09.09.2016 جىل. كارىم قاجىمقانۇلى ۇلتتىق قاۋىپسىزدىك قىزمەتىنە «سۇرانىپ» بارعانىنا 2 جىل. 2016 جىلى پرەزيدەنت نازارباەۆ ۇكىمەتتىڭ كەڭەيتىلگەن وتىرىسىن وتكىزىپ، ءماسىموۆتىڭ مىندەتىن اۋىستىردى.  ءسويتىپ، جاپ-جاڭا ۇكىمەتباسىن تاعايىنداعان ەدى. ول – باقىتجان ءابدىرۇلى ساعىنتاەۆ بولدى. باكەڭ دە بۇل قىزمەتكە ىشتەي دايىندىقپەن جۇرگەن ەكەن، اينالىسى ەكى-ءۇش كۇندە ۇكىمەتتىڭ جاڭا قۇرامىن جاساقتاپ شىقتى.

25.01.2017 جىل. پرەزيدەنت نازارباەۆ ارنايى قاۋلى شىعارىپ، ۇكىمەت قۇرىلىمىنا از-كەم وزگەرىس ەنگىزدى. پالەندەي وزگەرىپ كەتكەن ەشتەڭە جوق. سول ۇكىمەت. سول قۇرام. تەك ورىندارى عانا اۋىسىپ وتىراتىنى بولماسا، بۇل سوڭعى 10 جىلدا پرەزيدەنت پارمەنىمەن جاسالاتىن روكيروۆكا قالىپقا اينالعان. وعان اقوردا دا، جۇرت تا ۇيرەنگەن.

كادرلىق كريزيس. زەينەتكەرلەر

كادرلىق كريزيسكە ۇشىراپ، اقوردانىڭ تىعىرىققا تىرەلگەنىنە ءبىراز ۋاقىت ءوتتى. پرەزيدەنت پارتيالاستارىنىڭ ىشىنەن وزىنە سەرىك ەتكەندەرى ەندىگى ساياسي بەلسەندىلىگى، ساياسي دەيمىز-اۋ، ادامي بەلسەندىلىگى السىرەگەن، بۇكىربەل پەنسيونەرگە اينالعان. سوندا دا كوڭىلجىقپاستىقپەن، الگىلەردىڭ كەيبىرىن سەنات دەيتىن پانسيوناتقا وتىرعىزسا، ەتى تىرىلەرىنىڭ وكىلەتتىگىن 2025-2028 جىلعا دەيىن سوزىپ بەردى. ءجا، اڭگىمە ول تۋرالى ەمەس، قازىر.

ساياساتتانۋشىلار ءھام ساياساتكەرلەر سوڭعى ۋاقىتتا سايلاۋ تۋرالى ءسوز ەتە باستادى. كۇز كەلىسىمەن، اقوردا جاقتا اۋا-رايى اۋىسادى، ۇكىمەت قايتا جاساقتالادى ەكەن. اۋىس-ءتۇيىستىڭ اۋىلى الىس ەمەس دەگەن اۋانداعى ءارتۇرلى بولجامدار ايتىلا باستادى.

ءبىر بىلگىشتەر يمانعالي نۇرعاليۇلىن ەلگە قايتارادى دەسە، ەندى ءبىر بىلگىشتەر بيلىككە سىرتتاعى ساياسي ديسسيدەنتتەر كۇشى كەلەدى ء(بىز ءابلازوۆ دەگەن اككى قۋدى ەمەس، قاجىگەلديندى مەڭزەپ وتىرمىز) ەكەن دەگەن اڭگىمەلەر ايتىلا باستادى.

قالاي بولعاندا دا، قازىر ەل-جۇرتتىڭ سايلاۋ قۇقى بار دا، سايلانۋ قۇقى جوق. ءبىر انىعى – بيلىك ءترانزيتى ءتۇبى ءسوزسىز بولادى. بيلىك ءترانزيتىنىڭ ەكى جولى بار. ءبىرىنشىسى – وزبەكستان ۇلگىسىندە، ىڭ-شىڭسىز ءوتۋ. ەكىنشىسى – ارمەنيا مەن ۋكراينا ۇلگىسىندە رەۆوليۋتسيالىق جولمەن ءوتۋ.

