«ءبىلىمدى – وقىعانىنا، كورگەنسىز – تاجىريبەسىنە سۇيەنەدى».

تسيتسەرون.

ەڭ الدىمەن ەلدىك، ۇلتتىق رۋحتى، وي-سانا مەن نامىستى بۇرىن-سوڭدى بولىپ كورمەگەن دارەجەدە كوككە اسقاقتاتپايىنشا رۋحاني جاڭعىرۋ مەن كەمەلدىكپەن جاڭارۋدىڭ ۇتقىر ءساتى تۇسپەيدى.

قازاق «ەشتەن كەش جاقسى» دەمەكشى، وسىعان وراي 2017 جىلى قوعامدىق تالقىلاۋعا تۇسكەن ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» اتتى ماقالاسى ءبىز كوپتەن بەرى كوتەرىپ كەلە جاتقان ۇلتتىق وزەكتى ماسەلەلەردىڭ تۇيىندەرىن تەزىرەك شەشسە، ۇلتقا سەرىپپەدەي سەرپىلىس پەن سىلكىنىس اكەلسە، نۇر ۇستىنە نۇر بولاتىنى ءسوزسىز.  بۇل ءۇشىن ەل بولىپ، ورتاق ۇلتتىق ىسكە ءبىر كىسىدەي جۇمىلا ءبىلۋىمىز كەرەك. ەندى وسىناۋ ماقالاداعى باعداردى قوعام بولىپ تالقىلاپ، ودان جۋىق اراداعى ونجىلدىقتاردا نە ىستەۋىمىز كەرەكتىگى تۋرالى ناقتى باعدارلامالار قۇرۋ، ۇتقىر باعىت-باعدارىمىزدى جۇيەلەۋ ءسىز بەن ءبىزدىڭ، ياعني، قوعامنىڭ ەڭ ايتۋلى مىندەتى.

ءبىز، قازاق ەلى دامىلسىز دامىعان، كەمەلدىك پەن وركەنيەتكە جەتكەن مەملەكەت قاتارىندا بولعىمىز كە­لەتىنى ءسوزسىز. بۇل زاڭدى قۇبىلىس. الايدا قوعامدى، مەملەكەتتى دامىتاتىن ۇلى كۇش – ادام. بۇل تەڭدەسى جوق ەڭ باستى التىن قور. بۇل ەڭ نەگىزگى ماڭگى بايلىق – وسى ادام. ولاي بولسا، ءار ادام، قوعامدىق قۇرىلىم ەڭ الدىمەن نەن­دەي اسا قاتەرلى دەرت پەن كەساپاتتان تەزىرەك ارىلۋعا ءتيىسپىز؟

1. قۇلدىق سانادان،

2. پاراقورلىقتان،

3. جەمقورلىقتان،

4. جاعىمپازدىقتان،

5. ساتىلىمپازدىقتان.

ول ءۇشىن نە كەرەك؟

*«ۇلتتىق جاڭعىرۋ» يماني وقۋ – اعارتۋشىلىق باعىتى وزىق دارەجەدە بولۋى كەرەك،

*«ۇلتتىق قۇندىلىقتار مەن اسىلدىقتاردى قۇنتتاۋ» باعىتى كەرەك،

*ۇلتتىق – ءونىم، ۇلتتىق برەندتى قالىپتاستىرۋ كەرەك،

*جاڭعىرعان باق – سانا جاڭعىرۋىنىڭ قوزعاۋشى ۇلكەن كۇشىن جاساقتاۋ كەرەك،

*كونسترۋكتيۆتى سىن – ۇلتتىق دامۋ مەن كەمەلدەنۋدىڭ ماڭگى كەپىلى ەكەنىن كەمەل كىسىلىكپەن مويىنداپ، قولداۋ مەن قورعاۋدىڭ التىن باعىت-باعدارىن تەزىرەك جاساقتاۋ كەرەك، 

*ۇلتتىق جانقيار قايراتكەرلەردى ۇنەمى ۇلىقتاۋ مەن ولاردى قولداپ وتىرۋدى وزىق دارەجەدە ۇيلەستىرۋدى، قالىپتاستىرۋدى جەدەل تۇردە قولعا الۋ كەرەك.

ادامزات تاريحىندا حالىقتى، ۇلتتى، ۇرپاقتى قالاي بولعان كۇندە دە جان-جاقتى تەرەڭ ويلانتا بىلۋدەن، تولعانتا بىلۋدەن، ەلدىكتى، قوعامدىق دامۋدى سارالاي بىلۋگە قۇلشىندىرۋدان، ومىرلىك جاڭا سەرپىلىستى سىلكىنىسكە تۇسىرۋدەن اسقان قۇدىرەتتىڭ بولۋى مۇمكىن بە؟! جوق.

كەمەل تولىق ادام بولۋعا، ۇلتتىق تۇلعاعا اينالۋعا مۇددەلى ادامدى داڭققا باستايتىن،  مەجەلى مۇراتقا جەتكىزەتىن جول بىرەۋ، ول – جاڭاشىلدىعى مەن باستاماشىلدىعى زور، ىزدەنىمپاز ەڭبەكقورلىعى مول، قايتپاس، قاجىماس قاجىرلى ەڭبەك قانا. ەندەشە ۇلتتىق ۇلى ماقساتقا قول جەتكىزۋ ءۇشىن ءبىزدىڭ وي-سانامىز ىستەرىمىزدەن اناعۇرلىم وزىپ ءجۇرۋى، ياعني ودان بۇرىنعىدان دا بەتەر جاڭاشا جاڭعىرىپ، جاڭارىپ، اسىلدانىپ وتى­رۋى ءتيىس. سوندا عانا ۇلتتىق ۇتقىر ىستەرىمىز العا وزۋدى ارتتىرا تۇسەدى.

مولداعالي ماتقان

Abai.kz