جاقىندا رەداكتسيامىزعا جامبىل وبلىسى تۇرار رىسقۇلوۆ اۋدانىنان ءسابيت سۇلتانوۆ ەسىمدى وقىرمانىمىز حابارلاسىپ، جانايقايىن جەتكىزدى. ءبىز قۇلاق تۇردىك. ول كىسى بىزگە بۇگىنگى كۇننىڭ بارىمتاشىلارى، انىعىراق ايتساق الدەبىر شەندىلەردىڭ اپەرباقاندىق ارەكەتى جايلى بايانداپ بەردى.

اۋىلداعى اكتسيونەرلىك قوعام – رەسپۋبليكا ۇزدىگىنە اينالعان كەز

جامبىل وبلىسىنا قاراستى تۇرار رىسقۇلوۆ اۋدانى، يۋبيلەينىي اۋىلى. مۇندا 2013 جىلعا دەيىن وبلىستاعى ەڭ وزىق «پودگورنىي» اق اتتى سەرىكتەستىك بولعان. يەلىگىندە 5 مىڭ باس قوي، 2 مىڭ باس ءىرى-قارا، مىڭ باس جىلقى بولعان. ءتىپتى ءسۇت وڭدەيتىن ارنايى زاۋىت اۋىل تۇرعىندارىن جۇمىسپەن قامتىپ تۇردى. ەگىستىكتەن جيىلعان ءداندى الىپساتارلاردىڭ تيىن-تەبەنىنە بەرمەس ءۇشىن، 500 مىڭ دوللارعا استىق قابىلداۋ پۋنكتىن اشىپ، تاۋلىگىنە 60-70 توننا بيداي تارتىپ وتىرعان. جوعارى سۇرىپتى ۇننىڭ 3 سورتى وندىرىلەتىن.

اۋدان ورتالىعى قۇلاندى اۋىلى. «پودگورنىي» اق-تىڭ ارقاسىندا مۇندا دا جۇمىس قىزۋ ءجۇرىپ جاتاتىن. شۇجىق زاۋىتى بولعان. بۇرىن «پودگورنىيدىڭ» فەرماسىنان ەت كەلىپ، شۇجىققا پايدالانىلاتىن. زاۋىت قازىر دە جۇمىس ىستەپ تۇر ەكەن. تەك ەتتى باسقا تاسىمالداۋشىلاردان الىپ وتىر. ال اۋداننىڭ ءوز كاسىپكەرلەرى الدەبىر اتىگورلەردىڭ كەسىرىنەن قىپ-قىزىل شىعىنعا باتىپ وتىرعان كورىنەدى.

«ءبىز اۋدانداعى 40 مىڭ توننا استىق سياتىن ەلەۆاتوردى ساتىپ الدىق. سەبەبى، ول كەزدە ەلەۆاتور قاڭىراپ، ىسكە العىسىز بولىپ تۇرعان. ءسويتىپ ءبىز ول جەرگە تۇكريادان ەكى ديىرمەن ساتىپ الىپ، ورناتتىق. اۋدانداعى شارۋاشىلىقتاردىڭ بيدايىن ءبىز ساتىپ الاتىنبىز. وعان قوسا، اۋدانداعى جۇمىس جاساماي تۇرعان ءسۇت زاۋىتىن الدىق. وعان دا تۇركيادان 500 مىڭ دوللارعا ءسۇت ونىمدەرىن ازىرلەيتىن اپپاراتتار مەن تەحنيكا ساتىپ الدىق. كۇنىنە 15 توننا ءسۇت ونىمدەرىن ازىرلەدىك. توڭىرەكتەگى جۇرتتىڭ بارلىعى سۇتتەرىن بىزگە وتكىزەتىن. قازىر بۇنىڭ بارلىعى توقتاپ تۇر»، - دەپ اڭگىمەلەيدى ءسابيت سۇلتان مىرزا.