ارينە، بىزگە وزبەكستان ۇلگىسى ءتيىمدى. قازىرگى گەرونتوكرات بيلىككە دە كەرەگى وسى جول. ول ءۇشىن – حالىققا سايلاۋ قۇقىعى عانا ەمەس، سايلانۋ قۇقىعى دا بەرىلۋى ءتيىس.

ەندىگى ماسەلە مىناۋ. ساياساتتانۋشىلار بولجاعانداي، وسى كۇزدە بيلىكتە وزگەرىس بولىپ جاتسا، ۇكىمەتتىڭ جاڭا قۇرامى قانداي بولۋى كەرەك؟ وندا كىمدەر بولۋى كەرەك؟ ءبىز ءوز كارتينامىزدى ءتۇزىپ شىقتىق. ول سىزگە ۇناماۋى بەك مۇمكىن. دەگەنمەن، ول ءبىزدىڭ سۋبەكتيۆتى پىكىرىمىز. ءسىز دە ەرتەڭگى ۇكىمەتتەن ءوزىڭىز كورگىڭىز كەلگەن كانديداتتى ۇسىنىڭىز. ۇسىنا الاسىز! ەندەشە ءبىزدىڭ نۇسقا، مىنەكەيىڭىز...

جاڭا ۇكىمەتتەن كىمدەردى كورگىمىز كەلەدى؟

قر ۇكىمەتباسى – ءامىرجان ساعيدراحمانۇلى قوسانوۆ.

ءامىرجان قوسانوۆ – 54 جاستا، قازىر. زەينەتكە شىعۋعا 9 جىلى بار. ساياساتكەر. 1991 جىلدارى جاستار ءىسى جونىندەگى مەمكوميتەتتە ىستەدى. 1994-تە جاستار ءىسى، سپورت جانە تۋرزيم ءمينيسترىنىڭ ورىنباسارى بولدى.

اكەجەن قاجىگەلدين كومانداسى ۇكىمەت باسقارعان جىلدارى (1994-1997 جىلدار) ۇكىمەت باسىنىڭ، ۇكىمەتتىڭ ءباسپاسوز قىزمەتىن باسقاردى.

قرحپ پارتياسى قۇرىلعاندا، اكەجان قاجىگەلديننىڭ ورىنباسارى بولدى. سول پارتيانىڭ اتقارۋشى توراعاسى قىزمەتىن اتقاردى. سونداي-اق، قازاقستاننىڭ دەموكراتيالىق كۇشتەرى فورۋىمىنىڭ ارقارۋشى توراعاسى بولدى. سونىمەن قاتار، جسدپ، ازات پارتيالارىندا دا بەلسەندى قىزمەت ىستەدى.

ساياسي كوزقاراسى ادەكۆاتتى، جاڭاشىل پىكىرلەرىمەن قوعامدىق ماسەلەلەردىڭ باسى-قاسىندا جۇرگەن بەلدى ساياساتكەر. جاڭا قۇرىلعان «جاڭا قازاقستان» فورۋمىنىڭ وكىلى.

كلاندار بولىسكە سالعان بيلىك پەن ەكونوميكانى، وعان ماقۇلباس قوعامدى وزگەرتۋدىڭ دەموكراتيالىق جولىن، ساياسي رەفورمالاردىڭ ەففەكتيۆتى ۇلگىسىن ۇسىنىپ ايتىپ ءجۇر. ءامىرجان قوسانوۆتىڭ ساياسي ۇسىنىستارى «Abai.kz» اقپاراتتىق پورتالىندا ءجيى جاريالانىپ تۇرادى. سول جەردەن وقىپ الارسىزدار.

ال ءبىز ۇكىمەت باسىنىڭ ورىنباسارلارىنا كىمدى ۇسىنامىز دەگەن سۇراققا اۋىسايىق.

قازىرگە دەيىن ۇكىمەتباسىنىڭ 4 ورىنباسارى بولىپ كەلدى. ءبىز ءۇش ورىنباسارعا قىسقارتتىق.

