مەملەكەت جانە قوعام قايراتكەرى اسقار قۇلىباەۆقا اشىق حات

بيسميللاھير يراحمانير راحيم

قادىرلى اسقار التىنبەكۇلى!

ءسىزدىڭ سوڭعى جىلدارى رەسپۋبليكا كولەمىندە كوپشىلىك ءۇشىن  رۋحاني ورتالىق بولىپ سانالاتىن  كوپتەگەن مەشىت قۇرىلىستارىن سالىپ، ساۋاپتى يماني تىرشىلىكتەر جاساپ جۇرگەنىڭىزدى بۇحارا حالىق جاقسى بىلەدى. وسى ءبىر ونەگەلى تىرلىگىڭىزدى سوڭى ۋاقىتتا  ودان ءارى ورىستەتىپ، اۋليەلى ارىستانباپ جەرىنەن تاعى دا ءبىر كۇمبەزى كوك تىرەگەن كەلىستى مەشىت قۇرىلىسىن ءبىتىرىپ، پايدالانۋعا بەرگەلى وتىرعانىڭىزدى تاياۋدا زياراتپەن جۇرگەندە ارنايى بارىپ كورىپ قايتتىم. ارحيتەكتۋراسى وتە كوركەم شىعىپتى. مەشىت جانىنان سالىنعان قوناق ۇيلەرىڭىز دە كوڭىلگە قونىمدى. ەندىگى جەردە كوپشىلىككە يمان تاراتار شاڭىراقتىڭ  يگىلىگىن كورۋگە جازسىن.

مەملەكەت جانە قوعام قايراتكەرى اسقار قۇلىباەۆقا اشىق حات

بيسميللاھير يراحمانير راحيم

قادىرلى اسقار التىنبەكۇلى!

ءسىزدىڭ سوڭعى جىلدارى رەسپۋبليكا كولەمىندە كوپشىلىك ءۇشىن  رۋحاني ورتالىق بولىپ سانالاتىن  كوپتەگەن مەشىت قۇرىلىستارىن سالىپ، ساۋاپتى يماني تىرشىلىكتەر جاساپ جۇرگەنىڭىزدى بۇحارا حالىق جاقسى بىلەدى. وسى ءبىر ونەگەلى تىرلىگىڭىزدى سوڭى ۋاقىتتا  ودان ءارى ورىستەتىپ، اۋليەلى ارىستانباپ جەرىنەن تاعى دا ءبىر كۇمبەزى كوك تىرەگەن كەلىستى مەشىت قۇرىلىسىن ءبىتىرىپ، پايدالانۋعا بەرگەلى وتىرعانىڭىزدى تاياۋدا زياراتپەن جۇرگەندە ارنايى بارىپ كورىپ قايتتىم. ارحيتەكتۋراسى وتە كوركەم شىعىپتى. مەشىت جانىنان سالىنعان قوناق ۇيلەرىڭىز دە كوڭىلگە قونىمدى. ەندىگى جەردە كوپشىلىككە يمان تاراتار شاڭىراقتىڭ  يگىلىگىن كورۋگە جازسىن.

قۇرمەتتى اسەكە، ءوزىڭىز سالدىرىپ جاتقان جاراسىمدى وسى مەشىتىڭىزدى كورە وتىرىپ، وزىڭىزگە از-كەم  ءوتىنىش-بازىنا ايتقىم كەلىپ وتىر. ەل تاريحىن  جەتىك بىلەتىن زيالى قايراتكەرلەردىڭ ءبىرىسىز عوي،  ءوزىڭىزدىڭ ىقىلاسىڭىز اۋىپ، ماڭىنان مەشىت ءۇيىن كوتەرىپ وتىرعان ارىستانباپ اۋليەنىڭ كەسەنەسىن ءامىر تاراعايدىڭ ۇلى ءامىر تەمىر كورەگەن ءباھادۇر بابامىز سوپىلىق ءىلىمنىڭ نەگىزىن سالۋشى، كەمەڭگەر اقىن قوجا احمەت ياسساۋيگە ارناعان قاسيەتتى ازىرەت سۇلتان كەسەنەسىنەن بۇرىن سالدىرعاندىعى تۋرالى ەل اۋزىندا ءار قيلى اڭىز بار. سول اڭىزدارداعى ايتىلار نەگىزگى شىندىق ارىستانباپتىڭ ايگىلى اۋليە قوجا احمەت ءياسساۋيدىڭ  ۇستازى بولعاندىعى. سوندىقتان دا بۇل ەكى تاريحي جادىگەر ەل جادىندا قالاي ساقتالسا، سونى جارىلقاپ سالدىرعان 27 ەلدىڭ پاتشاسى بولعان پاديشا ءامىر تەمىر دە ەستەن شىقپاۋى ءتيىس قوي. ءامىر تەمىر وسىنشا ەلدىڭ پاتشاسى بولۋمەن قاتار سول ەلدى  يسلامدىق، ونىڭ ىشىندە ياساۋيلىك نەگىزدە باسقارعان دانىشپان.  ول ءوزىنىڭ «تەمىر تۇزىكتەرى» اتتى كىتابىندا; «ماعان تاجىريبە كورسەتتى، ءدىن مەن زاڭعا باعىنباعان مەملەكەت ەشقاشان ءوزىنىڭ كۇشى مەن قۋاتىن ساقتاي المايدى... ءدىنسىز مەملەكەتتى شاتىرى جابىلماعان، ەسىكسىز، قورشاۋسىز، كەز-كەلگەن ارام پيعىلدى ادام كىرە بەرەتىن، قورعانسىز ۇيمەن سالىستىرۋعا بولادى.