كاسىپكەر ءسابيت سۇلتاننىڭ ءوزىنىڭ ايتۋىنشا، اۋىلشارۋاشىلىق قوجالىقتارى جەكەشەلەندىرۋگە تۇسكەندە، تالان-تاراجعا تۇسپەگەن جالعىز پودگورنىي سوۆحوزى ەكەن. اۋىلدىڭ ءبىرلى-جارىم تۇرعىنى ازداعان ۇلەسىن الىپ كەتكەنى بولماسا، كوپشىلىگى، دالىرەك ايتساق 367 ەڭبەكشى بىرىگىپ ءارى قاراي جۇمىس ىستەي بەرۋدى ءجون كورگەن. ءسويتىپ اكتسيونەرلىك ۇيىم قۇرادى. ونى 1995 جىلدىڭ 7-جەلتوقسانى كۇنى جامبىل وبلىستىق ادىلەت باسقارماسىنا تىركەتەدى. ءسويتىپ، اۋىل ازاماتتارى ۇيىمداسىپ شارۋاشىلىق قۇرادى.  ونىڭ باسىندا ءسابيت سۇلتان مىرزا بولعان. 2004 جىلى 5-قازاندا اكتسيونەرلەردىڭ جيىنى ءوتىپ، 27-قازان كۇنى «پودگورنىي» اق اتىمەن قايتا تىركەلەدى. ايتپاقشى، وسى جيىندا كەلىسكەندەي، اق قايتادان جشس بولىپ قايتا قۇرىلعان.

«ءبىزدىڭ شارۋاشىلىق العاش قۇرىلعاندا 1995 جىل ەدى. 1994 جىلى پارلامەنتتىڭ قابىلداعان جەر كودەكسىنە سايكەس، 1995 جىلدىڭ 1-قاڭتارىنا دەيىن پاي ۇلەسكەرلەرى نە جەردى ساتىپ الۋى نەمەسە جشس قۇرامىنا ەنۋى ءتيىس بولدى. ايتپەگەندە، ۇكىمەت ول جەرلەردى قايتارىپ الۋعا قۇقىلى ەدى. ءسويتىپ، ءبىز جشس قۇردىق. ءسويتىپ بىرىكتىك. كەرەك دەسەڭىز، «پودگورنىي» ەليتتىق ءداندى-داقىلدار شارۋاشىلىعى» رەتىندە تىركەلگەن وبلىستا جالعىز شارۋا قوجالىقپىز. مينيسترلىكتە سولاي تىركەلىپ تۇرمىز. كۇنى-بۇگىنگە دەيىن وبلىستا باسقا ەليتتىق ءداندى-داقىلدار وندىرەتىن شارۋاشىلىق جوق. ءتىپتى، اكادەميك راقىم ۋرازاليەۆتەن سۇراساڭىزدار دا، وسىنا ايتادى»، - دەيدى ءسابيت مىرزا.

اكتسيونەرلىك قوعام ءارى قاراي جۇمىس جاساۋ ءۇشىن جەر قاجەت. سوۆحوز ىدىراعاندا اۋىلداعى جۇرت ۇلەسكە العان جەرلەرىن  «پودگورنىيعا» پايدالانۋعا بەرگەن. ءبارى زاڭ شەڭبەرىندە جۇزەگە اسىپ، اق تىزگىنشىسى ءسابيت سۇلتانمەن كەلىسىم جاساسادى. قر جەر كودەكسىنىڭ 107-بابى، 4-تارماعىنا سايكەسىنشە، ارينە. شارت مەرزىمى 49 جىل دەپ بەلگىلەنەدى. پايدان ۇلەسى بار جۇرتتىڭ جالپى سانى – 170 ادام. ولاردىڭ وزدەرى دە اكتسيونەرلەر قاتارلى سانالادى.