قر پرەمەر-ءمينيستردىڭ ءبىرىنشى ورىنباسارى – سەرىك احمەتوۆ.

ءيا، قر كونستيتۋتسياسىنا سايكەس، سوتتالعان ازاماتتار ساياسي قىزمەتكە الىنبايدى. دەگەنمەن، بۇل ءبىزدىڭ ويىمىزداعى كانديدات. سەرىك نىعمەتۇلى احمەتوۆ ءوز ۋاعىندا ۇكىمەت باسقاردى. پرەزيدەنت اكىمشىلىگىندە قىزمەت ىستەدى. قاراعاندىدا اكىم بولدى. ۇكىمەتتە ۇزاق جىل ءجۇردى. 2012 جىلى ۇكىمەتباسى بولىپ تاعايىندالىپ، 2014 جىلى پرەزيدەنتتىڭ پارمەنىمەن وتستاۆكاعا كەتكەن.

ول ۇكىمەتتى باسقارىپ تۇرعان جىلدارى بيلىكتەگى كلانارالىق شايقاستىڭ قۇربانى بولدى دەيدى، بىلەتىندەر. اسىرەسە، بيلىك پەن ەكونوميكانى ءوزارا بولىسكە سالعان كەيبىر لوببيلىك توپتاردىڭ جولىن كەسكەنى ايتىلادى.

ءبىز دە ءبىر مىسال كەلتىرەيىك، 2012 جىل. 5-جەلتوقسان. ۇكىمەت باسشىسى سەرىك احمەتوۆ ۇكىمەت وتىرىسى مەن مەملەكەتتىك جيىنداردى مەملەكەتتىك تىلدە وتكىزۋ تۋرالى شەشىم قابىلدادى.

سەرىك احمەتوۆتىڭ وزگەلەردەن تاعى ءبىر ارتىقشىلىعى – باسقارۋ ىسىندە كابينەتتىك ستيلگە يەك ارتپاي، وبلىستاردى، وڭىرلەردى ارالاپ، جۇرتتىڭ تۇرمىس جاعدايىن ءوزى كورىپ قايتاتىن. ول زام-پرەمەر كەزىندە دە ەرتەڭنەن قارا كەشكە دەيىن كابينەتىندە تاڭىلىپ وتىرماي وبلىستاردى ارالاۋعا ءجيى شىعاتىن. تاعى ءبىر ايتا كەتەرلىگى،  سەرىك احمەتوۆ 2011 جىلدىڭ جەلتوقسانىندا قاندى وقيعاعا ورىن العان جاڭاوزەنگە ەكى رەت بارىپ، قايعى جۇتقان جەرگىلىكتى جۇرتپەن، قامكوڭىل مۇنايشىلارمەن اشىق سويلەسىپ، ولاردىڭ مۇڭ-مۇقتاجىن تىڭداپ قايتۋىن ناعىز ازاماتتىققا، باتىلدىققا بالار ەدىك.

قر پرەمەر-ءمينيستردىڭ ورىنباسارى – راسۋل جۇمالى.

راسۋل جۇمالىنى جۇرت جاقسى بىلەدى. ساياساتتانۋشى. وتكىر ءتىلدى التەرناتيۆتى پىكىر يەسى. 1992-2007 جىلدار ارالىعىندا مەملەكەتتىك قىزمەتتە بولعان. قازاقستان رەسپۋبليكاسىنىڭ سىرتقى ىستەر مينيسترلىگىندە جانە ۇكىمەتىندە، سونداي-اق مىسىر، بىرىككەن اراب امىرلىكتەرى، يزرايل، ليبيا، بىرقاتار باسقا مەملەكەتتەردە جۇمىس اتقارعان. 2007 جىلدان بەرى «ەكسكليۋزيۆ» جورنالىنىڭ باس رەداكتورى. 150-گە تارتا ماقالالارى مەن ساراپتامالىق ەڭبەكتەرى جارىق كوردى. «گەوپوليتيكا تسەنترالنوي ازي. و بىلوم ي ناسۋششنوم» اتتى كىتاپتىڭ اۆتورى.

