ءبىز وتكەندە Abai.kz سايتىنا وسى ماسەلەنى قوزعاپ، ماقالا جازىپ، رۋدنىيداعى قالالىق ءماسليحات دەپتۋتاتى يۋليا كارالاش دەگەن سىلقىمنىڭ جاپ-جاس قىزداردى شەتەلدەردە جالاقىسى مول جۇمىسقا جىبەرەمىن دەپ، قۇقىق قورعاۋ ورگاندارىنىڭ قۇرىعىنا ءتۇسىپ قالعاندىعىن جازعانبىز. ەندى ءبىز دە، وقىرماندار دا مۇنىڭ ارتى نە بولىر ەكەن دەپ تاعاتسىزدانا كۇتىپ وتىرعاندىعى ايقىن. ازىرگە ەشتەڭەمەن دە قۋاندىرا المايمىز. قايتا كۇن وتكەن سايىن كۇدىگىمىز مولايىپ كەلەدى.

ال يۋليامىز دا شالت قيمىلدىڭ ادامى ەكەن. جامان اتى ءباسپاسوز بەتىنە شىعار-شىقپاستان جەدەل قيمىلداپ، رۋدنىي قالالىق ءماسليحاتىنا ءوز دەپۋتاتتىعىن مەرزىمىنەن بۇرىن توقتاتۋ تۋرالى ءوتىنىش جازدى دا جىبەردى. ءماسليحاتتىڭ جىلدامدىعى دا ادام سۇيسىنەرلىك ەكەن. ءوتىنىش تۇسكەن كۇننەن كەيىن ءۇش-اق كۇننىڭ ىشىندە اپۇل-عۇپىل كەزەكتەن تىس سەسسيا اشىپ جىبەرىپ، يۋليامىزدىڭ ءوتىنىشىن قۋانا-قۋانا قاناعاتتاندىرىپ جىبەردى. مويىندارىنان ءبىر اۋىر جۇك تۇسكەندەي بولدى-اۋ، ءسىرا.

- مۇنداي جاعداي بىزگە دە وڭاي ءتيىپ تۇرعان جوق، - دەپ وزدەرىنشە اقتالىپ باعادى وسى رۋدنىي قالالىق ءماسليحاتتىڭ حاتشىسى ۆالەري لوششينين.

مۇنى ەستىگەندە ەسىمىزدەن تانا جازدادىق. دەپۋتتاردىڭ بارلىعى دا  جەرگە قاراعانداي كۇيدە. مۇنىڭ ءوزى ءبىزدىڭ بارىمىزگە دە جاعىلعان جانە جاقىن ارادا كەتە قويماس كۇيە بولدى.

حاتشىنىڭ سوزىنە كۇماندانا قويۋ ارتىق بولار الايدا وسى نەبارى 25 جاستاعى، بۇرىن اتى-ءجونىن ەشكىم دە بىلمەيتىن، ەشۋاقىتتا حالىققا پايدالى ىسىمەن كوزگە ىلىنبەگەن مۇلدەم بەيتانىس جاننىڭ اياق استىنان بىلتىر دەپۋتات بولىپ سايلانىپ كەتكەندىگىنە مۇنداعىلاردىڭ بارلىعى دا اڭ-تاڭ. حالىقتىڭ نارازىلىعى كۇننەن-كۇنگە كۇشەيىپ كەلەدى. بىرەۋلەر وسى ءبىر كەلەڭسىز ىسكە وبلىستىق ءماسليحات تاراپىنان ەشبىر مالىمدەمە جاسالماي وتىرعاندىعىنا مۇلدەم تۇسىنبەيدى. ال سول وبلىستىق ءماسليحاتتىڭ حاتشىسى سايلاۋبەك ەسجانوۆ مىرزا دا وبلىستاعى دەپۋتاتتىق كورپۋستا ەلەڭ ەتەرلىك ەشتەڭە بولماعانداي تىم ءۇنسىز كۇيدە.

ال ەندى الگى جەڭگەيتامىز بەلدى مۇشەسى بولىپ تابىلاتىن «نۇر وتان» پارتياسىنىڭ وبلىستىق فيليالى دا مۇنان مۇلدەم حابارسىز سەكىلدى قالىپ تانىتىپ وتىر. ونىڭ توراعاسى، وبلىس اكىمى ارحيمەد مۇحامبەتوۆتىڭ ءسىرا مۇنداي ۇساق-تۇيەك ىستەرگە قولى تيمەي جاتقان بولار. نەمەسە ودان مۇلدەم حابارسىز وتىرعانداي سەزىنەسىز. ايتپەسە ءوزى باسشىلىق جاسايتىن پارتياسىنىڭ ءبىر مۇشەسىنىڭ جەڭگەتايلىق سەكىلدى بىلىقتارىمەن بۇكىل ەلىمىزدى شۋلاتىپ جاتقاندا وسى پارتيا مۇشەسىنە ءتيىستى جازا بەرۋدى ءوز ورىنباسارى جاڭاباي ىسمايىلوۆ مىرزاعا قاتاڭ تاپسىرماۋى دا ءارتۇرلى ويعا جەتەلەيدى. ويتپەگەن جاعدايدا اتالمىش پارتيانىڭ رۋدنىيداعى فيليالى ءوز بەتىنشە ەشتەڭە تىندىراتىن ءتۇرى بايقالمايدى.

مۇنى از دەسەڭىز ەندى كەزىندە وزدەرى بۇل جايدى ايداي الەمگە جاريا قىلعان وبلىستىق ىشكى ىستەر دەپارتامەنتى بۇگىندەرى ەشتەڭە بولماعانداي تىم ءۇن-ءتۇنسىز وتىرعاندىعىن قالاي تۇسىندىك؟

جايبەرگەن بولاتوۆ، قوستاناي

Abai.kz