ەلباسىنىڭ تىكەلەي باستاماسىمەن قولعا الىنعان مەملەكەتتىك باعدارلامالاردىڭ ماڭىزى وراسان زور. سوندىقتان دا ولاردىڭ جۇزەگە اسۋ بارىسى ەلىمىزدەگى باستى ساياسي كۇش «نۇر وتان» پارتياسىنىڭ ءجىتى قاداعالاۋىندا. وسىعان وراي بۇگىن پارتيا توراعاسىنىڭ ءبىرىنشى ورىنباسارى مۇحتار قۇل-مۇحاممەد قاراعاندى وبلىسىندا بولىپ، يندۋستريالدى-يننوۆاتسيالىق دامۋ باعدارلاماسى مەن «بيزنەستىڭ جول كارتاسى-2020» مەملەكەتتىك باعدارلاماسى اياسىندا اتقارىلعان جۇمىستارمەن تانىستى.

الدىمەن مۇحتار قۇل-مۇحاممەد مامانداندىرىلعان كولىك-لوگيستيكالىق ورتالىقتىڭ اۋماعىندا ورنالاسقان «ريگەر» جشس-نا باردى. بۇل جەردە ءدارى-دارمەكتەر مەن مەديتسينالىق زاتتار ساقتالادى. كەشەن اۆستريا مەن رەسەيدەن اكەلىنگەن زاماناۋي قوندىرعىلارمەن جابدىقتالعان. سونداي-اق، جۇمىس ۇدەرىسىنىڭ تيىمدىلىگىن ارتتىرۋ ءۇشىن اۆتوماتتاندىرىلعان باسقارۋ جۇيەسى ەنگىزىلگەن. جوبانىڭ جالپى قۇنى – 1 ملرد. 372 ملن. تەڭگە.

سونىمەن قاتار، پارتيا توراعاسىنىڭ ءبىرىنشى ورىنباسارى جاڭادان ىسكە قوسىلعان ەسكىرگەن كولىكتەردى جويۋ زاۋىتىندا بولدى. «سارىارقا» ارنايى ەكونوميكالىق ايماعىندا ورنالاسقان زاۋىتتىڭ ورتالىق ازيادا ەشقانداي بالاماسى جوق. بۇل جەردە ءبىر جىلدا 50 مىڭ ەسكى ءاۆتوموبيلدى قايتا وندەۋگە بولادى. كاسىپورىندا اۆتوقالدىقتاردان پەشتىك وتىندار، شويىن، بولات، اليۋميني، ءتۇرلى-ءتۇستى مەتالل قۇيمالارى جانە رەزەڭكە قيىندىلارى دايىندالادى.

قاراعاندى وڭىرىندە اشىلعان جاڭا كاسىپورىنداردىڭ ماڭىزى مەن تيىمدىلىگىن جوعارى باعالاعان مۇحتار قۇل-مۇحاممەد: «ەلباسىمىز بۇكىل ەلىمىزگە، ءاربىر قازاقستاندىققا قاجەت جاعدايدىڭ ءبارىن جاسادى. «قازاقستان-2050» ستراتەگياسى قابىلداندى، «100 ناقتى قادام» ۇلت جوسپارى بەكىتىلدى، ولاردى جۇزەگە اسىرۋ ءۇشىن جىل سايىن تريلليونداعان تەڭگە قاراجات بولىنۋدە. ەندى بىزگە تەك بىلەك سىبانىپ جۇمىس ىستەۋ عانا قالدى. بۇگىن مەن قاراعاندى وبلىسىندا ەلباسى تاپسىرمالارىنىڭ تابىستى ورىندالعانىنىڭ كۋاسى بولدىم», – دەدى.

ودان بولەك، مۇحتار قۇل-مۇحاممەد كەنشىلەر وڭىرىندەگى تاعى ءبىر زاماناۋي كاسىپورىن – «يزوپليۋس ورتالىق ازيا» جشس-عا باردى. مۇندا قۇبىرلاردى يزولياتسيالاۋ جۇمىستارى جۇرگىزىلەدى. زاۋىتتىڭ باستى ەرەكشەلىگى ءونىم ساپاسىنىڭ الەمدىك ستاندارتتارعا تولىعىمەن ساي بولۋىندا. سونداي-اق، ءوندىرىس وشاعى «جاسىل تەحنولوگياعا» نەگىزدەلگەن. سونىڭ ناتيجەسىندە بۇل جەردەن اۋاعا زياندى قالدىقتار تارالمايدى.

راسىمەن پرەزيدەنتتىك باعدارلامالار ارقىلى قازاقستاننىڭ بارلىق وڭىرىندە ءوندىرىس سالاسىنىڭ قارقىنى ايتارلىقتاي كۇشەيدى. سونىڭ ناتيجەسىندە حالىقتىڭ جاعدايى جاقسارىپ، ءومىر ءسۇرۋ ساپاسى ارتتى. دانىشپان ابايدىڭ حالىقتى ەرىنشەكتىكتەن، جالقاۋلىقتان اۋلاق بولىپ، ادال ەڭبەكپەن مال تابۋعا شاقىرۋى دا قازاق دالاسىندا ءدال بۇگىنگىدەي جارقىن ءومىردىڭ ورناۋىن كوكسەگەنىنەن ەكەنىن انىق. سوندىقتان ەلگە ەتەنە «نۇر وتان» پارتياسىنىڭ ەلباسى تاپسىرمالارىنىڭ ورىندالۋىن ءوز باقىلاۋىنا الۋىن زاڭدىلىق دەپ بىلەمىز.

ءىلياس اقباي

Abai.kz