قازىرگى ساياسي جۇيەنىڭ داعدارىسىندا راسۋل جۇمالىداي بىلىكتى كادر كەرەك-اق.

قر پرەمەر-ءمينيستردىڭ ورىنباسارى – دينا ەلگەزەك.

نەگە دينا ەلگەزەك؟ ويتكەنى، ول قازىرگى بيلىكتەگى كادرلىق ساياساتتى ءجيى سىن تەزىنە الادى. سىناعان ادامنىڭ وزىنە لاۋازىم بەرىپ، ونىڭ دا قارىم-قابىلەتىن بايقاپ كورۋ كەرەك دەپ ويلايمىز.

ونىڭ ۇستىنە دينا ەلگەزەك جۋرناليستيكادان ىسىلىپ شىققان ساقا مامان. حالىقتىڭ مۇڭ-مۇقتاجىن جاقسى بىلەدى.

ەندى مينيسترلەر كابينەتىنە كەلەيىك. قازىر ءبىزدىڭ ەلدىڭ ۇكىمەتىندە 16 مينيسترلىك بار ەكەن.

قر ىشكى ىستەر ءمينيسترى – يمانعالي تاسماعامبەتوۆ.

قازاقستاننىڭ ىشكى ىستەر مينيسترلىگىن تاپجىلماي 7 جىلدان اسا ۋاقىت باسقارىپ كەلە جاتقان قالمۇحامبەت قاسىموۆتىڭ وتستاۆكاسىن جۇرت تالاپ ەتتى. نەگە؟ قازاقشاعا، قازاققا جانى قاس قاسىموۆتىڭ ىشكى ىستەر مينيسترلىگىندەگى بار قىزمەتىن تىكەلەي جاڭاوزەن وقيعاسىمەن بايلانىستىرۋعا بولادى. جاڭاوزەندە جۇرتقا وق اتقان مينيستر بۇل. «تاعى شىقسا تاعى اتامىز» دەگەن مينيستر بۇل. ونىڭ مينيستر بولعان تۇسىندا قازاقستاندا قىلمىس كوبەيگەندىگىن ناقتى ستاتيستيكامەن جازدىق، وتكەن جولى.

جالپى، بۇل لاۋازىمعا كىم لايىق دەگەن سۇراققا ۇزاق باس قاتىردىق. ءبىر وكىنىشتىسى شەندى ازاماتاردىڭ ىشىنەن وزىندىك ناقتى  پوزيتسياسىمەن ەلگە كورىنە بىلگەن، قوعامدىق تالقىلاۋعا ءازىر، ديالوگشىل پوليتسەي جوق ەكەن. ءبىز ارى ويلانىپ، بەرى ويلانىپ، ونداي ادامدى ەسىمىزگە تۇسىرە المادىق.

ءبىر انىعى – قازاقستاننىڭ ىشكى ىستەر مينيسترلىگىنە ۇلكەن رەفورما قاجەت. ال ونى جاسايتىن تۇلعا ءوز ىشتەرىندە جوق. سوندىقتان، بۇل قىزمەتكە ءبىز – يمانعالي تاسماعامبەتوۆتى لايىق دەپ بىلەمىز.

قر سىرتقى ىستەر ءمينيسترى – قايرات ءابدىراحمانوۆ.

قايرات قۇدايبەرگەنۇلى ءابدراحمانوۆتىڭ ەل ىشىندە ءيميدجى جوعارى دەي المايمىز. دەگەنمەن، ونىڭ سىرتقى ىستەر مينيسترلىگىن باسقارۋداعى تاجىربيەسى جوعارى ەكەنى داۋسىز. سىرتقى ىستەر مينيسترلىگى – مەملەكەتتىڭ سىرتقى ءيميدجى.

