يساكوۆ: قازاقستان شەكارا ماسەلەسىن شەشەدى دەپ ۇمىتتەنەمىز
قىرعىزستان پرەمەر-ءمينيسترى ساپار يساكوۆ 25 قازاندا ەرەۆانداعى ەۋرازيا ۇكىمەتارالىق كەڭەسىنىڭ وتىرىسىندا قازاق-قىرعىز شەكاراسىنداعى جاعدايعا قاتىستى پىكىرىن ايتتى.
- ءبىز پرەمەر-مينيسترلەر دەڭگەيىندە بۇل ماسەلەنى شەشۋ ءۇشىن كەلىسسوز جۇرگىزىپ جاتىرمىز. ەكى ەل شەكاراسىنداعى كەيبىر كەدەرگىلەر جويىلدى. ول ءۇشىن قازاقستانعا العىس ايتامىز. بىراق بۇل ماسەلە تۋىنداماۋى كەرەك ەدى. سەبەبى ەكى ەل اراسىنداعى كەلىسىمگە ساي جۇك تيەگەن قىرعىز كولىكتەرى شەكارادا تۇرىپ قالماي كەدەرگىسىز ءوتۋى ءتيىس. ەۋرازيا ەكونوميكا وداعىنىڭ پرينتسيپتەرى بويىنشا تاۋار، كاپيتال، قىزمەت پەن جۇمىس كۇشىنىڭ قوزعالىسىنا كەدەرگى بولماۋى كەرەك. قازاقستان تاراپى شەكاراداعى ماسەلەنى تولىق شەشەدى دەپ ۇمىتتەنەمىز،- دەدى يساكوۆ.
ەرەۆانداعى وتىرىستا قازاقستان پرەمەر-ءمينيسترى باقىتجان ساعىنتاەۆتىڭ ساپار يساكوۆپەن كەزدەسكەنى حابارلاندى.
10 قازاننان باستاپ ەكى ەل شەكاراسىندا تەكسەرۋ كۇشەيتىلىپ، قازاقستانعا وتەتىن ادامدار مەن كولىكتەر كەزەگى پايدا بولعان.
18 قازاندا استانادا ەكى ەل پرەمەر-مينيسترلەرى كەلىسسوزدەر وتكىزىپ، جولاۋشى كولىكتەرى مەن جۇگى بار ادامداردى شەكارادان وتكىزۋدى وڭايلاتۋ تۋرالى ۋاعدالاسقان. بۇل كەلىسسوزدەن كەيىن تەكسەرۋ بەكەتىندە كەزەك كۇتكەن ادامدار سانى ازايعان ەدى. ال 25 قازاندا قىرعىزستان شەكارا قىزمەتى "اق-تىلەك" شەكارا بەكەتىندە بەس جۇزگە جۋىق جۇك كولىگى تۇرعانىن حابارلادى.
Abai.kz