جشس-نىڭ جارعىسى بويىنشا «پودگورنىي» اق-تىڭ ۇلەسى 94,4, جەردىڭ ۇلەسى 5,6 پايىز بولعان. باسقاسى باسقا، نارىققا ءوتۋ كەزەڭىندە كوپ جۇرتتىڭ تىرشىلىگى تۇرالاپ تۇرعاندا، «پودگورنىي» يەلىگىندەگى اۋداندىق ەلەۆاتور، شۇجىق زاۋىتى، ءسۇت وڭدەۋ زاۋىتى، نان زاۋىتى قارقىندى جۇمىس جاساپ، اۋدان تۇگىلى وبلىستا وزىق اتانادى. مۇنىڭ بارلىعىن ءسابيت سۇلتان مىرزا ۇيىمداستىرىپ، اۋىل تۇرعىندارى ءوز قولدارىمەن جاسادى. جۇمىس تا بار، ينۆەستورلار دا كوپ. دوللارمەن ەسەپتەگەندە ميلليونداعان تابىسقا جەتتى. قازاقستاندى ايتپاعاندا شەتەلدىك اۋىلشارۋاشىلىق سەكتورىمەن باسەكەلەسە الدى.

«ءبىز قازاقستاندا ەڭ ءبىرىنشى بولىپ بيدايىمىزدى دوللارعا ساتتىق. سول كەزدە ۇكىمەت بەلگىلەنگەن نورمانى ءۇش ەسەلىك كولەمدە ورىنداعان شارۋاشىلىقتارعا اقىنى دوللارمەن تولەيتىن. ءبىز سول ءۇش ەسەلىك نورمانى ورىنداپ جۇردىك»، - دەيدى كاسىپكەر.

(س.سۇلتان پرەزيدەنتتىڭ قابىلداۋىندا)

پرەزيدەنت وڭ باعاسىن بەرگەن شارۋاشىلىقتى جەرگىلىكتى باسشىلار بىتىراتىپ جىبەردى

ءسوز اراسىندا ايتا كەتەيىك، پرەزيدەنت نۇرسۇلتان نازارباەۆتىڭ ءوزى ءسابيت سۇلتاننىڭ شارۋاشىلىعىندا ەكى مارتە قوناقتا بولىپتى.

«مەن ەلباسىمىز نۇرسۇلتان نازارباەۆ مىرزانىڭ قاسىنا ەرىپ، شەتەلگە ساپارلارعا دا شىقتىم. اتالعان سالادا تاجىربيە الماسۋ سەكىلدى، شەتەلدىك ينۆەستورلاردى ەلگە اكەلۋ سەكىلدى شارۋالارعا العاش بولىپ كىرىسكەندەردىڭ ءبىرى بولدىم. تاۋەلسىزدىك العان العاشقى جىلدارى ەلباسىمىزدىڭ قاسىنان تابىلدىم. كەرەك دەسەڭىز، قازاقستانعا اۋىلشارۋاشىلىق سەكتورىنا العاش بولىپ شەتەلدىك ينۆەستور اكەلدىم. پرەزيدەنتىمىزدىڭ قولداۋىمەن اقش-قا بارىپ، ارنايى حالىقارالىق بيزنەس مەكتەپتەن ءبىلىم الىپ كەلىپ، سول ءبىلىمىمدى قازاقستاننىڭ اۋىلشارۋاشىلىق سەكتورىن دامىتۋعا پايدالاندىم. اۋىل تۇرعىندارىنىڭ جاعدايىن جاساۋعا بار كۇشىمدى سالدىم.

نۇرگەلدى باۋىرىم، ءدال وسى «پودگورنىيعا» پرەزيدەنتتىڭ ءوزى ارنايى ەكى رەت كەلىپ كەتتى. ءبىرىنشى جولى ششۇجىق زاۋىتىن ءوزى اشتى. ەكىنشىدە، ءبىزدىڭ شارۋا قوجالىعىمىزدىڭ تىنىس-تىرشىلىگىمەن تانىسىپ قايتتى. وڭ باعاسىن بەرگەن.

