قوستاناي –حالقىمىزدىڭ ىستىق ىقىلاسى مەن ءىلتيپاتىنا بولەنگەن تالاي-تالاي ازاماتتاردىڭ كىندىگى كەسىلگەن قاسيەتتى ولكە. سولاردىڭ ءبىرى عانا ەمەس، بىرەگەيى دە كورنەكتى اعارتۋشى، ۇلى ۇستاز، تالانتتى اقىن،ءتالىمدى جازۋشى ىبىراي التىنسارين اتامىز ەكەندىگىنە داۋ جوق. الايدا ءبىر وكىنىشتىسى، تۋعان جەرىمىزدىڭ داڭقتى ۇرپاعىنا دەگەن قۇرمەتىمىز ويداعىداي بولىپ وتىر دەپ ايتا الماس ەدىك. ونىڭ باياعىدا بوي كوتەرگەن ەسكەرتكىشى ابدەن توزعان، ءار جەرى شىتىناپ، مۇلدەم ەسكىرگەن. زامان تالابىنا دا ساي كەلمەيدى. بۇگىنگى كۇننىڭ رۋحىنا ساي جاڭادان ءبىر ءزاۋلىم ەسكەرتكىش تۇرعىزۋعا ەشكىمنىڭ دە موينى جار بەرەر ەمەس.

ال ەندى وسىنداعى ىبىراي التىنسارين اتىنداعى كەسەنەنىڭ جايىن ايتساق جانىمىز اۋىرادى. بۇگىندە ول دا ابدەن ازىپ-توزعان. قاڭعىباستاردىڭ مەكەندەيتىن ورنىنا اينالعان. كەيبىر داراقى جاستار وسىندا كەلىپ اقاڭدى سىمىرگەندى ۇناتاتىن كورىنەدى. ءوزى وبلىس ورتالىعىنىڭ ءدال ىرگەسىندە تۇرعاندىقتان يت پەن قۇس تا اۋەس. ولاي بولاتىن سەبەبى، ونىڭ ناقتى يەسى جوق. سوندىقتان دا ەشكىمنىڭ دا باسى اۋىرمايدى، بالتىرى دا سىزدامايدى. وبالى نە، بۇل جايدى ايتىپ، دابىل قاققان زيالى قاۋىمنىڭ بارماعان جەرى، اشپاعان ەسىگى جوق. الايدا، وسىندا وبلىستى باسقارۋعا كەلگەن ءوز ولكەمىزدىڭ تۇلەگى دە، نە بولماسا شەتتەن كەلگەنى دە بۇل ماسەلەگە ءتىپتى دە نازار اۋدارمادى. جۇرتشىلىقتىڭ دابىلىنا قۇلاق تا اسپادى.

وسىلايشا كەسەنە جوندەلىپ، حالىق يگىلىگىنە جارايدى-اۋ دەگەن ءۇمىتىمىز ۇزىلەر شاقتا، قۋانىشتى حابار ەستىدىك. كەسەنەنى تۇبىرىمەن قايتا جاڭعىرتۋ جۇمىستارى باستالىپ، ءتىپتى جاقىن ارادا اياقتالاتىن كورىنەدى. ول بىتكەن سوڭ بۇل كەسەنە ارشىعان جۇمىرتقاداي ءاپ-ادەمى بولاتىن ءتۇرى بار. جوندەۋ-سمەتالىق قۇجاتتى دايىنداۋعا عانا 4,5 ميلليون، ال ونى جۇزەگە اسىرۋعا 60 ميلليوننان استام تەڭگە ءبولىنىپتى. كەلەشەكتە بۇل كەسەنەنى ءوز مەنشىگىنە الاتىن قوجايىن دا تابىلىپتى. بۇل ەسكەرتكىشتىڭ كوركىن اشۋ ءۇشىن ماڭعىستاۋدان ءمارمار تاس الدىرىلىپ، ساۋلەتىنە ساۋلەت قوسۋعا بارىن سالىپ جاتقان جايى بار.

بوركىمىزدى اسپانعا اتىپ قۋاندىق. وسىلايشا ىبىكەڭنىڭ ارۋاعى ريزا بولاتىن يگىلىكتى ءىستىڭ اتقارىلعانىنىڭ كۋاسى بولىپ، كوڭىلىمىز ءبىر جايلانىپ قالدى. بيلىك باسىنداعىلار حالىققا ءبىر تابان بولسا دا جاقىنداي تۇسكەن ەكەن دەپ ءىشىمىز دە جىلىعان.

الايدا، تالاي جىلدان بەرى كۇتىم كورمەگەن بۇل كەسەنەنىڭ اياق استىنان جاڭارتىلىپ، جاڭعىرتىلىپ سالا بەرۋىنىڭ وزىندىك سىرى بار ەكەن. ەلىمىزدە ماڭىزدى جەرلەرگە اپاراتىن تۋريستىك مارشرۋتتى قامتيتىن  «قازاقستاننىڭ ساكرالدى گەوگرافياسى» اتتى جوبا قابىلدانىپتى. وعان وبلىسىمىزدان وسى كەسەنەسىمەن قاتار كەيكى باتىردىڭ كەسەنەسى، امانكەلدى يمانوۆتىڭ زيراتىنىڭ باسىنداعى ەسكەرتكىشى، تورعايداعى گەوگليف ءتارىزدى ەسكەرتكىشتەرمەن قاتار وسى التىنسارين كەسەنەسى دە ەنگىزىلەتىن كورىنەدى. مىنەكەي، كوپتەن بەرى قيسىنى كەلمەي جۇرگەن بۇل شارۋانىڭ ىڭ-شىڭسىز ءارى جەدەل ءبىتۋىنىڭ ءبىر سىرى وسىندا جاتقان سەكىلدى.

قالاي بولعاندا دا قوستاناي جۇرتى ىبىراي اتاسىنىڭ كەسەنەسىنىڭ قايتا تۇلەپ، جاڭادان اشىلۋىن تاعاتسىزدانا كۇتىپ ءجۇر.

كەسەنەدەگى جوندەۋ جۇمىستارىنان كورىنىس

جايبەرگەن بولاتوۆ، قوستاناي

Abai.kz