مەن، سوندىقتان، ءوزىمنىڭ عيماراتىمدى يسلام ءدىنىنىڭ ۇلىلىعىنا نەگىزدەدىم، وعان ەرەجەلەر مەن زاڭداردى ۇيلەستىردىم جانە ولاردى ءوزىم بيلىك جۇرگىزگەن كەزىمدە ساقتاپ، مويىنسىندىم»(118-بەت)- دەپ جازىپ تا كەتكەن. ەسىمى دە قۇرانداعى تەمىر سۇرەسىمەن اتالعان.  جالپى، پاديشا ءامىر تەمىردىڭ قازاق جەرىنىڭ تاريحىنداعى ورىنى ءبارىمىز ءتاۋ ەتەرلىكتەي.  وسىنى كورىپ-بىلە وتىرىپ، كوزى تىرىسىندە-اق كورەگەن اتانعان قاسيەتتى ءباھادۇر بابامىزعا وسى كۇنگە دەيىن مەملەكەت تاراپىنان ەشقانداي نازار اۋدارىلعان ەمەس جانە تاياۋ ارادا اۋدارىلا قوياتىن سىڭاي بايقالمايدى. ارينە، بۇل جاعداي كۇنى كەشە عانا ەقىۇ-عا مۇشە ەلەردىڭ مەملەكەت جانە ۇكىمەت باسشىلارىن، حالىقارالىق ۇيىمداردىڭ جەتەكشىلەرىن، سونداي-اق بىرقاتار ەلدەردىڭ مەملەكەت باسشىلارى اتىنان كەلگەن رەسمي دەلەگاتسيا باسشىلارىن سالتاناتتى جاعدايدا قارسى الىپ، جوعارى دەڭگەيدە سامميت وتكىزگەن ەلىمىزدىڭ اتىنا ۇيات-اق تىرشىلىك. ەلىمىزدە ورىن الىپ كەلگەن وسى ولقىلىقتى جويۋدىڭ باستاماسى رەتىندە   ءسىز سالدىرعان جاڭا مەشىتكە ءدىن جاناشىرى، ءباھادۇر بابامىز ءامىر تەمىردىڭ اتىن بەرىپ، الدىنا الەم مويىنداعان ايباتىن تانىتار الىپ ەسكەرتكىشىن سالدىرسا، بابا ارۋاعى الدىندا ۇلكەن يماندى تىرلىك جاسالعان بولار ەدى. بۇلاي ءوتىنىش جاساپ وتىرعانىم، ءباھادۇر بابامىزدىڭ سۇيەگى سامارقانداعى رەگيستاندا جاتقانىمەن، ءدال وسى جەردە ومىردەن وتكەنى تاريحتان ءمالىم. ونى وتكەن تاريحتىڭ حابارشىسىنداي سول كەزدەن بەرى اتالىپ كەلە جاتقان «تەمىر» تەمىر جول كەنتى جەتكىزىپ وتىر...

قادىرلى اسەكە، بۇل حاتتى  ءوزىڭىزدىڭ اتىڭىزعا جازىپ وتىرۋىمنىڭ ەكىنشى سەبەبى، ءسىز مەملەكەت جانە قوعام قايراتكەرى بولۋمەن قاتار، 1998 جىلدان  رەسپۋبليكالىق «جىبەك جولى - قازاقستان » ۇلتتىق كومپانياسىنىڭ پرەزيدەنتىسىز. بۇل كومپانيانىڭ ەرتەڭگى جارقىن بولاشاعى - الەمدىك تۋريزمدە. ءامىر تەمىر پاديشا - الەمدىك تۇلعا. ءباھادۇردىڭ وسى جەردە ومىردەن وتكەندىگى تۋرالى جەر الەمگە حابار بەرەر سوم ەسكەرتكىش تۇرعىزىلىپ جاتسا،  الەم پاديشاسىنا زيارات ەتۋشى  ارىستانباپ جەرىنە جەتكەنشە اسىعاتىندار  لەگى  جەتىپ ارتىلار ەدى. سول ءتۋريزمنىڭ ءورىس الۋىمەن ءتۇبى ءسىز سالدىرعان مەشىت ءۇيى مەن «تەمىر» ستانتسياسىنىڭ ارالىعى ۇلكەن ەلدى مەكەن بولىپ كەتۋى دە عاجاپ ەمەس...

ەلگە دە، وزىڭىزگە دە ابىروي اپەرەر وسى ويلار مەنى مازالاعان سوڭ، باق ارقىلى اتىڭىزعا  اشىق حات جازعانىما اعالىق كەشىرىممەن قاراپ، ناقتىلى جاۋابىن ايتارسىز دەگەن ويدامىن.

سالەممەن، باقتىباي اينابەكوۆ،

«قازاقستان قاجىلارى» ءدىني بىرلەستىگىنىڭ توراعاسى، جازۋشى

«اباي-اقپارات»