رەسەي سوناۋ توقسانىنشى جىلداردىڭ باسىندا-اق كوگىلدىر ەكراننان كورسەتىپ، كوپشىلىكتىڭ كوڭىل قالاۋىن تاپقان قىپ-قىزىل قىرعىنعا تولى كوركەم فيلمدەر بىزگە ەندى جەتتى. ءدال قازىر قازاقستان كينەماتوگرافيا سالاسىندا كريمينالدى بوەۆيك جانرىنىڭ ءداۋىرى ءجۇرىپ تۇر. ميلليون دوللاردان استام پايدا اكەلگەن «رەكەتير» فيلمىنەن كەيىن ەلدەگى سۇرانىستىڭ ءيىسىن سەزگەن كينو ماماندارى اتىس-شابىستى اشىق بەينەلەيتىن «كولەڭكە» اتتى جانە ءبىر بوەۆيكتى دۇنيەگە اكەلدى.

رەسەي سوناۋ توقسانىنشى جىلداردىڭ باسىندا-اق كوگىلدىر ەكراننان كورسەتىپ، كوپشىلىكتىڭ كوڭىل قالاۋىن تاپقان قىپ-قىزىل قىرعىنعا تولى كوركەم فيلمدەر بىزگە ەندى جەتتى. ءدال قازىر قازاقستان كينەماتوگرافيا سالاسىندا كريمينالدى بوەۆيك جانرىنىڭ ءداۋىرى ءجۇرىپ تۇر. ميلليون دوللاردان استام پايدا اكەلگەن «رەكەتير» فيلمىنەن كەيىن ەلدەگى سۇرانىستىڭ ءيىسىن سەزگەن كينو ماماندارى اتىس-شابىستى اشىق بەينەلەيتىن «كولەڭكە» اتتى جانە ءبىر بوەۆيكتى دۇنيەگە اكەلدى.

العاشقى تۇساۋى استانادا كەسىلىپ، جۇرت نازارىنا ۇسىنىلا باستايتىن بۇل فيلم ءوزىمىز جالپاق تىلمەن اتاپ كەتكەن بانديتتىك ءومىردى تۇگەل قامتيدى. زۇلىمدىق پەن قايىرىمدىلىقتىڭ، جاقسىلىق پەن جاماندىقتىڭ تەكەتىرەسىنە قۇرىلعان «كولەڭكەنىڭ» نەگىزگى يدەياسى تۋراسىندا رەجيسسەر رەنات ەلۋباەۆ بىلاي دەيدى: «ءبىز قىلمىستىڭ ەشقاشان جاقسىلىققا جەتكىزبەيتىندىگىن كورسەتكىمىز كەلدى. جاۋىزدىق جاساعان ادام، اقىر-سوڭىندا سول جاۋىزدىققا ءوزى دە تاپ بولادى».

ءفيلمنىڭ جەلىسى بويىنشا، اۋىلدان شىققان قارا دومالاق جىگىتتەر تابىس تابۋ ءۇشىن استاناعا كەلەدى. وندا ولار ۇرلىق-قارلىقپەن، بوپسالاۋمەن اينالىسادى، قالاداعى باسكەسەرلەرمەن توبەلەسىپ، قاراقشىلىق جولعا تۇسەدى. تۋراسىن ايتقاندا، ورىستاردىڭ «بريگادا»، «بانديتسكي پەتەربۋرگ»، «بۋمەر» سىندى وتكەن عاسىردىڭ سوڭىندا جارىققا شىعىپ، تالايدى تامساندىرعان بوەۆيك كينولارىنان ەش اۋمايدى. باستى رولدەردە دە سول باياعى قىرىن كەلگەندەردى قىرىپ-جويعان بانديتتەر.

بۇعان قاراپ وتىرىپ كەز-كەلگەن ءفيلمنىڭ وزەگىندە ءومىر شىندىعى جاتادى دەگەنگە لاجسىز كونەسىڭ. راسىندا دا العاش تاۋەلسىزدىك العان جىلدارى قازاقستاندا عانا ەمەس، كەڭەس قۇرساۋىنان بوساعان بۇرىنعى وداقتاس ەلدەردىڭ بارىندە وسىنداي قاراقشىلار قاپتاپ كەتكەن-ءتىن. كينەماتوگرافياسى بىزدەن كوش ىلگەرى وزىپ كەتكەن كورشى رەسەيدە بۇل سۋرەت سول توقسانىنشى جىلداردا كورسەتىلىپ قويعان. ورىستار قازىر ۇساق-تۇيەك رەكەتسىماقتاردى «دارىپتەۋىن» دوعارىپ، مەملەكەت باسىنداعى قىلمىسكەرلەرگە كوشكەن. سوڭعى ۋاقىتتا اينالىمعا ەنگەن رەسەيلىك فيلمدەردىڭ بارلىعى دا جوعارى لاۋازىمدى شەنەۋنىكتەر اراسىنداعى سىبايلاستىق پەن قىلمىستىق قارەكەتتەردى اشىق باياندايدى. وتاندىق كورەرمەننىڭ وكىنىشىنە قاراي مۇنداي تۇسىرىلىمدەر ازىرگە ءبىزدىڭ كينوپروكاتتا جوق. ارينە، جۇرتتىڭ اۋزىنان سۋىن اعىزاتىنداي كەرەمەت فيلم تۇسىرۋگە نەگىز بولارلىق تۇلعالار قازاقستاندىق بيلىكتە جەتىپ ارتىلادى. قازىرگى بيلىك باسىندا جۇرگەندەردى ايتپاعاندا، الىسقا بارماي-اق، الەمدىك پروبلەماعا اينالعان راحات اليەۆتىڭ، تىم قۇرىعاندا كۇن سايىن جەمقورلىقپەن ۇستالىپ جاتقان «نۇروتاندىق» شەكپەندىلەردىڭ ءپروتوتيپىن الىپ، كينو تۇسىرسە گولليۆۋدتىڭ باس جۇلدەسى قازاقتاردىڭ قانجىعاسىنا بايلانباي ما؟! سوندىقتان قازاق كينوسىمەن الەمدى مويىنداتۋ ءۇشىن اۋىلدان شىققان بانديتتەردىڭ ەمەس، استانادان شىققان اقسۇيەك اعايلاردىڭ اراسىنداعى اتىس-شابىستى سۋرەتتەسە، مىنە، ناعىز بوەۆيك سوندا شىعادى.

«قازاقستان» اپتالىعى، №17 (257), 7-مامىر، 2009