ءابدىراحمانوۆ تۇسىندا قازاقستان بۇۇ قاۋىپسىزدىك كەڭەسىنە توراعالىق ەتتى. قازاقستان حالىقارالىق ساياساتتا بەيبىت بىتىمگەرلىكتىڭ الاڭىنا اينالدى. سيريا ماسەلەسىندە داۋلاسقان تاراپتار استانادا باس قوستى. بىلايعى كۇندە قارۋ اسىنىپ، اتىسىپ جۇرگەن ەكى تاراپ ءبىر ۇستەلدە كەلىسىم جاساستى. داۋلى كاسپي ماسەلەسى دە ويداعىداي شەشىلدى.

ونىڭ ۇستىنە قازىرگى قازاقستان مەن قىتاي اراسىنداعى ەتنيكالىق قازاقتار ماسەلەسىندە قايرات ءابدىراحمانوۆ كومانداسى بىرقاتار جۇمىستاردى قولعا الىپ، اتقارىپ كەلەدى. دەمەك، قايرات قۇدايبەرگەنۇلى باستاپ قولعا العان، قىتايداعى قازاق ماسەلەسى شەشىمىن تاۋىپ، ءتۇيىنى شەشىلگەنگە دەيىن مينيسترلىك قىزمەتىنە مۇرسات بەرگەن ءجون.

قر قورعانىس ءمينيسترى – ساكەن جاسۇزاقوۆ.

نەگە ساكەن جاسۇزاقوۆ؟ وتكەندە عانا پرەزيدەنت نازارباەۆ قىزمەتىنەن بوساتقان ساكەن جاسۇزاقوۆ شىن مانىندە اسكەري ادام. جاسۇزاقوۆقا دەيىن قازاقستاننىڭ قورعانىسىن بىرنەشە اسكەري ەمەس ازاماتتار باسقاردى.

ەكى جىل قورعانىس ءمينيسترى بولعان جاسۇزاقوۆتىڭ اسكەري سالاداعى تاجىريبەسى قانداي ەدى؟ جاسۇزاقوۆ دەگەن كىم؟

ول 21 جاسىندا الماتىداعى جالپى اسكەري كوماندالىق ۋچيليششەسىن بىتىرگەن. 1978-1987 جىلدارى بالتىق بويى اسكەري وكرۋگىندە بارلاۋ ۆزۆودىنىڭ كومانديرى، بارلاۋ روتاسىنىڭ كومانديرى، جەكە بارلاۋ باتالونى شتابىنىڭ باستىعى سەكىلدى قىزمەت باسپالداعىنان ساتىلاي كوتەرىلگەن ازامات. اۋعان سوعىسىندا "قارا مايور" دەگەن اتپەن بۇكىل الەمدى مويىنداتقان بوريس كەرىمباەۆتىڭ قولاستىندا ءجۇرىپ، مايداننىڭ ءوتىن دە كورگەن.

ول مينيستر بولعان تۇستا اسكەري گارنيزونداردا سپورت كەشەندەرى، تۇرعىن ۇيلەر مەن جاتاقحانالار سالىندى. جانە ءبىزدىڭ اسكەر دالالىق جەرلەردە جەدەل جانە اسكەري دايىندىق بويىنشا 250-دەن استام ءىس-شارا وتكىزدى.

ءبىز بۇل قىزمەتكە اۋەلدە اۋعان كورگەن باتىر باقىتجان ەرتاەۆتى ۇسىنباقشى ەك. باقىتجان ەرتاەۆ قازىر 66-دا. زەينەتكەر.

قر قورعانىس جانە اەروعارىش ءمينيسترى – ايدىن ايىمبەتوۆ.

ءيا، بىزدە قورعانىس مينيسترلىگىنەن بولەك قورعانىس جانە اەروعارىش مينيسترلىگى بار. بۇرىنعى قازعارىش اگەنتتىگىنىڭ نەگىزىندە قۇرىلعان مينيسترلىك. قازاقستاننىڭ عارىش سالاسىندا قوردالانىپ جاتقان پروبلەمالارى از ەمەس. ءبىر «بايقوڭىردى» ايتساق تا جەتكىلىكتى. رەسەيگە 2050 جىلعا دەيىن جالعا بەرىپ قويدىق. بولماشى تيىن-تەبەنگە.

