ەكسپو-2017 كورمەسى اياسىندا ونەر كورسەتكەن سەنەگالدىق «سافاري» توبى استانالىق كورەرمەندى ءتانتى ەتتى.

ۇلتتىق مادەني ءىس-شارالار اياسىندا ونەر كورسەتكەن سەنەگال ونەرپازدارى استانالىق كورەرمەنگە اننەن سىباعا اساتىپ، ۇلتتىق اسپاپتاردا ويناپ، بي بيلەپ بەردى.

ەكسپو-2017 اياسىندا سەنەگالدىڭ مادەني كۇنى ءوتىپ، ونىڭ اشىلۋىندا ءسوز العان سەكتسيا كوميسسارى جوپ مالىك مىرزا بالامالى ەنەرگيا كوزدەرىن تابۋدا سەنەگالدىڭ جەتكەن جەتىستىكتەرى تۋرالى كەڭىرەك ايتىپ بەردى.

مالىك مىرزانىڭ ايتۋىنشا، سەنەگالدىڭ قۇرعاق كليماتى كۇن جانە جەل ەنەرگياسىن وندىرۋگە ابدەن قولايلى ەكەن.

«ءبىز بيىلعى جىلدىڭ سوڭىنا دەيىن ەلەكترەنەرگياسىنىڭ 20%-ىن وسى جولمەن وندىرگەلى وتىرمىز.  مەملەكەتىمىز بۇل كورسەتكىشتى جىل سايىن ەسەلەي بەرمەك»،-دەيدى كوميسسار.

قازىرگى تاڭدا سەنەگالدا 72 مۆت قۋاتتى ەنەرگيا وندىرەتىن ءۇش بىردەي كۇن  ەلەكترستانتسياسى بار ەكەن. سونداي-اق، دۇنيەجۇزىلىك بانك نەسيەسىنىڭ كومەگىمەن بۇل ستانتسيالاردىڭ سانىن ارتتىرۋ، جيىنتىعى 35 مۆت قۋات ءوندىرۋ جوسپارلانعان.

راسىندا، گەوگرافيالىق ورنالاسۋى جاعىنان قاراعاندا سەنەگالدىڭ باتىس بولىگى اتلانت مۇحيتىنىڭ جاعاسىندا ورنالاسقاندىقتان، وندا جەل ەنەرگياسىن الۋعا مۇمكىندىك مول.

سەنەگال پاۆيلونىنىڭ كوميسسارى جوپ مالىك مىرزانىڭ ايتۋىنشا، باتىس سەنەگالدا قازىر ەكى بىردەي جەل پاركىنىڭ قۇرىلىسى ءجۇرىپ جاتىر. ونىڭ ءبىرى – قۋاتتىلىعى 150 مۆت-نى قۇرايتىن «تەبا ن'دەي» جەل پاركى. بۇل باتىس افريكاداعى ەڭ ۇلكەن جەل پاركى بولماق.

قازىردىڭ وزىندە سەنەگالدى قاق ءبولىپ اعىپ جاتقان سەنەگال وزەنىنىڭ بويىندا سۋ ەلەكترستانتسياسى ورنالاسقان. ول بۇكىل رەسپۋبليكاداعى ەلەكترەنەرگياسىنىڭ  3/1-ءىن ءوندىرىپ وتىر ەكەن. بۇنى دا مالىك مىرزا ايتىپ بەردى.

ەستەرىڭىزگە سالا كەتەيىك، قازاقستان ۇكىمەتى 2020-جىلعا دەيىن  جاڭارتىلعان ەنەرگيا كوزدەرىنىڭ قۋاتىن قولدانىستاعى ەنەرگيا كولەمىنىڭ 3 پايىزىنا دەيىن جەتكىزۋدى جوسپارلاعان. «جاسىل ەكونوميكانى» دامىتۋ تۋرالى كونتسەپتسيادا بەكىتىلىپ، ماقۇلدانعان جوبا بۇل.

قازاقستان اتىنان ءسوز العان قر مادەنيەت جانە سپورت مينيسترلىگىنە قارايتىن يندۋستريا جانە تۋريزم كوميتەتىنىڭ ءتورايىمى ماينۇر مىرزاليموۆا، ەكسپو كورمەسى تەك تەحنولوگيالىقى جاڭالىقتارعا عانا قول جەتكىزىپ قويماي، مادەني-رۋحاني بايلانىستى ارتتىرۋعا دا ۇلكەن مۇمكىندىك اشاتىنىن ايتتى.

سونىمەن قاتار، قازاقستاننىڭ اتالعان حالىقارالىق كورمەنى وتكىزۋى – بالامالى ەنەرگيا كوزدەرىن تابۋعا جانە دامىتۋعا باستاعان ۇلكەن قادامى ەكەنىن ايتتى.

ايتپاقشى، سەنەگال استاناسى داكار ءدۇيىم جۇرتقا ەڭ تانىمال قالالاردىڭ ءبىرى. ويتكەنى وندا بۇكىلالەمدىك پاريج-داكار راللي-جارىسىنىڭ ءتۇيىنى قويىلادى.

Abai.kz