وزبەكستان پرەزيدەنتى شاۆكات ميرزيوەۆ "ۆاليۋتا ساياساتىن ليبەراليزاتسيالاۋدىڭ العاشقى قادامدارى تۋرالى" قاۋلىعا قول قويدى. قۇجات بويىنشا، ۇلتتىق ۆاليۋتا باعامىن انىقتاۋدا نارىق مەحانيزمدەرى عانا ەسكەرىلەدى.

وزبەكستاننىڭ رەزيدەنت جەكە تۇلعالارى شەتەل ۆاليۋتاسىن ايىرباس پۋنكتەرىندە ساتىپ، كوممەرتسيالىق بانكتەردىڭ كونۆەرسيالىق بولىمدەرىنەن ەشقانداي كەدەرگىسىز ساتىپ الا الادى.

بۇل قاۋلىعا دەيىن وزبەكستاندا ءۇش ۆاليۋتا باعامى بار ەدى: رەسمي، بيرجالىق جانە نارىقتىق. قاراپايىم ادامدارعا ارنالعان "قارا باعام" استىرتىن ۆاليۋتا نارىعىندا قالىپتاسادى. "قارا بازار" باعامى مەن ورتالىق بانك بەلگىلەگەن باعامنىڭ ايىرماشىلىعى ەكى ەسەگە جۋىقتايدى.

"قارا بازار" 90-جىلداردىڭ باسىندا قالىپتاستى. بيلىك ولاردى ۇستاۋمەن شۇعىلداندى.

ۆاليۋتا ساياساتىن ليبەريزاتسيالاۋ - حالىق كوپتەن كۇتىپ وتىرعان ەلەۋلى وزگەرىس.

Abai.kz