ءبىرىنشى بۇل مينيسترلىككە كىم لايىق؟ «ەشكى سويسا دا قاساپشى سويسىن» دەگەن ءسوز بار. عارىش سالاسىنداعى ماسەلەلەردى ءبىر بىلسە ايىمبەتوۆ بىلەدى. ايىمبەتوۆ قازاقتان شىققان ءۇشىنشى عارىشكەر. قايسىبىر جىلى ءوزىمىزدىڭ بايقوڭىردان ايىمبەتوۆتى عارىشقا ۇشىرۋ ءۇشىن رەسەيگە 20 ميلليارد تولەگەن ەدىك.

ەكىنشى ماسەلە – اتالعان مينيسترلىكتى تاراتىپ، ونى قر قورعانىس مينيسترلىگىنىڭ كوميتەتى رەتىندە قايتا جاساقتاۋعا دا بولاتىنىن ەسكەرتە كەتكىمىز كەلەدى.

قر ينۆەستيتسيا جانە دامۋ ءمينيسترى – ساياسات نۇربەك.

نە ءۇشىن بۇل ورىنعا ساياسات نۇربەك لايىق؟ ساياسات نۇربەك – «بولاشاقتىق» كادر. جوعارعى لاۋازىمدى قىزمەتتەردە بولماعانىمەن، مەملەكەتتىك قىزمەتتە جۇرگەن ادام.  زامان اعىمىنداعى جاڭاشىل قاعيدالار وعان ەتەنە تانىس. ءبىلىمى دە جەتەدى.

قر ەڭبەكپەن قامتۋ جانە حالىقتى الەۋمەتتىك قورعاۋ ءمينيسترى – راقىم ايىپۇلى.

تاۋەلسىزدىك العان 27 جىلدىڭ ىشىندە ەلىمىزگە ميلليوننان استام قانداس كەلدى. ولار قازىر ۇلكەن الەۋمەتتىك توپقا اينالدى. ولاردىڭ پروبلەمالارى الداعى ون جىلدا شەشىلىپ بىتە قويمايتىن ماڭىزدى ماسەلەگە اينالارىن ۋاقىت كورسەتىپ وتىر. وسى ۋاقىتقا دەيىن ورالمانداردان ءبىر مينيستر تاعايىنداماعانىمىز تاعى بار. شەتتە وقىپ، الىپ ەلدىڭ تاجىيبەسىن بويىنا سىڭىرگەن راقىم سەكىلدى ازاماتتاردىڭ پوتەنتسيالىن پايدالانۋ - بىزگە مىندەت.

قر ءبىلىم جانە عىلىم ءمينيسترى – مۇرات ابەنوۆ.

مۇرات ابەنوۆ اتالعان مينيسترلىكتە قىزمەت ىستەگەن ادام. بۇل ازاماتتى قوعامنىڭ جاسى دا، جاسامىسى دا جاقسى تانيدى.  ابەنوۆتە ءبازبىر شەنەۋنىكتەر سياقتى وكتەم مىنەز جوق. قاشان دا ەل-جۇرتپەن توننىڭ ىشكى باۋىنداي ارالاس-قۇرالاس. پارلامەنت ءماجىلىسىنىڭ دەپۋتاتى بولعان تۇستا كەز كەلگەن قوعامدىق، ۇلتتىق ماسەلەگە ءوز كوزقاراسىن اشىق ءبىلدىرىپ جۇرەتىن.

ابەنوۆ دەگەندە ءتىلشى قاۋىمنىڭ ەسىنە نە تۇسەدى؟ «الماتى» تەلەارناسىندا قازاقتىلدى جۋرناليستەرگە قىسىم كورسەتىلىپ، كەيبىر ۇلتتىق ماسەلەلەر جونىندەگى حابارلاردى ەفيرگە جىبەرۋگە تىيىم سالىنعاندا جۋرناليستەرگە اراشا ءتۇسىپ، پارلامەنتتە تالقى جاساعان دا وسى ازامات. اششى شىندىقتى ايتامىن دەپ، حالىقتىڭ مۇڭىن جەتكىزەتىن ورنىنان بوساپ قالعانى دا سوندىقتان.

