇگىنگى ءومىردى بەينەلەيتىن تارتىمدى قويىلىمدار جوقتىعىنا سىن-سوگىس تە كوپ ايتىلاتىن. تەاترعا باراتىنداردىڭ سانى كۇرت كەمىدى دەپ شۋلادىق. ساحنالانعان قويىلىمداردىڭ كوركەمدىك ساپاسى تومەن ەكەندىگى دە ءسوز بولىپ جاتاتىن. ال، ەندى، كوركەمدىك كەڭەس قۇرىلعان سوڭ تالعامعا ساي ءتاۋىر تۋىندىلارعا جول اشىلادى دەپ ۇمىتتەنەمىز.

جازۋشىلارعا جارىققا شىققان كىتابى ءۇشىن قالاماقى بەرۋ ماسەلەسى دە شەشىم تاۋىپ وتىر. بۇل دا ءوز كەزەگىندە بايىرعى وقىرماندارىمىزدى جاس بۋىنمەن قوسا كىتاپقۇمارلىققا تارتۋعا ىقپال ەتەدى دەگەن ويدامىز.

سول سەكىلدى كينەماتوگرافيا، بۇقارالىق سپورتتى دامىتۋ تۋرالى زاڭداردىڭ جوباسى دا اتالمىش ءمينيستردىڭ تۇسىندا جاسالدى. ەل تاريحىندا تۇڭعىش رەت وتكەن جىلى عانا «قازاق ەلى» اتتى تولىقمەتراجدى انيماتسيالىق فيلم ءتۇسىرىلدى. بۇل جەردە انيماتسيالىق كينو ءونىمىنىڭ كۇردەلى قيىندىعىن ايتىپ، ءسوزدى سوزباي-اق قويايىن.

كورەرمەنىن بىردەن باۋراپ العان احان ساتاەۆتىڭ «اناعا اپارار جول»، رۇستەم ءابدىراشتىڭ «قازاق ەلى»، «الماس قىلىش» فيلمدەرىنىڭ ءوزى نەگە تۇرادى؟ قازىردىڭ وزىندە 28 كوركەم جانە دەرەكتى فيلم وندىرىستە ەكەن. ونىڭ ىشىندە «توميريس»، «سۇلتان بەيبارىس»، «بالۋان شولاق» فيلمدەرىمەن قاتار «قازاق ەلى-2» تەلەسەريالى دا بار. مۇنىڭ ءبارى بىلگەن جانعا وسى سالادا جاسالىپ جاتقان يگى قادامدار. باردى باعالاي بىلگەن ابزال عوي.

-قازاقستاندا ۇنەمى سىنعا ىلىگەتىن، اقساپ جاتقان ءبىر سالا بولسا، ول تۋريزم شىعار. جالپى، ءدال وسى سالاعا ەشكىمنىڭ كوڭىلى تولمايدى. ارەكەڭنىڭ تۇسىندا سىننان كوز اشپايتىن ءبىزدىڭ تۋريزم قانشالىقتى العا جىلجىدى؟

-ەندى، ارەكەتسىز وتىر دەۋگە كەلمەس. بايقاۋىمشا، ارنايى قابىلدانعان

تۇجىرىمداما بار ەكەن. وندا مادەني-تانىمدىق جانە ەتنوگرافيالىق تۋريزم ەرەكشە قولعا الىنىپ جاتقان كورىنەدى. مىسالى، Mice جانە Event – ءتۋريزمدى، بالالار جانە جاسوسپىرىمدەر، مەديتسينالىق، اڭشىلىق جانە سپورتتىق ءتۋريزمدى، ءاۆتوتۋريزمدى جانە كاراۆانينگتى دامىتۋ باعىتتارىنا شەيىن ايقىندالعانىن تۇجىرىمدامادان كورۋگە بولادى.

سونداي-اق،  «استانا – ەۋرازيا جۇرەگى»، «الماتى – قازاقستاننىڭ ەركىن مادەني ايماعى»، «تابيعات بىرلىگى جانە كوشپەلى مادەنيەت»، «التاي مارجانى»، «ۇلى جىبەك جولىن قايتا جاڭعىرتۋ»، «كاسپي قاقپاسى» دەگەندەي وڭىرلىك مادەني-تۋريستىك كلاستەرلىك دامۋى دا بەلگىلەنگەن.

