ەستونيا ادىلەت مينيسترلىگى سايتىندا جاريالانعان مالىمدەمەدە سوۆەت رەجيمىنىڭ سالدارى مەن قۇرباندارىن ەستە ساقتاۋ كەرەكتىگى ايتىلادى. ساياساتكەرلەر ىقتيمال ءىس-قيمىل جوسپارىن، ونىڭ ىشىندە بۇۇ دەڭگەيىندەگى شارالاردى تالقىلاعان. ەكى ەل بيلىگى بۇرىنعى بالتىق بويى ەلدەرىنىڭ 1940-1990 جىلدارى سسسر قۇرامىندا بولعانىن وككۋپاتسيا دەپ اتايدى.
2015 جىلى جەلتوقساندا لاتۆيا، ليتۆا جانە ەستونيا بىرلەسكەن دەكلاراتسياعا قول قويىپ، كۇش بىرىكتىرۋگە جانە وككۋپاتسيا ءۇشىن وتەماقى تالاپ ەتۋگە ۋاعدالاسقان. الايدا، سول كەزدە ەستونيا سىرتقى ىستەر مينيسترلىگى تاللين ماسكەۋدەن وتەماقى تالاپ ەتپەيتىنىن مالىمدەگەن. لاتۆيا بولسا، كەلتىرىلگەن زارداپتى 185 ميلليارد ەۋروعا باعالاعان.
ماسكەۋ مۇنداي تالاپتى رەسمي تۇردە قابىلدامايدى. رەسەي سىرتقى ىستەر مينيسترلىگى "وتەماقى تالاپ ەتۋ - سسسر كەزىندەگى ساياسي، تاريحي جانە قۇقىقتىق جاعداياتتى ەسكەرمەۋ" ەكەنىن بىرنەشە رەت مالىمدەگەن.
Abai.kz
