Reuters اگەنتتىگىنە بەرگەن سۇحباتىندا ترامپ رەسەي پرەزيدەنتى ۆلاديمير پۋتينمەن كەزدەسۋى تۋرالى دا ايتقان. ترامپتىڭ سوزىنشە، 16 شىلدە كۇنى حەلسينكيدەگى جابىق كەزدەسۋدە ءيزرايلدىڭ قاۋىپسىزدىگى، سيرياداعى جاعداي، رەسەيدىڭ قىرىمدى اننەكسيالاپ الۋى ءسوز بولعان. ول "پۋتين سانكتسيا ماسەلەسىن قوزعامادى" دەگەن.
ۆاشينگتون ماسكەۋگە 2014 جىلى رەسەيدىڭ قىرىمدى اننەكسيالاۋى جانە ۋكراينا شىعىسىنداعى اگرەسسياسى ءۇشىن سانكتسيا سالعان. قازىرگى ۋاقىتتا كونگرەسكە رەسەيدىڭ اقش-تاعى پرەزيدەنت سايلاۋىنا ارالاسۋى وقيعاسىنا بايلانىستى جاڭا زاڭ جوباسى تۇسكەن. قۇجات رەسەيدىڭ دەربەس قارىزىنا بايلانىستى ترانزاكتسياعا شەكتەۋ قويۋدى كوزدەيدى. اقش-تا رەسەيدىڭ "سبەربانك", ۆتب، "ۆنەشەكونومبانك" جانە "گازپرومبانك" سەكىلدى ءىرى بانكتەرىنىڭ جۇمىس ىستەۋىنە تىيىم سالۋ دا قاراستىرىلعان.
Abai.kz