قالاي دەسەك تە، بۇگىنگى كۇنى الەم نازارى استاناعا اۋىپ وتىرعانى شىندىق. الەم ەلدەرىنەن اعىلىپ جاتقان تۋريستەردىڭ قاراسى دا ءبىرشاما بارشىلىق. ونى قالاي جوققا شىعارۋعا بولادى؟

جۋىقتا «ەحرو-2017» حالىقارالىق كورمەسىنە وراي سالىنعان ەتنواۋىل ۇلتتىق-مادەني كەشەنىندە بولدىم. ول جەردە حالقىمىزدىڭ تاريحي مۇرالارىمەن قاتار قازىرگى كۇنگى تىنىس-تىرشىلىگىن ايشىقتايتىن  بارلىق جادىگەرلەردى كەزدەستىرۋگە بولادى. الىس-جاقىن شەتەلدەردەن كەلگەن قوناقتار مەن تۋريستەر سول ەتنواۋىلدا ءورىپ ءجۇر دەسەك ارتىق ايتقاندىق بولمايتىن شىعار. جالپى، ادام قاراسى مول. ءوز وتانداستارىمىز دا قاتتى قىزىقتايدى ەكەن.

«نون-ستوپ» ۇلگىسى بويىنشا جۇمىس ىستەيتىن ەتنواۋىلدا قازاقتىڭ ساندىك-قولدانبالى ونەرىنىڭ بارلىق تۇرلەرى بار. ۇلتتىق سپورت تۇرلەرى دەيسىڭ بە، ءداستۇرلى اڭشىلىق-ساياتشىلىق، تاعام، اس-سۋ تۇرلەرى دەيسىڭ بە، ءبارىن كەزدەستىرەسىڭ. انا جولى سوندا 200 جۇيرىك سايگۇلىك قاتىسقان ۇلكەن ات جارىسى ءوتتى. اتقۇمار جىگىتتەر ءبىر سەرپىلىپ قالدىق.

ەتنومۋزىكالىق ونەر فەستيۆالى ۇيىمداستىرىلدى. كونەدەن جەتكەن سازدى اۋەندى قۇلاقتىڭ قۇرىشىن قاندىرىپ، تىڭداۋ دا ءبىر عانيبەت. جالپى، ەحرو كورمەسى وتەتىن ءۇش ايدا وندا ءتۇرلى مادەني ءىس-شارالار ۇيىمداستىرىلا بەرمەكشى. مۇنداي شارالاردىڭ ۇيىمداستىرىلۋى تۋريزم سالاسىن دامىتۋعا ەلەۋلى ىقپال ەتەتىن فاكتور بولا الادى دەپ ەسەپتەيمىن، ءوز باسىم.

جالپى، ءبىز قازىرگى زامان ۇلگىسىمەن سالىنعان اسەم عيماراتتارىمىزبەن الەمدى تاڭداي قاقتىرا المايمىز. وركەنيەتتى الەم ءۇشىن ونىڭ ءبارى تاڭعاجايىپ دۇنيە بولۋدان باياعىدا قالعان. شەتەلدەن كەلگەن تۋريستەر ءۇشىن ءبىزدىڭ كوشپەندى تۇرمىس-سالتىمىز، كيىز ءۇيىمىز، ەجەلگى شارۋاشىلىعىمىز، ۇلتتىق  زات-بۇيىمدارىمىز، كونە مۋزىكالىق اسپاپتارمەن ورىندالاتىن ءان-كۇي عانا قىزىقتى ءارى تارتىمدى. ونىمەن شەت جۇرتتى عانا تامساندىرىپ قويماي ءوز ۇرپاعىمىزدى، كەيىنگى جاس بۋىندى ۇلتتىق رۋحتا تاربيەلەۋگە مۇمكىندىك تابامىز. سالت-ءداستۇرىن قۇرمەتتەي بىلگەن ۇرپاق  انا ءتىلىنىڭ دە قادىرىن ءبىلىپ، ونى بولاشاققا ميراس ەتۋگە ۇمتىلاتىن بولادى. وسىنداي يگىلىكتەر ءۇشىن دە جوعارىداعىداي ەتنواۋىلدار كەرەك. ءبىزدىڭ ۇلتتىق كودىمىز باسقادان بۇرىن  سالت-داستۇرىمىزدە، ءتول ونەرىمىزدە ەكەنىن ۇمىتپاۋعا ءتيىسپىز. مينيسترلىكتىڭ وسى ماسەلەگە باسىمدىق بەرگەنىنە ءوز باسىم رازى بولدىم.

-مادەنيەت سالاسىنا سپورتتىڭ دا قاتىستى ەكەنى بەلگىلى. ءسىز بەن ءبىز سپورتتىڭ بەلگىلى ءبىر سالاسىمەن كاسىبي تۇرعىدان ۇنەمى اينالىسىپ، جارىپ كەتپەسەك تە، قىزۋ باسەكەنى كورگەندە قانىمىز قايناپ، قىزىل كەڭىردەك بوپ ايعايعا باساتىن  مىقتى جانكۇيەر ەكەندىگىمىز ايدان انىق. ولاي بولسا، مينيسترلىك تۋرالى اڭگىمە قوزعاعان ەكەنبىز، سپورتتى نەگە ءسوز ەتپەسكە؟

