ەلباسى دەپۋتاتتار الدىندا سويلەگەن سوزىندە حالىق قالاۋلىلارىن پارلامەنتتىڭ جاڭا سەسسياسىنىڭ اشىلۋىمەن قۇتتىقتاپ، التىنشى شاقىرىلىمنىڭ دەپۋتاتتىق كورپۋسى جوعارى كاسىبيلىك كورسەتىپ، ۇكىمەتپەن ءوزارا ۇيلەسىمدى ىقپالداستىق تانىتقانىن اتاپ ءوتتى.

– پارلامەنتتىڭ ءۇشىنشى سەسسياسىنىڭ قورىتىندىسى بويىنشا 87 زاڭ قابىلداندى، سونىڭ ىشىندە مەن جاريالاعان «بەس الەۋمەتتىك باستامانىڭ» ءتيىستى نورماتيۆتىك قۇقىقتىق نەگىزى قالىپتاستى. بۇل التى ميلليوننان استام قازاقستاندىقتىڭ ءال-اۋقاتىن ارتتىرىپ، ءوسىپ-وركەندەۋىمىزدىڭ باستى شارتى سانالاتىن حالقىمىزدىڭ بىرلىگىن نىعايتۋعا مۇمكىندىك بەرەدى، – دەدى نۇرسۇلتان نازارباەۆ.

مەملەكەت باسشىسى ەلىمىزدىڭ ەكونوميكالىق جەتىستىكتەرىنە ارنايى توقتالدى.

– قازاقستانداعى ىشكى جالپى ءونىم 4 پايىزعا ارتتى، ينفلياتسيا 5,9 پايىزعا تومەندەدى، ينۆەستيتسيا كولەمى 24 پايىزعا ءوستى. ەكونوميكا مەن قوعامنىڭ ءتيىمدى جاڭعىرۋىنا قاجەتتى جاعدايلار جاسالۋدا. ءبىز بىلتىردان باستاپ ەكونوميكانىڭ الەمدەگى ورتاشا دامۋ قارقىنىنان وزا باستادىق. وڭدەۋ ونەركاسىبى، كولىك جانە قىزمەت كورسەتۋ سالالارى سياقتى شيكىزاتتىق ەمەس سەكتورلار ەكونوميكالىق ءوسىمنىڭ قوزعاۋشى كۇشىنە اينالدى، – دەدى قازاقستان پرەزيدەنتى.

ەلباسى ءارى قاراي دايەكتى الەۋمەتتىك-ەكونوميكالىق دامۋ ءۇشىن ساپالى زاڭ شىعارۋ جۇمىسىن جالعاستىرۋ قاجەت ەكەنىن ايتتى.

– ءوزىن-ءوزى جۇمىسپەن قامتىعانداردى مەديتسينالىق جانە الەۋمەتتىك ساقتاندىرۋ، سونداي-اق زەينەتاقىمەن قامتۋ جۇيەسىنە تارتۋ – ماڭىزدى ماسەلەلەردىڭ ءبىرى. ءتيىستى وزگەرىستەردى وسى جىلدىڭ سوڭىنا دەيىن قابىلداۋ قاجەت. بۇل، اسىرەسە، مىندەتتى الەۋمەتتىك مەديتسينالىق ساقتاندىرۋ جۇيەسىنە كوشۋ، مەديتسينالىق كومەكتىڭ كەپىلدىك بەرىلگەن كولەمىنىڭ جاڭا مودەلىن ەنگىزۋ، قوعامدىق دەنساۋلىقتى ساقتاۋ ماسەلەلەرىن جانە مەديتسينالىق مەكەمەلەردە كورپوراتيۆتىك باسقارۋ جۇيەسىن جەتىلدىرۋ جۇمىستارىنا بايلانىستى بولعاندىقتان اسا وزەكتى سانالىپ وتىر، – دەدى نۇرسۇلتان نازارباەۆ.

مەملەكەت باسشىسى قۇرىلىستىڭ قارقىندى دامۋىنا بايلانىستى تۇرعىن ءۇي-كوممۋنالدىق شارۋاشىلىعى سالاسىندا تۇرعىنداردى قاناعاتتاندىرمايتىن كۇرمەۋلى ماسەلەلەردىڭ بار ەكەنىن اتاپ ءوتىپ، جالپى ءۇي شارۋاشىلىعى باسقارماسىنىڭ تۇسىنىكتى ءارى ءتيىمدى جۇيەسىن قۇرۋ كەرەكتىگىن، سونىمەن قاتار بۇل جۇيەنىڭ قىزمەت كورسەتۋشى كومپانيالار مەن تۇرعىندار اراسىنداعى قارىم-قاتىناستىڭ اشىقتىعى قاعيداتىنا، سونداي-اق قاراجات شىعىنى مەن مونوپوليستەردىڭ جاۋاپكەرشىلىگىن باقىلاۋعا نەگىزدەلۋى ءتيىس ەكەنىن ايتتى.