ول «سەرپىن» باعدارلاماسى ارقىلى وڭتۇستىك جاستارىن سولتۇستىككە اپاردى.

ەكس-ۆيتسە-مينيستر جەر داۋى كەزىندە قۇرىلعان كوميسسيادا دا جاقسى جۇمىس اتقاردى. ءبىلىم سالاسىنداعى ولپى-سولپى، قىڭىر-قيسىق رەفورمالاردى اشىق سىناعان ادام. ەندەشە اتالعان قىزمەتتە تىڭ رەفورما جاساۋعا ابەنوۆتىڭ ءالى جەتەدى دەپ ەسەپتەيمىز.

ال ابەنوۆتىڭ ورىنباسارى قىزمەتىنە بەلگىلى ۇستاز ايمان ساعيدوللا مەن اياتجان احمەتجانۇلىن ۇسىنار ەدىك.

قر اۋىلشارۋاشىلىق ءمينيسترى – تالعات ەرمەگياەۆ.

تالعات امانگەلدىۇلى ءوز ءىسىن جاقسى اتقارا الاتىن ادام. ول باسشىلىق قىزمەتتە بولعان تۇستا قازاقستان سپورتشىلارى حالىقارالىق دەڭگەيدە قازاقستان اتىن شىعاردى. كوك تۋىمىزدى كوكتە جەلبىرەتتى.

تالعات تا بەلگىلى ءبىر دەڭگەيدە ساياسي شايقاستىڭ قۇربانى بولعان ادام. تالعاتتىڭ كاپيتالى بار. قازىر تۇرالاپ قالعان اۋىلشارۋاشىلىعىن ءدال وسى تالعات ەرمەگياەۆتىڭ قولىنا تاپسىرار بولساق، ىلگەرىلەۋ بولار دەگەن ءۇمىتىمىز دە جوق ەمەس.

قر ۇلتتىق ەنەرگەتيكا ءمينيسترى - قانات بوزىمباەۆ

ەلىمىزدە ەنەرگەتيكا سالاسىندا ازىرگە قانات بوزىمباەۆتىڭ ورنىن باساتىنداي كانديدات جوق. سوندىقتان دا، بۇل لاۋازىمدى وزىندە قالدىرۋدى ءجون سانادىق.

قر ادىلەت ءمينيسترى – اۋىت مۇقيبەك.

 

ادىلەت ءمينيسترى نەگە اۋىت مۇقيبەك بولۋى كەرەك؟ اۋكەڭ زاڭ شىعارۋ ىسىندە ءوزىنىڭ قابىلەتىن انىق كورسەتكەن ادام. اسىرەسە، كوشى-قون زاڭىن ءتۇزىپ، قابىلداۋدا اۋىت مۇقيبەكتىڭ تاجىربيەسى دە ەڭبەگى دە زور ەكەنى داۋسىز. جانە اۋىت مۇقيبەك قوعامنىڭ كەز كەلگەن وكىلىمەن اشىق ديالوگ جاساي الادى. ءبىلىم-بىلىگى دە جەتكىلىكتى.

قر ۇلتتىق ەكونوميكا ءمينيسترى – بولات جامىشەۆ.

جامىشەۆ قازىرگى بيلىك جۇيەسىندەگى بىربەتكەي تۇلعا. جامىشەۆتىڭ ەكونوميكالىق ساۋاتى ەلدىڭ ەكونوميكاسىن داعدارىستىق تىعىرىقتان شىعارۋعا جەتكىلىكتى دەپ ەسەپتەدىك.

ءبىر جىلدارى، اقوردادا جيىن ءوتىپ، كابميننىڭ مۇشەلەرىن ءبىر-بىرلەپ سىناپ، بىقبىرت تيگەندەي ەتكەن ەلباسى «قازىنانىڭ قارجىسىن وڭدى-سولدى جۇمسايسىڭ» دەپ باقىت سۇلتانوۆتى سوككەن. سونداعى ءسوزى: «جامىشەۆتى سەنىڭ ورنىڭا قويۋ كەرەك. ءيا، ول ەشكىمگە ۇنامايدى. ول ماعان دا ۇنامايدى. الايدا ول قارجىعا ۇقىپتى» دەپ ەدى. سول ەلباسىدان تارتىپ، ەشكىمگە ۇنامايتىن جامىشەۆكە جانە ءبىر مۇمكىندىك بەرۋگە ابدەن بولادى.

