قازاقستان كەشەگى سوۆەت وداعىنىڭ كەزىندە ءارتۇرلى ۇلت وكىلدەرى تۇراتىن «حالىقتار لابوراتورياسى» اتانعان ەدى. ەكىنشى سوزبەن ايتقاندا بۇل – ءبىر بىرىمەن تەگى، ءناسىلى، ءتىلى مەن ءدىلى تۋىسپايتىن دياسپورالاردان ءدۇبارا ۇلت جاساۋدىڭ زەرتحاناسى دەگەندى بىلدىرەتىن. ول كەزدە جەرگىلىكتى ۇلت – قازاقتىڭ بار جوعى، ونىڭ نارازىلىعى، قارسىلىعى ءتىپتى ەسەپكە الىنبايتىن دا ەدى. كسرو كۇيرەپ، قازاقستان تاۋەلسىزدىگىن جاريا ەتكەن تۇستا الەمنىڭ قۋاياق، سىڭارەزۋ ساياساتكەرلەرى قازاقستاندا ۇلكەن اپات بولادى دەپ كۇتتى. الايدا، ەلباسىمىز، ۇلت كوشباسشىسى نۇرسۇلتان نازارباەۆ «حالىقتار لابوراتورياسىن» قازاقستاننىڭ جارقىن بولاشاعى ءۇشىن ءساتتى پايدالانا ءبىلدى. بۇل فەنومەندى ۇلكەن ساياساتتاعى تۇلعالار «نازارباەۆتىڭ نوۋ-حاۋى» دەپ اتاپ ءجۇر. قازاقشالاساق، «نازارباەۆتىڭ جاسامپاز ءىسى» بولىپ شىعادى. ءيا، بۇگىنگى قازاقستان 130-دان استام ۇلت وكىلدەرى مەكەن ەتىپ وتىرعان ۇلتتار دوستىعىنىڭ ۇيتقىسى ءام ۇياسى. ولار وسى كۇنى ءبىر ماقساتقا، شىن مانىندە ءبىر ەل بولۋعا بەت العان. ءبىزدىڭ كۇش-قۋاتىمىز دا، مىنە، وسى كەرەمەتتە بولسا كەرەك.

قازىر اقپارات قۇرالدارىندا، تەلەديدار ارنالارىندا قازاقستانداعى حالىقتار دوستىعىنا بايلانىستى اڭگىمە، سۇحباتتار، كورسەتىلىمدەر ءجيى بەرىلە باستادى. ويتكەنى، ونىڭ وزىندىك سىرى بار. قازاق ەجەلدەن باۋىرمال بولعاندىقتان ۇلت-ناسىلىنە قاراماي، جالپى، ادامزاتتى جاقسى كورەدى. ۇلى ابايدىڭ ادامزاتتى ءسۇي دەيتىن قاعيداسى بار ەمەس پە. ادامدار اراسىنداعى سۇيىسپەنشىلىك پەن ماحابباتتى قاسيەتتى ءدىنىمىز ەجەلدەن ۋاعىزداپ كەلەدى. بويىندا بۇرىننان يسلامدىق رۋح بار ۇلت ىنتىماق پەن دوستىقتى قادىرلەيدى. كەڭەس ۇكىمەتى قۇندىلىقتارىنىڭ ءبىرى ۇلتارالىق دوستىقتى، ىنتىماقتى العاش ورناعان كۇننەن باستاپ باستى ۇستانىم ەتتى. سونىڭ ناتيجەسىندە كسرو-دا ۇلتتار دوستىعى قالىپتاسىپ، ينتەرناتسيونالدىق تاربيە بارىنشا جولعا قويىلدى. قازاقستانداعى حالىقتار دوستىعىنىڭ ورنىعۋى كەڭەستىك ساياساتتان باستاۋ الىپ، جالعاسقانىن ۇمىتپاۋىمىز كەرەك. «قازاقستان ءجۇز ۇلتتىڭ وتانى» دەگەن قاعيدانى ءبىز جۇرەگىمىزگە قۇيىپ وسكەن ۇرپاقپىز.

قازىرگى قازاقستان حالىقتار اسسامبلەياسى تۋرالى ايتقاندا ونىڭ كەڭەستىك داۋىردەگى تاريحىن ەستە ۇستاۋىمىز كەرەك. تاۋەلسىزدىكتەن كەيىن ول وزگەشە سيپات الدى. بۇل كۇندە اسسامبلەيا اتقارىپ وتىرعان جۇمىس سان الۋان. ءوزىنىڭ العا قويعان ماقساتتى جوبالارى، شارالارى بار. ۇلتتار دوستىعىنىڭ شىنايى ۇيىتقىسى، رۋحاني كۇشى بولعان اسسامبلەيانىڭ 20 جىلدىق مەرەيتويى وزىمىزدە عانا ەمەس، ونەگە-ۇلگى رەتىندە كەيبىر شەتەلدەردە دە اتالىپ وتسە جامان بولماس ەدى. ويتكەنى، ۇلتارالىق، دىنارالىق ارازدىق كەيبىر مەملەكەتتەردە قانتوگىسكە اكەلۋدە. دوستىق وتانى قازاقستان گۇلدەنە بەرسىن.

بەكەن شەرۋباەۆ،

پروفەسسور

Abai.kz