قىركۇيەكتىڭ 15-ىندە قازاقستاندا ەمحاناعا تىركەلۋ ناۋقانى باستالدى. ەكى ايعا سوزىلاتىن جىل سايىنعى ءداستۇرلى كومپانيا 15-قاراشادا اياقتالماق.

«ناۋقاننىڭ ماقساتى - قارالىپ جۇرگەن ەمحاناسىنا كوڭىلى تولمايتىن ازاماتتارعا ەمدەۋ مەكەمەسىن اۋىستىرۋعا مۇمكىندىك بەرۋ. سونداي-اق، بۇل شارا رىنوكقا جاڭادان قوسىلعان مەديتسينا ۇيىمدارىنىڭ كەلەر جىلى حالىققا قىزمەت كورسەتۋگە تاپسىرىس الۋىنا جاعداي جاساۋ ماقساتىندا وتكىزىلەدى، - دەدى الەۋمەتتىك مەديتسينالىق ساقتاندىرۋ قورى باسقارما توراعاسىنىڭ مىندەتىن اتقارۋشى بوتاگوز جاقسەلەكوۆا. - بىلتىرعى تىركەۋ ناۋقانى بارىسىندا 300 مىڭنان استام قازاقستاندىق ازامات ەمحانا تاڭداۋ قۇقىعىن پايدالانعان بولاتىن. بۇل الدىڭعى جىلدارداعى كورسەتكىشتەردەن ەكى ەسە كوپ. جانە تىركەۋ كامپانياسىنا دەگەن قىزىعۋشىلىقتىڭ ارتقانىن، ازاماتتاردىڭ اتالعان ناۋقان تۋرالى عانا ەمەس، ەمحانانى ەركىن تاڭداۋ قۇقىعى جايلى دا بىلە باستاعانىن بىلدىرەدى».

وتباسىلىق قىزمەت كورسەتۋ جانە مەديتسينالىق-سانيتارلىق كومەكتىڭ قولجەتىمدىلىگى پرينتسيپتەرىن ىسكە اسىرۋ ءۇشىن ەمحانانىڭ ۇيگە جاقىن ماڭدا بولعانى دۇرىس. بۇل ۇيدە بىرەۋ اۋىرىپ، ءوزىن جايسىز سەزىنگەن جاعدايدا دارىگەرلەردىڭ جەدەل كومەك كورسەتۋىنە مۇمكىندىك بەرەدى. سونىمەن قاتار، جەدەل جاردەم جۇيەسىندە جاسالعان سوڭعى رەفورمالاردى ەسكەرسەك مۇنىڭ ماڭىزى ارتا تۇسەدى. سەبەبى بۇدان بىلاي 4-ساناتقا جاتقىزىلاتىن شاقىرتۋلارعا جەرگىلىكتى ەمحانالار قىزمەت كورسەتەدى.

وعان قوسا، دارىگەرلەرگە تۇسەتىن جۇكتەمە مەن ەمحانالارداعى كەزەكتى ازايتۋ ماقساتىندا تىركەۋ شەگى بەلگىلەنىپ وتىر. ول بويىنشا 1 جالپى پراكتيكا دارىگەرىنە تىركەلەتىن ادام سانى 1700-دەن اسپاۋى ءتيىس. بۇرىن بىزدە ءبىر دارىگەر 2000 ادامعا قىزمەت كورسەتەتىن.

«بۇل جاڭا ۋچاسكەلەردىڭ اشىلۋىنا تۇرتكى بولادى دەپ ۇمىتتەنەمىز. جانە بۇل ماسەلەدە مەديتسينا بيزنەسى وكىلدەرى بەلسەندىلىك تانىتادى دەپ سەنەمىز. بىلتىرعى جىلدىڭ وزىندە قورمەن كەلىسىمشارت بەكىتكەن جەتكىزۋشىلەر سانى ەداۋىر ارتتى، - دەدى مسق ستراتەگيا جانە ءادىسناما جونىندەگى باسقارۋشى ديرەكتورى سەرىك تاڭىربەرگەنوۆ. - قازىرگى تاڭدا قوردىڭ جەتكىزۋشىلەر تىزىمىندە 1365 مەديتسينا ۇيىمى بار. ونىڭ 623-ءى - جەكە مەنشىك. بۇل 2017 جىلمەن سالىستىرعاندا ەكى ەسە كوپ. ال، 2019 جىلى ولاردىڭ سانى تاعى 10 پايىزعا ارتادى دەگەن بولجام بار».

مسق مالىمەتىنشە، ەمحاناعا ءۇش ءتۇرلى جولمەن تىركەلۋگە بولادى. ناقتىراق ايتقاندا، تاڭداپ العان مەديتسينا ۇيىمىنا تىكەلەي بارىپ، ەلەكتروندى ۇكىمەت پورتالى ارقىلى ونلاين رەجيمىندە جانە حالىققا قىزمەت كورسەتۋ ورتالىقتارى ارقىلى تىركەلە الادى.

ەمحانا ارقىلى تىركەلۋ ءۇشىن جەكە كۋالىك پەن باس دارىگەردىڭ اتىنا جازىلعان ءوتىنىش تالاپ ەتىلەدى. ال، egov.kz پورتالى ارقىلى تىركەلۋ ءۇشىن جۇيەگە كىرىپ، ەلەكتروندى ءوتىنىمدى تولتىراسىز. قىزمەتتىڭ ناتيجەسى ءوتىنىش بەرۋشىنىڭ جەكە كابينەتىنە جولدانادى. حالىققا قىزمەت كورسەتۋ ورتالىقتارى ارقىلى تىركەلۋ ءۇشىن Connection Points ءبولىمىنىڭ قىزمەتىن پايدالانۋعا بولادى.

حالىقتى تىركەۋمەن اينالىساتىن ەمحانالاردىڭ ءتىزىمى الەۋمەتتىك مەديتسينالىق ساقتاندىرۋ قورىنىڭ fms.kz سايتىنداعى «كلينيكا تاڭداۋ» بولىمىندە ورنالاسقان. بيىلعى تىركەۋ ناۋقانىنا باستاپقى مەديتسينالىق-سانيتارلىق كومەك كورسەتەتىن 580 ۇيىم قاتىسىپ جاتىر.

Abai.kz