-سپورتتىڭ دا جۇلدىزى جانعان تۇستارى بولادى. ايتا بەردى، سپورت تا

ونەردىڭ ءبىر قۇرامداس بولىگى. وعان باپ تا، باق تا، مەملەكەتتىك قولداۋ دا كەرەك. كەز كەلگەن مەملەكەت سپورتتى تەك ونەر عانا ەمەس، ساياسات رەتىندە العا شىعارادى. الەم ارەناسىندا تۋعان ەلىڭنىڭ بايراعى كوتەرىلىپ، ءانۇرانى شىرقالعاندا رۋحتانبايتىن جان بار ما؟

تاۋەلسىزدىك جىلدارىندا قايسار ۇلدارىمىز بەن جىگەرلى قىزدارىمىزدىڭ ارقاسىندا تالاي جەڭىستى ساتتەردىڭ كۋاسى بولدىق. پەكين، لوندون، ريو دە جانەيرو وليمپيادالارىندا كوك تۋدىڭ كوتەرىلگەنىن كورىپ، تالاي مارتە كەۋدەمىزدى قۋانىش كەرنەدى عوي.

سول جەڭىستەردىڭ ءبىرازى وسى ارىستانبەكتىڭ مينيستر بولعان كەزىمەن تۇسپا تۇس كەلدى. ونى دا جوققا شىعارماۋىمىز كەرەك. ەڭ بەرگىسىن ايتقاندا، بىلتىر عانا وتكەن دۇنيەجۇزىلىك قىسقى ۋنيۆەرسيادا ويىندارىندا  قىتاي، كورەيا، جاپونيا، فرانتسيا سىندى ازۋلى ەلدەردىڭ سپورتشىلارىن شاڭ قاپتىرىپ، العا شىعىپ كەتكەن جوقپىز  با؟

كەشە عانا مەن مىنانداي ءبىر دەرەكتى رەسمي سايتتان وقىپ قالدىم. ءبىزدىڭ سپورتشىلارىمىز 2016 جىلدان بەرى 718 حالىقارالىق سايىستا كۇش سىناسىپ، 239 التىن، 223 كۇمىس، 298 قولا مەدال العان ەكەن. باعالاي بىلەيىكشى، جىگىتتەر، بۇل ۇلكەن جەتىستىك. قازىر اينالاڭىزعا قاراڭىز، سپورت كەشەندەرى مەن دەنە شىنىقتىرۋ زالدارى، فۋتبول الاڭدارى كۇرت كوبەيگەنىن اڭعاراسىز.

ال، بوكس جانكۇيەرى رەتىندە ايتايىن، ءوز باسىم الداعى قىركۇيەكتىڭ توعىزىندا «سارىارقا» ۆەلوترەگىندە وتەتىن قانات يسلامنىڭ جەكپە-جەگىن اسىعا كۇتىپ جۇرگەن جايىم بار. مۇنىڭ سىرتىندا ەحرو كورمەسى اياسىندا 1400-دەن استام مادەني جانە سپورتتىق ءىس-شارانىڭ وتۋىنە مينيستر ارىستانبەك مۇحامەديۇلى مۇرىندىق بولىپ وتىرعانىن ۇمىتپايىق.

-باكە، ونەر قايراتكەرى رەتىندە ءوز ءتول مينيسترلىگىڭىز تاراپىنان اتقارىلىپ جاتقان ىستەردەن تولىق حاباردار ەتكەنىڭىزگە راقمەت! جوعارىداعى سۇراعىمىزعا قايتادان ورالساق. سوندا، مينيستر ارىستانبەك مۇحامەديۇلىن بىلايعى جۇرت جازىقسىز جازعىرىپ ءجۇر دەپ ويلايسىز با؟ الدە، ارەكەڭ تىم تۇزى جەڭىل ادام با؟

-جوعارىدا مەنىڭ مىسالعا كەلتىرىپ وتىرعان جايلاردان ءوزىڭىز دە

اڭعارعان بولارسىز دەپ ويلايمىن. ءوز باسىم بىرەۋلەر ايتقان جەل سوزگە ەرمەيتىن اداممىن. نەشە جەردەن جامانداپ، جەرمەن جەكسەن ەتىپ جاتسا دا بەلگىلى ءبىر تۇلعا بولسىن، قاتارداعى قاراپايىم ادام بولسىن، ونىڭ ءىس-ارەكەتىنە قاراپ، ءجىتى تانىپ قانا ءوز باعامدى بەرەتىن اداممىن. «وتىرىك ورگە باسپايدى» دەگەن حالىق دانالىعىنا سۇيەنىپ، ءوزىم كوز جەتكىزبەگەن نارسەگە ەش قاشان سەنبەيمىن.

