«باسپانا» يپوتەكالىق ۇيىمى (بۇدان ءارى - باسپانا) جاس وتباسىلار مەن بيۋدجەتتىك سالا قىزمەتكەرلەرىنە قارجىلىق جۇكتەمەنى ازايتۋ ماقساتىندا "جاس ارمان" جانە "قامقور باسپانا" ونىمدەرىنىڭ ازىرلەنگەنىن حابارلايدى. ونىمدەر باسپانا جانە جەرگىلىكتى اتقارۋشى ورگاندار اراسىنداعى ىنتىماقتاستىققا نەگىزدەلىپ، اتالمىش ساناتتاعى ازاماتتارعا "7-20-25" يپوتەكاسىنىڭ العاشقى جارناسىن ەكى ەسەگە ازايتۋدى قاراستىرادى. جەرگىلىكتى اتقارۋشى ورگاندار (بۇدان ءارى - اكىمدىكتەر) وبليگاتسيالار شىعارادى جانە حالىقتىڭ اتالعان ساناتى ءۇشىن باستاپقى جارنانىڭ جارتىسىن سۋبسيديالاۋعا مىندەتتەنەدى. ءوز كەزەگىندە باسپانا اكىمدىكتەر وبليگاتسيالارىن ساتىپ الىپ، «7-20-25» باعدارلاماسىنا قاتىساتىن بانكتەرمەن حالىقتىڭ وسى كاتەگورياسىن نەسيەلەندىرۋدى قامتاماسىز ەتەدى.

«ءبىز «7-20-25» باعدارلاماسىنا جاس وتباسىلار مەن بيۋدجەتتىك سالا قىزمەتكەرلەرىنىڭ قاتىسۋىنا وراسان زور ءمان بەرەمىز. ولار تاراپىنان العاشقى جارنانى جيناۋدىڭ قيىندىعى جونىندە كوپتەگەن پىكىرلەر كەلىپ ءتۇستى. سول سەبەپتى، قولداۋ مۇمكىندىكتەرىن بارىنشا قاراستىردىق. مۇنداي الەۋمەتتىك شەشىمدەردى ىسكە اسىرۋ ءۇشىن اكىمدىكتەر تاراپىنان قولداۋ كۇتەمىز»، - دەدى «باسپانا» يپوتەكالىق ۇيىمىنىڭ باسقارما توراعاسى قايرات التىنبەكوۆ.

"جاس ارمان" جانە "قامقور باسپانا" ونىمدەرى ءبىرىنشى بولىپ شىمكەنت قالاسىندا پيلوتتىق رەجيمدە جۇمىس ىستەي باستادى. تاراپتار ءتيىستى مەموراندۋمعا 2018 جىلدىڭ 3 قىركۇيەگىندە قول قويعان بولاتىن. مەموراندۋمعا سايكەس شىمكەنت اكىمدىگى قايتارىمدى نەگىزدە باستاپقى جارنانى سۋبسيديالاۋ ءۇشىن اعىمداعى جىلى 500 ملن. تەڭگە جانە 2019 جىلى 1,5 ملرد. تەڭگە بولەدى. اكىمدىكتىڭ قولداۋى 2 مىڭعا جۋىق جاس وتباسى مەن بيۋدجەتتىك سالا قىزمەتكەرلەرىن قامتيدى دەپ كۇتىلۋدە.

ەستەرىڭىزدە بولسا، تامىز ايىنىڭ باسىندا بىرقاتار بۇقارالىق اقپارات قۇرالدارى مەملەكەتتىك قىزمەتكەرلەردىڭ "7-20-25" باعدارلاماسىنا قاتىسۋ ءۇشىن العاشقى جارنانى جيناۋ قيىندىقتارىنا تاپ بولىپ، شاعىمدانعانى جونىندە جازعان بولاتىن.

Abai.kz