بۇعان دەيىن قورىتىندى قۇجاتتى قابىلداۋعا قارسى شىققان يتاليا پرەمەر-ءمينيسترى دجۋزەپپە كونتە ون ساعاتقا سوزىلعان كەلىسسوزدەردەن سوڭ قۇجاتقا قول قويۋعا كەلىستى. قورىتىندى كەلىسىم بويىنشا، ەو ەلدەرى ميگرانتتاردى ەرىكتى تۇردە قابىلدايدى، ولاردى وداق مۇشەلەرى اراسىندا ءبولىپ ورنالاستىرۋ مىندەتى جويىلادى.

كوشى-قون ساياساتىنداعى رەفورمانى يتاليا تالاپ ەتتى. ەرەجە بويىنشا، ەۋرووداق اۋماعىنا كىرگەن ميگرانتتاردى تىركەگەن ەل وعان جاۋاپتى بولدى. سول سەبەپتى وڭتۇستىك ەۋروپا ەلدەرىنە سالماق كوبىرەك ءتۇستى. 11 ماۋسىمدا يتاليا بيلىگى جەرورتا تەڭىزىندە قۇتقارىلعان ميگرانتتار مىنگەن كەمەنى قابىلداماي قويدى. فرانتسيا مەن يسپانيا باسشىلارى بۇل شەشىمدى سىنادى. فرانتسيا پرەزيدەنتى ەممانۋەل ماكروننىڭ ايتۋىنشا، ەۋروپالىق وداقتاعى كوشى-قون داعدارىسى ساياسي داعدارىسقا اينالدى.

كەلىسىم قابىلدانعان سوڭ ماكرون ەۋروپاعا ميگراتسيا قىسىمىنا ۇزاق ۋاقىت توزۋگە تۋرا كەلەدى دەپ مالىمدەدى. "بۇگىن ەۋروپا ەلدەرىنىڭ ارىپتەستىگى جەڭىسكە جەتتى", - دەپ ماكرون.

بريۋسسەلدەگى ديپلوماتيالىق قىزمەتتەردەن ءمالىم بولعانداي، ەۋرووداق ەلدەرىنىڭ جەتەكشىلەرى رەسەيگە قاتىستى سانكتسيانى سوزۋعا شەشىم قابىلدادى. ويتكەنى ۋكراينانىڭ شىعىسىنداعى جانجالدى شەشۋدە وڭ وزگەرىس بايقالمايدى. بۇعان دەيىن قابىلدانعان سانكتسيا مەرزىمى 31 ماۋسىمدا اياقتالادى.

Abai.kz