مەنىڭ ويىمشا، ارىستانبەكتىڭ ۇيىمداستىرۋ قابىلەتى مەن ءىس تاجىريبەسى مىعىم، ءوزى دە ەڭبەكقور ەلگەزەك جىگىت. قولىنان ءىس كەلەتىن جىگىتتەردى كەيدە ءبىز جۇندەي ءتۇتىپ جىبەرە جازداپ، كۇندەپ جۇرەتىن جامان ادەتىمىز بار. «كوپ ايتسا، كوندى. جۇرت ايتسا، بولدى» دەۋدەن اۋلاق بولۋىمىزدى  اباي اتامىز ەسكەرتىپ كەتكەن ەدى عوي. ول مينيستر بولا ما، جۇمىسكەر بولا ما، كىم بولسا ول بولسىن، ادام بالاسىن جازىقسىز جازعىرۋدان جامان نارسە جوق. وبال-ساۋاپ دەگەندى ۇمىتپاساق يگى ەدى.

ءار ادام جەكە ءبىر الەم. كەز كەلگەن تۇلعانىڭ بويىنان ءمىن ىزدەسەڭىز، مىندەتتى تۇردە بولماشى بىردەمە بولسا دا تاباسىز. سىناي بەرۋ، كىنا ىزدەۋ بارىنەن وڭاي دۇنيە عوي. سول سياقتى ءسىز نەشە جەردەن جاقسى ادام بولساڭىز دا، كورەالماۋشىلىق، كۇندەۋشىلىك دەگەن سۇراپىل پالە بار كەزدە جۇرتتىڭ بارىنە جاعۋىڭىز تاعى دا مۇمكىن ەمەس.

بۇل تۇرعىدان كەلگەندە، ارەكەڭنىڭ شىنايى ءىستىڭ ادامى ەكەنىن، قۋلىق-سۇمدىقتان الىستاۋ  ەكەنىن، اق كوڭىلدىگى، كەيدە ويداعىسىن ەش بۇكپەسىز ايتىپ قالاتىن ادال دا اڭعالدىعىنىڭ دا بار ەكەنىن  بايقاعانداي بولامىن. ونىڭ ءوزى دە تۇسىنگەن ادامعا سونشالىقتى جامان ءۇردىس ەمەس. ارىستانبەك تۋرالى ايتارىمنىڭ بار ەكەنىن ءسوز باسىندا مالىمدەگەندە مەن وسى تۇسقا ەرەكشە باسىمدىق بەرىپ وتىرعانىمدى ايتا كەتۋدى ءجون سانايمىن.

ءمىنسىز ادام بولمايدى. بىراق، بولماشى بىردەمەنى زورايتىپ، اراسىندا ونى وتىرىكپەن دە تۇزدىقتاپ، اركىمنىڭ سوڭىنا شام الىپ تۇسە بەرسەك، بىزگە وزگە جۇرت جاقسى ءمينيسترىن، ءتاۋىر ازاماتتارىن شەتتەن اكەلىپ بەرە مە؟ قازاقتا ءبىر تاماشا ءسوز بار عوي، «جاقسىنىڭ جاقسىلىعىن ايت، نۇرى تاسىسىن» دەگەن. ال، مەن شىنىن ايتقاندا، ارىستانبەكتىڭ بويىنان جاماندىقتىڭ، يتتىكتىڭ نىشانىن كورىپ تۇرعان جوقپىن. اكتەر رەتىندە ايتايىن، ءبىز  ادام تانيتىن جۇرتپىز. ادامنىڭ سىرتقى بەينەسىن عانا ەمەس، ىشكى الەمىن دە كورىپ، بىلە الامىز. بۇل بالكىم، كاسىبي ماماندىقتىڭ بىزگە بەرگەن سىيى شىعار.

ارەكەڭنىڭ تۇزى جەڭىل ادام ەكەنىن ءوزىڭىز دە دۇرىس اڭعارعان ەكەنسىز. ءيا، ومىردە نيەتى تازا بولا تۇرا كەيبىرەۋلەرگە ىسكەرلىگى مەن العىرلىعى، قابىلەتى مەن تياناقتىلىعى ءۇشىن دە جاقپاي قالا بەرەتىن، جازىقسىز بولا تۇرا ارتىنان ءسوز ەرەتىن تۇزى جەڭىل ادامدار بولادى. بىراق، قوعامعا ونداي جانداردىڭ تيگىزەر زيانى بولمايدى. تۇسىنگەن ادامعا ونداي جانداردىڭ ارام نيەتى بولا قويمايدى. كەرىسىنشە، «ىشىمدەگىنى تاپ» دەپ تىمىرايعان ادامداردان جانە ەكىجۇزدى سايقال پالەلەردەن  ساقتانۋىمىز  كەرەك شىعار.  

اڭگىمەلەسكەن:

قۋاندىق شاماحايۇلى،

«استانا مادەنيەتى» جۋرنالىنىڭ

باس رەداكتورى.

Abai.kz