قر قارجى ءمينيسترى – مۇحتار جاكىشەۆ.

جاكىشەۆ قازىر قاماۋدا. الايدا ول دا كلانارالىق تارتىستىڭ جەڭىلگەن ويىنشىسى. دەگەنمەن جاكىشەۆ «قازاتومپرومدى» باسقارىپ تۇرعان تۇستا قازاقستان نارىعىنا رەسەيدى دە، قىتايدى دا كىرگىزبەي ۇستاي بىلگەن ەدى. جاكىشەۆتىڭ كەيبىر لوببيلىك توپتاردىڭ ىعىنا جىعىلىپ كەتپەيتىن قىڭىرلىعى بار. ول بىلىكتى مامان. ءبىلىمدى ساياساتكەر.

قر قوعامدىق دامۋ ءمينيسترى – دارحان كالەتاەۆ.

دارحان كالەتاەۆتىڭ مينيسترلىگى قۇرىلعانىنا، جاساقتالعانىنا از عانا ۋاقىت بولدى. سوندىقتان، دارحان كالەتاەۆ اتالعان مينيسترلىكتە ءوزىن بار قىرىنان كورسەتە الدى دەپ ەسەپتەمەيمىز. سوندىقتان، ونى وسى قىزمەتتە قالدىرۋدى ءجون كوردىك. ءوزىن كورسەتۋگە جانە ءبىر مۇمكىندىك بەردىك.

قر اقپارات جانە كوممۋنيكاتسيالار ءمينسيترى – داۋرەن اباەۆ.

قر مادەنيەت جانە سپورت ءمينيسترى – ارىستانبەك مۇحامەديۇلى.

قر دەنساۋلىق ساقتاۋ ءمينيسترى – ەلجان ءبىرتانوۆ.

بۇل ءۇش مينيسترلىكتىڭ مينيسترلەرىن ءوز قىزمەتتەرىندە قالدىرۋدى ۇسىنار ەدىك. سەبەبى، پىكىر ارالۋاندىلىعى بولعانىمەن، اتالعان مينيسترلدىك تاراپىنان اتقارىلىپ جاتقان شارۋالار از ەمەس. ادىلدىگىن ايتۋ كەرەك-اق.

 

ەندى ۇكىمەتكە كىرمەيتىن بىرەر قىزمەتتەرگە دە لايىقتى تۇلعالاردى ايتا كەتسەك. كەلەسى جولى وبلىس باسشىلارىن ءتۇزىپ شىقپاقپىز. وعان دەيىن مىنا ءتورت مىنبەنى ءتورت ازاماتقا ۇسىنساق...

قر ۇلتتىق قاۋىپسىزدىك كوميتەتى توراعاسى – ماقسات ءىلياسۇلى.

قر باس پروكۋرورى – ابزال قۇسپان.

قر ۇلتتىق بانك توراعاسى - دوسىم ساتپاەۆ.

قر سىبايلاس جەمقورلىقپەن كۇرەس اگەنتتىگى توراعاسى – داۋرەن بابامۇراتوۆ.

ءتۇيىن. بۇل ءبىزدىڭ نۇسقامىزداعى جاساقتالاتىن جاڭا ۇكىمەت. الداعى ۋاقتا "Abai.kz" اقپاراتتىق پورتالى بەلگىلى ساياساتكەرلەر مەن قوعام قايراتكەرلەرىنىڭ دە نۇسقاسىن ۇسىناتىن بولادى. اتالعان ساۋالناماعا ءسىز دە قاتىسا الاسىز، قۇرمەتتى وقىرمان؟ ءوز پىكىرىڭىزدى جازىڭىز. ءوز ويىڭىزبەن ءبولىسىڭىز؟ ال ءسىز كىمدى ۇسىنار ەدىڭىز؟

نۇرگەلدى ابدىعانيۇلى

Abai.kz