ايگىلى مۋزىكانت، ءانشى مەيرامبەك بەسپاەۆ 27 ماۋسىم كۇنى ل.گۋ­ميلەۆ اتىنداعى ەۋرازيا ۇلت­تىق ۋنيۆەرسيتەتىندە مادەنيەتتانۋ ماماندىعى بويىنشا ماگيسترلىك ديسسەرتاتسياسىن قورعاپ شىقتى. مەيرامبەك بەسپاەۆتىڭ عىلىمي جەتەكشى­سى – اكادەميك عاريفوللا ەسىم بولدى. ۋنيۆەرسيتەت باسشىلى­عىنىڭ ۇسىنىسى بويىنشا، ديسسەرتاتسيا قورعاۋ راسىمىنە قالاعان ادام كەلىپ قاتىسۋىنا مۇمكىندىك العانىن بەسپاەۆ الەۋمەتتىك جەلىدە جازدى. سول سول-اق ەكەن، ء"ازاماتتىو جۋرناليستيكانىڭ" بەلسەندىسى بولىپ العان بۇگىنگى جۇرتتىڭ پىكىرى ەكىگە جارىلدى. ءبىر جاعى مەيرامبەكتىڭ عىلىمعا دەن قويعانىن قۇپتاسا، كەلەسى جاق كەرىسىنشە پىكىر ايتىپ كەرگىلەسۋدە. مىسالى، انشىلەردىڭ ديسسەرتاتسيا قورعاعانىنا كۇمانمەن قاراعان ۋنيۆەرسيتەت پروفەسسورى مىرزانتاي جاقىپ facebook پاراقشاسىندا: «قازاقستاننىڭ بۇكىل تەلەارنالارىن تۇگەلدەي جاۋلاپ الىپ، ەندى جوعارى وقۋ ورىندارىنىڭ ماگيستراتۋ­رالارى مەن PhD دوكتورانتۋرا­لارىن مەڭگەرىپ-يگەرۋگە لاپ قويعان قالتاسى قالىڭ جۇل­دىزدار مىناداي قارقىندارى­مەن ءبىر كۇنى ءبىلىم جانە عىلىم ءمينيسترى، ۇلتتىق ەكونوميكا ءمينيسترى، قورعانىس جانە اەروعارىش ونەركاسىبى مي­نيسترى، تاعى باسقا لاۋازىم يەلەرىنە اينالىپ جاتسا، ءتىپتى دە تاڭعالۋعا بولمايتىن جاع­دايعا جەتكەن سەكىلدىمىز»، – دەپ جازدى. ارتىنشا ءوز سوزىنە ءوزى تۇسىنىك بەرۋدى ءجون كورگەن پروفەسسور ء"انشى-جۇلدىزدار دا ديپلوم قورعاسىن، ءبىر-اق ولار جوو-نىڭ اقىلى بولىمدەرىنەن قورعاسىن. مەملەكەتتىك گرانتتى نەگىزىنەن بولاشاق مادەنيەتتانۋشىلار، عىلىمعا بەرىلگەن شىن تالاناتتار يەلەنگەنى ءجون" دەدى.

مەيرامبەك ديپلومىن قورعاپ العالى اپتادان اسسا دا، الەۋمەتتىك جەلىدەگى اڭگىمە ءالى تيىلماي تۇر. سول اڭگىمەلەردىڭ ءبىر پاراسى بىلاي بولىپ كەلەدى.

سەرجان قاسەن: 

- مەيرامبەك بەسپاەۆتىڭ قورعايىن دەپ جۇرگەن ديپلومدىق جۇمىسىنىڭ تاقىرىبى: "التىنبەك قورازباەۆتىڭ قازاق مادەنيەتىندەگى ورنى" ەكەن.
وسىنداي فاكۋلتەت، وسىنداي تاقىرىپ كىمگە كەرەك؟ ماعان مىسالى ناxقا دا كەرەك ەمەس. ودان دا "جالبىزدىڭ اسقازان اۋرۋلارىن ەمدەۋدەگى ءرولى" دەگەن تاقىرىپ مەن ءۇشىن عانا ەمەس، ادامزات ءۇشىن دە الدەقايدا قۇندىراق بولار ەدى.

