الماتىنىڭ الاتاۋ اۋدانىندا قۋاتى جىلىنا 550 مىڭ توننا تۇرمىستىق قاتقىل قالدىقتاردى وڭدەيتىن قوقىس سۇرىپتاۋ كەشەنى ىسكە قوسىلدى، سونىڭ ارقاسىندا پوليگوندا تەك قانا ينەرتتى قاۋىپسىز جانە بيوىرىگىش ماتەريالدار كومىلەتىن بولادى.

كاسىپورىندا قايتا وڭدەۋ ءۇشىن 50 مىڭ تونناعا دەيىن كارتون، تسەللوفان، اينەك، پلاستيكا، مەتالل سياقتى زاتتار سۇرىپتالادى. بولاشاقتا كەشەن جانىنان شيكىزاتتاردى ەكىنشى قايتارا تەرەڭ وڭدەۋ ءۇشىن قوسىمشا قۋاتتاردى جاساۋ جوسپارلانعان. وسىنىڭ بارلىعى جانە قالدىقتاردى وڭدەۋدى باسقارۋدىڭ كەشەندى جۇيەسىن ەنگىزۋ قالانى قورشاعان ورتاعا تۇسەتىن ەكولوگيالىق جۇكتەمەنى ازايتۋعا ويداعىداي ىقپال ەتەدى.

مەگاپوليس اكىمى باۋىرجان بايبەك مۇنداي ماڭىزدى كەشەندى ىسكە قوسۋ تەك قالا ءۇشىن عانا ەمەس، جالپى ەلىمىز ءۇشىن ەلەۋلى وقيعا ەكەنىن اتاپ ءوتتى.

«مەملەكەت باسشىسى جاڭا تەحنولوگيالاردى ەنگىزە وتىرىپ كاسىپورىنداردىڭ تيىمدىلىگىن عانا ەمەس، سونىمەن قاتار ەكولوگيالىق جاعدايىن جاقسارتۋ قاجەتتىگىن تۇراقتى نازاردا ۇستاۋدا جانە ەلىمىزدە قابىلدانعان تسيفرلاندىرۋ باعدارلاماسى دا وسى باعىتتا جۇزەگە اسۋدا. بۇل كەشەن-وزىق تەحنولوگيانىڭ ۇلگىسى ءارى 2017 جىلعى ەحسرو-نىڭ نەگىزگى مۇرالارىنىڭ ءبىرى. جوبا مەملەكەتتىك-جەكە ارىپتەستىك قاعيدا بويىنشا قولعا الىنعان، 5,4 ملرد. تەڭگەگە ينۆەستورمەن 25 جىلعا كەلىسىم جاسالدى، ال قالا ءوز كەزەگىندە جەر ءبولىپ، بارلىق ينجەنەرلىك كوممۋنيكاتسيالاردى جۇرگىزدى»، - دەپ اتاپ ءوتتى باۋىرجان بايبەك.

3,9 گا اۋماققا اكىمشىلىك بلوك، ۇلىبريتانيادا جاسالعان ارنايى تەحنيكانىڭ گاراجى جانە وزىق يتالياندىق قوندىرعىلارمەن جابدىقتالعان نەگىزگى وڭدەۋ بولمەلەرى ورنالاسقان. كاسىپورىندى ىسكە قوسۋ بارىسىندا 530 تۇراقتى جۇمىس ورنى پايدا بولدى.

«ءتارتىپ» اق-نىڭ باسقارما توراعاسى ايبەك راحيموۆ قالا اكىمشىلىگى مەن جەكە ينۆەستورلار كونسورتسيۋمى اراسىندا ۇزاق مەرزىمگە جاسالعان كەلىسىم كاسىپورىننىڭ بارىنشا ءتيىمدى جۇمىس اتقاراتىنىنىڭ وزىق مودەلى بولاتىندىعىن ايتتى. قازىرگى كەزدە «ءتارتىپ» اق تقق-دىڭ 70%-ىن قامتيدى.كومپانيا بالانسىندا 236 تەحنيكا بىرلىگى بار، قوقىس تاسىمالدايتىن بارلىق كولىكتەردە GPS جۇيەسى جۇمىس ىستەيدى، پلانشەتتەر ارقىلى قوقىس الاڭىنداعى جاعدايلار تۇگەل كورىنەدى. ۇزاق مەرزىمدى كەلىسىمنىڭ نەگىزگى تارماقتارىنىڭ ءبىرى اۆتوپاركتى ۇنەمى جاڭارتۋ جانە جۇمىس پروتسەسسىن اۆتوماتتاندىرۋ بولىپ تابىلادى. قازىردىڭ وزىندە ەۆرو-4 ستاندارتىنىڭ 30 ماشيناسى ساتىپ الىندى جانە باعىتتاردى ديسپەتچەرلەۋ جۇيەسى ەنگىزىلدى.

«ەلىمىزدە ىسكە اسىپ جاتقان وڭ وزگەرىستەرگە جانە جەكە كومپانيالار كونسورتسيۋمى مەن قالا اكىمدىگىنىڭ بىرىگىپ جاساعان كەلىسىمنىڭ ارقاسىندا ءبىز وتە قىسقا مەرزىمدە، ياعني جوبا ماكەتى تالقىلانعان ءبىر جىل ىشىندە ماڭىزدى كەشەندى ىسكە قوستىق. كاسىپورىننىڭ باستى ماقساتى – بولاشاقتا قورشاعان ورتاعا تۇسەتىن جۇكتەمەنى ازايتۋ. ءبىز بۇل كەشەننىڭ وزگەلەرگە، سونىڭ ىشىندە كورشى ەلدەرگە ۇلگى بولاتىندىعىنا سەنىمدىمىز، ولار ۇلكەن قىزىعۋشىلىق تانىتۋدا، ءوڭىردىڭ ودان ءارى وركەندەۋى ءۇشىن دامۋدى جالعاستىرا بەرەمىز»، - دەدى «GREEN RECYCLE» جشس ديرەكتورى دميتري دانيلچەنكو.