قالانىڭ دەنساۋلىق ساقتاۋ قوعامداستىعىمەن كەزدەسۋ بارىسىندا الماتى اكىمى باۋىرجان بايبەك دەنساۋلىق ساقتاۋ باسقارماسىنىڭ جاڭا باسشىسى قانات توسەكباەۆتى تانىستىردى.

سوڭعى جىلدارى الماتىدا قالا تۇرعىندارىنىڭ دەنساۋلىعىنا قاتىستى نەگىزگى ينديكاتورلار بويىنشا وڭ ناتيجەلەرگە قولجەتتى، دەنساۋلىق ساقتاۋ ۇيىمدارىن جاڭا زاماناۋي مەديتسينالىق تەحنيكامەن قامتاماسىز ەتۋ 80%-عا جەتتى. تۇرعىنداردىڭ 94%-ى ەلەكتروندى پاسپورتپەن قامتىلدى. جىل اياعىنا دەيىن قالانىڭ بارلىق ەمحانالارى قاعازسىز فورماتقا كوشەدى. جۇرگىزىلگەن مەديتسينالىق رەفورمالار ناتيجەسىندە سىرقاتتارعا قىزمەت كورسەتۋ ۋاقىتى 20%-عا، كەزەك كۇتۋ 30%-عا قىسقاردى.

«مەملەكەت باسشىسى دەنساۋلىق ساقتاۋ سالاسىنا ۇنەمى ايرىقشا نازار اۋدارادى، بۇل ماسەلە ەلباسىنىڭ حالىققا جولداۋىندا دا كورىنىس تاپقان. پرەزيدەنتتىڭ تاپسىرماسى بويىنشا سىرقاتتى ەمدەۋدىڭ جاڭا ادىستەرىن ەنگىزگەن ۋچاسكەلىك مەديتسينا قىزمەتكەرلەرىنىڭ جالاقىسى 1 قاڭتاردان باستاپ بىرتىندەپ 20%-عا وسەدى. تەك الماتىنىڭ وزىندە عانا بۇل شارا جالاقىسى 199 416 تەڭگەگە جەتەتىن ۋچاسكەلىك قىزمەتتىڭ 1028 دارىگەرىن، ەڭبەكاقىسى 130766 تەڭگەگە دەيىن وسەتىن 2400 مەدبيكەنى قامتيدى»، - دەپ اتاپ ءوتتى باۋىرجان بايبەك.

دەگەنمەن، اتقارىلعان جۇمىستارعا قاراماستان تۇرعىنداردىڭ قالانىڭ مەديتسينالىق ۇيىمدارى كورسەتەتىن قىزمەتتەرگە كوڭىلدەرى تولمايدى. وسىنى ەسكەرە وتىرىپ، الماتى اكىمى دەنساۋلىق ساقتاۋ باسقارماسى جاڭا باسشىسىنىڭ الدىنا ءپرينتسيپتى ءارى جۇيەلى جۇمىستى قاجەت ەتەتىن ءبىرىنشى كەزەكتەگى مىندەتتەردى قويدى.

ياعني، مەديتسينا ۇيىمدارىنىڭ بارلىق قىزمەتى اشىق بولۋى جانە سىبايلاس جەمقورلىققا جول بەرگەن باسشىلارعا قاتاڭ شارالار قولدانىلۋى قاجەت. قالانىڭ مەديتسينا ۇيىمدارى ازاماتتاردىڭ بارلىق وتىنىشتەرىنە مونيتورينگ جۇرگىزۋلەرى، ولارعا دەر كەزىندە ءمان بەرۋلەرى ءارى وزدەرىنىڭ قارجىلىق ەسەپتەرىن جاريا ەتۋلەرى ءتيىس.

دەنساۋلىق ساقتاۋ باسقارماسىنىڭ جاڭا باسشىسىنا قالانىڭ مەديتسينا مەكەمەلەرى جانىنداعى قاداعالاۋ كەڭەسىنىڭ قۇرامىنا ۇەۇ، باق وكىلدەرىن جانە بلوگەرلەردى ەنگىزە وتىرىپ، ونى قايتا قاراۋ تاپسىرىلدى. ءوز كەزەگىندە ۇيىمداردىڭ ىشكى اۋديت قىزمەتى تەك قاداعالاۋ كەڭەسىنە عانا تىكەلەي ەسەپ بەرۋلەرى ءتيىس.

بۇلداردان وزگە دارىلەردى ساتىپ الۋدى ەلەكتروندى فورماتقا كوشىرىپ، مەديتسينالىق تەحنيكانى ساتىپ العان كەزدە ونىڭ ناقتىلى باعاسىنا جاسالعان ساراپتامانى ءجىتى باقىلاعان ءجون.

ورتالىقتاندىرۋ قاعيداسى بويىنشا مەديتسينالىق قىزمەتتى قولجەتىمدى ەتۋ ءۇشىن مەگاپوليستىڭ ءار اۋدانىندا ۇيىمدىق-قۇقىقتىق فورماسى وزگەرگەن كوپپروفيلدى ستاتسيونارلار قۇرىلاتىن بولادى.

وسىعان وراي، دەنساۋلىق ساقتاۋ باسقارماسىنا مەديتسينالىق ۇيىمداردىڭ باسشىلارىن كونكۋرستىق نەگىزدە تاعايىنداۋدىڭ ناقتىلى مەحانيزمىن ازىرلەۋ تاپسىرىلدى، مۇندا تۇپكى ناتيجەگە ەرەكشە نازار اۋدارىلۋى ءتيىس. قالا باسشىسى تالاپقا ساي الەۋمەتتىك ليفت قۇرۋدى جانە باسشىلاردى مەريتوكراتيا ءپرينتسيپى بويىنشا تاڭداۋدى ۇسىندى.

ايتا كەتەرلىگى، دەنساۋلىق ساقتاۋ باسقارماسىنىڭ جاڭا باسشىسى ءوزىنىڭ ەڭبەك جولىن مەديتسينالىق جەدەل جاردەمدە فەلدشەر بولىپ باستاعان. ءار جىلدارى الماتىداعى بالالاردىڭ جۇقپالى اۋرۋلار اۋرۋحاناسىنىڭ جانە استانا قالاسىنداعى مەديتسينالىق جەدەل جاردەم ستانتسياسىنىڭ باس دارىگەرى قىزمەتتەرىن اتقارعان. جاڭا قىزمەتكە تاعايىندالعانعا دەيىن باتىس قازاقستان وبلىسىنىڭ دەنساۋلىق ساقتاۋ باسقارماسىن باسقارعان. قازاق مەملەكەتتىك مەديتسينا ۋنيۆەرسيتەتىنىڭ جانە گاننوۆەر جوعارى مەديتسينا مەكتەبىنىڭ تۇلەگى.