زاڭعار كارىمحان:

- نەسى بار، جانىنا جاقىن تاقىرىپ! بالا كەزىنەن جاقسى بىلەتىن، جاقسى تانيتىن دۇنيەنى جازۋ كەرەك قوي جازعان سوڭ! عىلىمعا پايدا اكەلمەيدى دەپ ويلايسىز با؟ قاتەلەسەسىز! قازىرگى قازاق قوعامى قورازباەۆتانۋعا مۇقتاج عوي. اناۋ تانۋ، مىناۋ تانۋلارعا قاراعاندا. "بۇلاق كورسەڭ، كوزىن اش" دەگەندەي، ونەر جولىنا، ۇلكەن ونەرگە قارشاداي مەيرامبەكتى اكەلگەنىنىڭ ءوزى نە تۇرادى؟! "اۋىل ساحناسىنىڭ وزىق ءانشىسى" قالايشا "قازاقستاننىڭ حالىق ءارتىسى" اتانۋىنىڭ سىرى كىمگە كەرەك بولماسىن؟! مىسالى، ماعان قىزىق! قالاي جوعارى اتاق الۋعا بولادى، وعان جەتۋدىڭ قانداي جولدارى بار، نەنى ۇيرەنىپ، نەنى مەڭگەرۋ كەرەك دەگەندەي... بۇل ديپلوم جۇمىسى ەسترادا سالاسىنا قوسىلعالى تۇرعان "ۇلكەن ەڭبەك" ەمەس پە؟ ال سىزدەر باعالاي الماي جاتىرسىزدار!

اقبەرەن ەلگەزەك:

- مەيرامبەك ءوزىن ەشقاشان ءانشىمىن دەگەن ەمەس. بيىك ونەردى تۇيسىگىمەن تەرەڭ تانىعان سوڭ، ول ءوزىڭ مۋزىكانتپىن دەپ ەسەپتەيدى. ول ونىڭ بەرىك پوزيتسياسى. بۇل - ءبىر. ال، ەسترادا مايدانىندا قازاق انىنە تاۋەلسىزدىك الىپ بەرگەن بىردەن ءبىر مۋزىكانت بولسا، ول تاعى دا - مەيرامبەك! "مۋزارت" توبى قۇرىلىپ، ەل بۇلاردى جاپپاي تىڭداي باستاعان كەزدەن باستاپ، جۇرت رەسەيدەن كەلەتىن انشىلەردىڭ كونتسەرتتەرىنە بارۋدى دوعاردى. سونىڭ باستاۋىندا كىم تۇردى؟ مەيرامبەك! حالىقتى ەسكى-جاڭا تەرمەلەرمەن سۋسىنداتقان كىم؟ مەيرامبەك! قازىر جاس انشىلەرگە اعا بوپ، باس-كوز بوپ جۇرگەن دە وسى ماڭدايى جارقىراعان ناعىز قازاق! بالا كەزدەن "بوزتورعايشا" شىرىلداپ، قازاق ونەرىن اسپانداتقان وعلانىڭا ءبىر جاپىراق ديپلومىڭدى قيمادىڭ با، اعايىن؟! سول ديپلومدى قالتاسىنا سالعان قاي ونەرلىڭ مەيرامبەكتەي قازاققا ەڭبەك ەتتى؟! ءوز تۋعانىمىزدى اياقتان تارتىپ، ىردۋ-دىردۋ بولامىز دا جاتامىز، ايتەۋىر. قويساڭدارشى بولدى، سىرت كوزدەن ۇيات ەمەس پە؟!