مەن ەلباسىنىڭ تاپسىرماسىن ورىنداۋ ماقساتىندا، قازارگو حولدينگتەن 3 ميلليون دوللارعا ليزينگپەن امەريكاندىق تەحنيكا العان ەدىم. قازىر سول تەحنيكانىڭ بارلىعى بەكەر تۇر. سەبەبى، شارۋاشىلىقتى الدەبىر دوكەيلەر بارىمتالاماق بولىپ، قازىر جۇمىس توقتاپ قالعان. بىزدەگى تەحنيكا وزىق ساپالى. قازىردىڭ وزىندە وبلىستا ەكى-ءۇش شارۋاشىلىقتا عانا بار شىعار، بۇنداي تەحنيكا. قالعاندارىنىڭ بارلىعىندا سوۆەت وكىمەتىنەن قالعان ەسكى-قۇسقى كومبايندار مەن تراكتورلار.

مىنە، پرەزيدەنتتىڭ ءوزى جوعارى باعالاپ كەتكەن شارۋاشىلىقتى جەرگىلىكتى باسشىلار بىتىراتىپ جىبەردى. بۇعان نە دەۋگە بولادى، ەندى؟..»، - دەيدى ءسابيت مىرزا.

بانديتتەر ءالى بار ەكەن

ال «پودگورنىي» اق توراعاسى ءسابيت سادىقوۆ (كەيىنگى قۇجاتتاردا ءسابيت سۇلتان دەپ كورسەتىلگەن) 30 جاسىندا وسى شارۋاشىلىقتىڭ تىزگىنىن ۇستاعان. قازاقستان تاۋەلسىزدىك العان العاشقى جىلدارى اكىمدىك قىزمەتتە ىستەگەن. ول كەزدە اۋدان اتى – لۋگوۆوي بولعان. كەيىن اكىمدىك قىزمەتىن ءوز ەركىمەن تاپسىرىپ، وسى «پودگورنىيعا» قايتا كەلەدى.

«مەن اۋداننىڭ ءبىرىنشى اكىمى بولدىم. سول جىلدارى شارۋاقوجالىقتارىن جەكەشەلەندىرۋ، سوۆحوزداردى پايعا ۇلەستىرىپ بەرۋ ساياساتى ءجۇرىپ جاتتى. مەن اۋىلداعى قوجالىقتى تاراتىپ جىبەرۋگە قيمادىم. ءسويتىپ، اكىم قىزمەتىمدى ءوز ەركىممەن تاپسىرىپ بەرىپ، «پودگورنىيعا» قايتتىم. اۋىلداستاردى جيىپ، اكتسيونەرلىك اشتىم. ەسەسىنە، كۇنى كەشەگە دەيىن سول بىرلەستىگىمىز رەسپۋبليكادا وزىق اتانىپ تۇردى. اۋىلدا جۇمىس جەتكىلىكتى بولدى، وتاندىق ءونىم وندىردىك. ءتىپتى، شەتەلمەن باسەكەلەسەتىندەي بولدىق»، - دەپ اڭگىمەلەيدى ءسابيت مىرزا.

بىراق، وسىنداي تابىسقا يە بولىپ، رەسپۋبليكاداعى اۋىلشارۋاشىلىق سەكتورىنا ايتارلىقتاي تابىس اكەلىپ وتىرعان شارۋاشىلىق كۇيرەگەن.  تۇپ-تۋرا 5 جىل بۇرىن. ماشينا-تراكتور ستانساسى قاڭىراپ، گاراجدار ۇڭىرەيىپ، ناۋبايحانانىڭ ويرانى شىققان.

شارۋاشىلىقتىڭ شارۋاسىنىڭ شايقالۋىنا بىردەن ءبىر سەبەپ – قايسىبىر شەندى مىرزانىڭ «رەيدەرلىك» ارەكەتى كورىنەدى. ءسابيت سۇلتان مىرزانىڭ ءوزى وسىلاي دەيدى. ەندى سول جايلى ءسوز ەتەيىك.

