داۋدىڭ باسى دايابايدىڭ كوك سىيىرى دەمەكشى، قىرعىزدىڭ ءتورتىنشى پرەزيدەنتى الماسبەك اتامباەۆتى ازىناتا سويلەتكەن ماسەلەگە قاتىستى قازاقستان پرەزيدەنتى نۇرسۇلتان نازارباەۆ جاۋاپ بەردى. قىسقا، ءارى نۇسقا جاۋاپ.

الاتاۋدىڭ ارعى بەتىندە جاتقان قىرعىز جۇرتىنىڭ ساياسي ەليتاسى قازاق پرەزيدەنتىنە ايىپ تاعىپ، وپپوزيتسيالىق ساياساتكەردى قولدادى، قىرعىزستاننىڭ ىشكى ساياساتىنا قول سۇقتى دەگەن بولاتىن.

باتىستىق باق ءوز سارىنىنا سالىپ، ساۋەگەيلىك جاساپ، نازارباەۆ پەن اتامباەۆتىڭ اراسى سۋىعانىن ايتتى. ەكى تاراپ تا شاما-شارقىنشا ءسوز سايىستىردى، پىكىر تالاستىردى. ەندى سونىڭ نۇكتەسىن قازاقستان پرەزيدەنتى قويدى.

"مۇنىڭ ءبارى شىلعي وتىرىك!" - دەدى پرەزيدەنت نازارباەۆ. ول بۇل ءسوزدى سوچيدەگى رەسەي پرەزيدەنتىنىڭ رەزيدەنتسياسىنا كىرىپ بارا جاتىپ ايتتى.

ەستەرىڭىزگە سالا كەتەيىك، 12-قازان كۇنى قازاق-ورىس پرەزيدەنتتەرى كەزدەسىپ، ءبىراز ماسەلەنى تالقىلاعان ەدى. ونان سوڭ، نەمىس بيزنەسمەندەرىمەن دە كەزدەسۋلەر بولدى.

ال وسىدان ءسال ەرتەرەكتە قىرعىزستان ءسىمى قازاقستانعا نارازىلىق ءبىلدىرىپ، نوتا جىبەردى. قىرعىز پرەزيدەنتتىگىنە ۇمىتكەر وپپوزيتسيا ساياساتكەرى ومىربەك بابانوۆپەن كەزدەسكەن پرەزيدەنت نازارباەۆقا نارازى بولعان ەدى.

استانا وعان رەسمي جاۋاپ بەرىپ، پرەزيدەنت نازارباەۆتىڭ ەكىنشى ءبىر كانديدات ساۋرانباي جيەنبەكوۆپەن دە كەزدەسكەنىن ەستەرىنە سالدى.

جيەنبەكوۆ اتامباەۆ پارتياسىنىڭ ادامى، سوتسيال-دەموكراتتار اتىنان دوداعا تۇسكەن ەكس-پرەمەر. ول سايلاۋدا بابانوۆتىڭ باستى قارسىلاسى ءام قىرعىز تاعىنان ءۇمىتى ۇلكەن ەكەۋدىڭ ءبىرى.

قىرعىزداعى سايلاۋ 15-قازان كۇنى وتەدى.

Abai.kz