وزبەك اعايىنداردا  جۇرت الدىندا ءان ايتقىسى كەلەتىن نەمەنسە بي بيلەگىسى كەلەتىن  ارتىستەر ليتسەنزيا ءۇشىن «وزبەككونتسەرتتىڭ»  ارنايى قۇرىلعان كەڭەسىنىڭ الدىندا جاندى داۋىسپەن ءان سالۋى، بي بيلەۋى  كەرەك ەكەن. بۇرىن ونەرپازدار ديسكتەرىن ءتيىستى ورگاندارعا وتكىزسە بولعانى، ەسەبى تۇگەل ەدى.

ەندى وزبەك انشىلەرى مەن بيشىلەرىنە  ساحنا، كوپشىلىك الدىندا عانا ەمەس،  كليپتەرىن عالامتورعا شىعارماشىلىق كەڭەستىڭ رۇقساتىنسىز (ليتسەنزياسىز) جاريالاۋعا تىيىم سالىنىپتى. "سول ارقىلى ءبىز ۇلتتىق ءداستۇردى ساقتاپ، ءوزىمىزدىڭ مەنتاليتەتكە قايشى كەلەتىن كليپتەردىڭ ينتەرنەتتە تاراۋىنا جول بەرمەيمىز", - دەپتى   «وزبەككونتسەرت» باسشىسى ابدۋكاححاروۆ.

ۇلتتىق داستۇرگە ساي ەمەس كليپتەردىڭ ءبارىن وزبەكتەر  ەفيردەن الىپ تاستاپتى.  وسى 11 شىلدەدە "وزبەككونتسەرت" بىرقاتار انشىلەردىڭ ليتسەنزياسىنىڭ كۇشىن جويعان.  ليتسەنزيا انشىلەرگە، بيشىلەرگە ءبىر جىلعا عانا بەرىلەدى.  قانداي دۇرىس شەشىم!

ال بىزدە شە.. يۋتۋبتى اشىپ قاراڭىزشى (تەگى  اشپاعانىڭىز دۇرىس). نەبىر ءدامى جوق، تاتۋى جوق  انسىماق كليپتەردەن  كوز  سۇرىنەدى. تۇتاستاي قازاق جۇرتى ءبارىن قويىپ ءان ايتۋعا كوشكەن بە دەيسىز.  اسىرەسە،  اركىم  ءتۇرلى تويلارىنداعى  ءاۋ دەگەننىڭ، قيساڭداعاندارىن بي كورىپ، سونىڭ ۇزىندىلەرىن سالىپ ءماز-مەيرام. ال «بي بيلەدىم» دەگەن  دورەكى دە انايى قيمىلداردىڭ سان ءتۇرىن كورىپ،  ۇيالۋدى قويىپ، بويىمىز ۇيرەنىپ بارادى. ول از بولعانداي، «توي-دۋمان» سياقتى  قازاقشا تەلەارنالار اشىلىپ، ەرىنبەگەننىڭ  نە دۇرىس داۋسى، نە دۇرىس ءسوزى جوق جابايى كليپتەرىن قاپتاتتى.  بايقاپ، بارلاساڭىز، كليپتەردىڭ دەنى وزگەدەن كوشىرمە.  بەينەكورىنىستەرى انادان-مىنادان، تۇرىك، ورىس، وزبەك، قىرعىزدان ۇرلاعاندار. ءارتىس-انشىلەرىمىزدىڭ، بيشىلەرىمىزدىڭ  كيىمىن قاراڭىز، تازا قازاققا ءتان ستيل، تالعام، تانىمعا ساي بىردەڭە تابا الاسىز با؟!  ەلىكتەۋ، بىراق ەلىكتەۋ ءتۇبى – ءوشۋ.

ال ەندى قازاق راديوسىندا سوراقىنىڭ كوكەسى بار. تۇسكە تامان راديونىڭ قۇلاعىن بۇراپ  اشىپ قويىپ كورىڭىز. تىڭدايتىنىڭىز - تىڭدارمانداردىڭ سۇراۋلارى بويىنشا تەگىن كونتسەرت (كونەرگەن ەسكى فورمات)... ءبىر عاجابى ءبارىنىڭ  سۇرايتىنى – قايرات نۇرتاستىڭ ورىنداۋىنداعى تۋعان كۇنگە ارنالعان ءان.  سىزگە وتىرىك، بىزگە شىن، قۇدايدىڭ قۇتتى كۇنى دەسە دە بولادى سول ءاندى اينالدىرعان ءبىر-ەكى ساعاتتىڭ ىشىندە سان رەت قايتالايدى. «اپىر-اۋ،  قازاق راديوسى دەگەن   بۇل ميللونداعان قازاقتىڭ  قۇلاعى  عوي» دەپ ەشبىرىنىڭ قاپەرىنە كىرىپ تە شىقپايدى «بۇگىن، بۇگىن، بۇگىن سەنىڭ تۋعان كۇنىڭ» دەگەن داۋىس ابدەن قۇلاقتى سارسىتتى. سونداي-اق، زاتتىبەكتىڭ «نەمەرەمە» دەگەن ءانى دە وسىنىڭ كەبىن كيگەن. راديوداعىلاردىڭ وسىنداي قىلىعىنان كەيىن جۇرتتىڭ  تالعامى دا وزگەردى. ەندى تىڭدارمان قاۋقارسىز، ءنارسىز، ەستى ءسوزى جوق اندەردى سۇرايتىن بولدى. تالعامنىڭ ءتۇرى «بۇگىن، بۇگىن، بۇگىن» بولىپ تۇر..

...تالعام دەگەننەن شىعادى، ءبىر دوسىم ۋاتساپبىمەن نەبىر سان ءتۇرلى جان-جانۋار، اڭ-قۇسپەن ءسۇيىسىپ، جالاسىپ، تاس-ءتۇيىن قۇشاقتاسقان ادامداردى سالىپ جىبەرىپتى.

 ج.بايقۋات

Abai.kz