«بالەنىڭ ءبارى مەنىڭ دەمالىس ۇيىمنەن باستالىپ وتىر. ونىڭ بۇرىنعى سوۆحوز، قازىرگى اكتسيونەرلىك قوعامعا ەش قاتىسى جوق. ءوزىمنىڭ مەنشىگىمدە 100 گەكتارداي جەرىم بولدى. سول جەرگە دەمالىس ءۇيىن سالىپ، جانىنان مال فەرماسىن اشقان ەدىم. مىڭ ءتۇپ جەمىس اعاشىن ەكتىك. وندا دا تۇگەل اۋىل ادامدارى، اۋدان ادامدارى جۇمىس جاسادى. دەمالىس ورنى ىسپەتتى جاسادىق. وندا وسى تارازدان، الماتى مەن استانادان ەسىم-سويى ەلگە ءمالىم كوپ ازامات كەلىپ دەمالىپ كەتتى عوي. سولاردىڭ ءبىرىنىڭ كوزى ءتۇسىپ، الگى دەمالىس ورنىنا تالاستى.

قىسقاسى، جىگىتتەرىمەن كەلىپ، «1 اپتانىڭ ىشىندە مىنا جەردى ماعان راسىمدەپ بەر» دەپ الىمجەتتىك جاسادى. مەن سونشا ەڭبەكپەن جاساعان دۇنيەمدى جايدان-جاي بەرە سالمايمىن عوي. قاسارىسىپ تۇرىپ الدىم. 90-جىلدارى بولسا، تۇسىنىكتى عوي. 2010 جىلى بولعان وقيعا، بۇل. ول دا «وندا، ءوزىڭ ءبىل. ءىسىم سەنىمەن بولسىن» دەپ كەتتى»، - دەپ باياندايدى بولعان جايدى.

سوت ىستەرىنىڭ حرونولوگياسى

ءسابيت سۇلتاننىڭ جەكە مەنشىگىنەن باستالعان تالاس اكتسيونەرلىك قوعامنىڭ جۇمىسىنا كەپ جەتەدى. سويتسە، ءسابيت سۇلتاننىڭ پايشىلارعا قارىزى بولعان ەكەن. سىنىقتان-سىلتاۋ ىزدەگەندەر ۇزىن-سونار سوت پروتسەسسىن باستاپ كەتەدى. اۋەلگى ماسەلە – پايشىلاردىڭ ىشىنەن ەكى ازامات 2004-جىلعى 5-قازانداعى شەشىمدى تەرىستەۋ جايلى ارىزدانادى. ەندى رەت-رەتىمەن ايتايىق:

2013 جىلدىڭ 28-اقپانى. جامبىل وبلىسىنىڭ اۋدانارالىق مامانداندىرىلعان ەكونوميكالىق سوتى شەشىم شىعارىپ، س.سۇلتان پايشىلارعا 14 ميلليون 524 مىڭ 775 تەڭگە جانە مەملەكەتتىك الىم تولەۋى كەرەك بولادى.

2013 جىلدىڭ 22-مامىرى. جامبىل وبلىستىق سوتىنىڭ ازاماتتىق جانە اكىمشىلىك ىستەر جونىندەگى سوت القاسى شەشىم شىعارىپ،  الدىڭعى سوت شەشىمىن وزگەرتەدى. ول بويىنشا، اۋەلدە كەلىسىلگەن 5,6 پايىزى – جەر ۇلەسىنەن، 94,4 پايىزى قوعامنىڭ نەگىزگى قور ءتۇرىن­دەگى ۇلەسىنەن دەگەن حاتتاماسى كۇشىن جويادى. سونداي-اق، بانككە جەردى كەپىلگە قويۋ تۋرالى حاتتاما مەن كە­پىلدىك تۋرالى كەلىسىمشارت تا كۇشىن جويادى. جانە 14,5 ميلليون قارىز 8 ميلليون 91 مىڭ 449 تەڭگەگە ازايادى.

2017 جىلدىڭ 7-قاراشاسى. قر جوعارعى سوتى ازاماتتىق استەر جونىندەگى سوت القاسى قاۋلى قابىلداپ، جوعارىداعى حاتتامالاردى تەرىستەيدى. وبلىستىق سوت اكتىلەرىن توقتاتادى. ءىستى جامبىل وبلىستىق سوتىنىڭ ازاماتتىق ىستەر جونىندەگى سوت القاسىنا قايتا قاراۋعا جىبەرەدى.