نۇرسۇلتان نازارباەۆ ورتا جانە شاعىن بيزنەستى دامىتۋ بارىسىنداعى وڭ ۇردىستەرگە توقتالىپ، تۋريزم سالاسىنىڭ كاسىپكەرلىكتى دامىتۋعا تىڭ سەرپىن بەرۋى قاجەت ەكەندىگىن اتاپ ءوتتى.

– ۇكىمەتكە ءتۋريزمدى دامىتۋدىڭ 2023 جىلعا دەيىنگى مەملەكەتتىك باعدارلاماسىن ازىرلەۋ تاپسىرىلدى. بۇل قۇجات جىل سوڭىنا دەيىن قاراستىرىلىپ، قارجىلىق تۇرعىدان قاجەتتى زاڭنامالىق بازا ارقىلى بەكىتىلۋگە ءتيىس. سونىمەن قاتار، پارلامەنتتە مەملەكەتتىك ساتىپ الۋ جانە كۆازيمەملەكەتتىك سەكتور ءۇشىن ساتىپ الۋ ماسەلەلەرىنە قاتىستى زاڭ جوباسى بار. وسى قۇجات اتالعان پروتسەستى جەڭىلدەتۋگە، ونىڭ تيىمدىلىگىن ارتتىرۋعا، سىبايلاس جەمقورلىق قاتەرىن تومەندەتۋگە، باسىم باعىتتاردى ىسكە اسىرۋ ءۇشىن قارجى بولۋگە جانە بيزنەس احۋالىن جاقسارتۋعا مۇمكىندىك بەرەدى، – دەدى قازاقستان پرەزيدەنتى.

مەملەكەت باسشىسى اگروونەركاسىپ كەشەنى سالاسىنداعى زاڭنامانى، سونىڭ ىشىندە ساقتانداندىرۋ، اگرارلىق قولحاتتاردى ەنگىزۋ، نەسيەلىك سەرىكتەستىكتەردى دامىتۋ، سونداي-اق ۆەتەريناريا سالاسىندا باقىلاۋ جۇيەسىن وڭتايلاندىرۋ ماسەلەلەرىن ودان ءارى جەتىلدىرۋ قاجەتتىگىنە توقتالدى.

– قوعامدىق سانانى جاڭعىرتۋعا ارنالعان «رۋحاني جاڭعىرۋ» باعدارلاماسىنىڭ ماڭىزدى مىندەتتەرىنىڭ ءبىرى تاريحي-مادەني مۇرانى ساقتاپ، كەڭىنەن تانىتۋدى قامتاماسىز ەتۋ بولىپ سانالادى. ءتيىستى زاڭ جوباسىن قابىلداۋ ۇزدىك الەمدىك تاجىريبەگە سايكەس تاريحي ءارى كيەلى نىسانداردى ءتيىمدى دامىتۋعا، قورعاۋعا سەپتىگىن تيگىزەدى، – دەدى نۇرسۇلتان نازارباەۆ.

شىمكەنتكە رەپۋبليكالىق ماڭىزى بار قالا مارتەبەسى بەرىلۋىنە جانە تۇركىستان وبلىسىنىڭ قۇرىلۋىنا بايلانىستى قازاقستان پرەزيدەنتى پارلامەنتتىڭ قاراۋىنا قايتا قۇرىلعان اكىمشىلىك-اۋماقتىق بىرلىكتەردىڭ تولىققاندى جۇمىسىن قامتاماسىز ەتۋگە باعىتتالعان زاڭ جوبالارى ەنگىزىلەتىنىن جانە ولاردىڭ شۇعىل قارالىپ، قابىلدانۋى كەرەكتىگىن ايتتى.

جيىن سوڭىندا مەملەكەت باسشىسى دەپۋتاتتاردى سەسسيانىڭ اشىلۋىمەن تاعى دا قۇتتىقتاپ، قازاقستاننىڭ تۇراقتى ءارى قارقىندى دامۋ ىسىندە ودان ءارى تابىسقا جەتە بەرۋىنە تىلەكتەستىك ءبىلدىردى.

Abai.kz