ال 2018 جىلدىڭ 11-قاڭتارى. وبلىستىق سوتتىڭ ازاماتتىق ىستەر جونىندەگى القاسى تاعى سوناۋ 2013 جىلعى شەشىمدى قايتالاعان.

قارىز دەرەۋ ارادا تولەنەدى. بىراق سەرىكتەستىك زاڭسىز بولىپ شىعادى. اۋىلداعى تىرشىلىك توقتايدى.

«جوعارعى سوت ءبىزدىڭ پايدامىزعا شەشىم شىعاردى. قازىر جەرلەرىن ءبولىپ العان جۇرت مۇلدە بولەك بىرەۋلەرگە جالعا بەرىپ وتىر. ولاردان اۋىلعا كەلىپ-كەتەر پايدا جوق. اۋىل تۇرعىندارى باياعىداي ەمەس، ارقايسىسى جان-جاققا تەنتىرەپ كەتكەن، جۇمىس ىزدەپ. مەنىڭ سۇرايتىنىم بىرەۋ-اق. جامبىل وبلىستىق سوتى جوعارعى سوتتىڭ شەشىمىنە ساي، الدىڭعى ەكى شەشىمدى جوققا شىعارسا دەيمىن عوي. وكىنىشكە وراي، بۇل قيىن بولىپ تۇر قازىر. »، - دەيدى ءسابيت مىرزا.

ورتاق ءىس وڭعا باسپاي تۇر دەسەك تە، «بارلىعىن قايتا قالپىنا كەلتىرۋگە ءالى دە بولادى» دەيدى ءسابيت مىرزا. اقش پەن ەۋروپادان، اراب ەلدەرىنەن ينۆەستورلار دا بار ەكەن. ولار «پودگورنىيمەن» جۇمىس جاساۋعا دايىن وتىر دەيدى.  تەك جۇمىستى باستاۋ ءۇشىن شارۋاشىلىقتى رەتكە كەلتىرىپ الۋ كەرەك، ارينە.

«كۇزدە پرەزيدەنت نۇرسۇلتان نازارباەۆ جامبىل وبلىسىنا كەلىپ، مۇنداعى اۋىلشارۋاشىلىق سەكتورىنا وتە تومەن باعا بەرىپ كەتتى. مەن سىزگە ءبىر قىزىق دەرەك ايتايىن، ءبىزدىڭ «پودگورنىيدى» بىتىراتىپ كەتكەن سول كەزدەگى وبلىستىق اۋىلشارۋاشىلىقتى باسقارىپ وتىرعان كىسى ەدى. تىكەلەي قيانات جاسادى. اۋەلدە اۋدان اكىمى ەدى. سول كەزدە ماعان حابارلاسىپ، «ءبىر كىسىلەر دەمالىس ورنىن راسىمدەپ بەرسىن دەپ جاتىر» دەگەن كىسى سول. كەيىن ول وبلىسقا اۋىسىپ، اكىمنىڭ اۋىلشارۋاشىلىق جونىندەگى ورىنباسارى بولدى. قازىر سەناتتا دەپۋتات»، - دەيدى كاسىپكەر.

اگروسەكتوردىڭ جايىن باسقا-باسقا اسەكەڭ ءبىلۋى ءتيىس-اق

ءتۇيىن: راس، مەملەكەت باسشىسى ەلدەگى شاعىن جانە ورتا كاسىپتى دامىتۋعا جاساپ جاتقان تىڭ باستامالارىن بىلەمىز. ەلباسى ءوز سوزىندە «كاسىپكەرلەردى ءجون-جوسىقسىز قۋدالاي بەرمەڭدەر» دەپ ەسكەرتكەن-ءتىن.

ءبىز بۇعان دەيىن دە بانديتيزم مەن رەيدەرلىكتىڭ قۇربانى بولعان ازاماتتار جايلى جازعان ەك. 70-تەگى اتىراۋلىق كاسىپكەر شاراسىزدىقتان ەلباسىنان اراشا سۇراپ، باق-قا جاريا سالدى.

بانكتەردىڭ قۋلىق-سۇمدىعىنان قىپ-قىزىل شىعىنعا باتقان الماتىلىق كاسىپكەر دە باسىنداعى جاعدايىن بىزگە بايانداپ بەرگەن.

تالدىقورعاندا شەندىمەن شەكىسكەن كاسىركەر باس پروكۋوردان اراشا سۇرادى. ول از دەسەڭىز، وتكەن جىلى اقمولا وبلىسىندا شاراسى تاۋسىلعان 61 جاستاعى كاسىپكەر ومىربەك جانپبوزوۆ ءوز-ءوزىن اتىپ جىبەرگەنى بەلگىلى.

ەستەرىڭىزدە بولسا، باس پروكۋراتۋرا بىلتىرعى ەسەبىندە كاسىپكەرلەرگە جاسالىپ جاتقان قىسىم 82 پايىزعا ازايعان دەپ ەدى. سونداعىسى مىنە. كاسىپكەرلەرگە قىسىم جاساۋعا جول بەرىلمەۋى كەرەك دەپ دەپۋتاتتار دا، ۇكىمەت تە ءجيى ايتادى. ال ناتيجە قانە؟

پرەزيدەنت نۇرسۇلتان نازارباەۆ 2018 جىلدىڭ 10-قاڭتارى كۇنى جاساعان جولداۋىندا باسقا-باسقا ەمەس، ءدال وسى اۋىلشارۋاشىلىق سەكتورى جايلى ايتتى. باسىمدىق بەرىلەتىنىن ايتتى.

2018 جىل. قازاقستان حالقىنا جولداۋ. ءۇشىنشى تاراۋ: «اقىلدى تەحنولوگيالار» - اگروونەركاسىپ كەشەنىن قارقىندى دامىتۋدىڭ مۇمكىندىگى.

«اگرارلىق ساياسات ەڭبەك ونىمدىلىگىن تۇبەگەيلى ارتتىرۋعا جانە وڭدەلگەن ءونىمنىڭ ەكسپورتىن ۇلعايتۋعا باعىتتالۋى كەرەك.

جاڭا تەحنولوگيالار مەن بيزنەس-مودەلدەردى ەنگىزۋ، اگروونەركاسىپ كەشەنىنىڭ عىلىمعا نەگىزدەلۋىن ارتتىرۋ شارۋاشىلىقتاردى كووپەراتسيالاۋ قاجەتتىگىن كۇشەيتەدى.

اۋىل شارۋاشىلىعى سۋبەكتىلەرىنىڭ كووپەراتيۆ تۇرىندە جۇمىس ىستەۋىنە جان-جاقتى قولداۋ كورسەتۋ كەرەك.

مەملەكەت بيزنەسپەن بىرلەسىپ، وتاندىق ءونىمدى حالىقارالىق نارىققا شىعارۋدىڭ ستراتەگيالىق جولىن تاۋىپ، ىلگەرىلەتۋگە ءتيىس»،-دەپ ايدان انىق جازدى. بۇل پرەزيدەنتتىڭ جولداۋىندا بار. حات تانيتىن، جولداۋمەن تانىسىپ شىققان ءاربىر ادام بىردەن تۇسىنەرى انىق.

اسىرەسە،  پرەمەر-ءمينيستردىڭ ورىنباسارى، اۋىلشارۋاشىلىق ءمينيسترى بولعان اسقار مىرزاحمەتوۆ مىرزا بۇل جولداردى جاتقا بىلسە كەرەك. اسقار يسابەكۇلى قازىر جامبىل وبلىسىنىڭ تىزگىنىن ۇستادى. ەندەشە، پرەزيدەنت تاپسىرماسىن قالتقىسىز ورىنداۋ، اسىرەسە وڭىردەگى ءولىمشى حالگە تۇسكەن اگروسەكتوردى، باسقا-باسقا اسەكەڭ جاقسىلاپ قولعا الۋى كەرەك-اق. بۇرىنعى باسشىلاردىڭ «بانديتتىك» ارەكەتىن اسەكەڭ قايتالامايدى دەگەن ۇمىتتەمىز.

نۇرگەلدى ابدىعانيۇلى

Abai.kz