استانا. 16 ءساۋىر. قازاقپارات - قازاق اقپارات اگەنتتىگى رەسپۋبليكالىق باسىلىمداردا 16 ءساۋىر، سەنبى كۇنى شىققان وزەكتى ماتەريالدارعا شولۋدى ۇسىنادى.

***

باتىس قازاقستان وبلىسى تاسقىن سۋدىڭ قۇرساۋىنان قۇتىلا الار ەمەس. شاعان جانە دەركول وزەندەرىندە سۋ دەڭگەيىنىڭ تومەندەۋى بايقالعانىمەن، ورال قالاسى مەن بىرقاتار اۋدانداردىڭ جاعدايى ءالى دە كۇردەلى. وسى جايت «ەگەمەن قازاقستان» گازەتىنىڭ بۇگىنگى نومىرىندەگى «جايىق تاسىپ بارادى جاردان اسىپ...» دەگەن ماقالاعا ارقاۋ بولعان. «وبلىس حالقى بىرنەشە كۇننەن بەرى تابيعي اپاتپەن بەل جازباي كۇرەسۋدە. مەكەمە-ۇيىمداردىڭ قىزمەتكەرلەرى مەن ەرىكتىلەر توبى قۇتقارۋشىلارعا تاۋلىك بويى كومەك كورسەتۋدە. جەكە كولىگىمەن كەلىپ ادامداردى كوشىرۋگە اتسالىسىپ جۇرگەندەر دە بار. سىن ساعاتتا توزىمدىلىك پەن ۇيىمشىلدىق تانىتقان باتىسقازاقستاندىقتارعا ۇكىمەت قارجىلاي قولداۋ كورسەتۋگە دايىن ەكەندىگىن مالىمدەگەن بولاتىن»، - دەپ جازادى باسىلىم.

استانا. 16 ءساۋىر. قازاقپارات - قازاق اقپارات اگەنتتىگى رەسپۋبليكالىق باسىلىمداردا 16 ءساۋىر، سەنبى كۇنى شىققان وزەكتى ماتەريالدارعا شولۋدى ۇسىنادى.

***

باتىس قازاقستان وبلىسى تاسقىن سۋدىڭ قۇرساۋىنان قۇتىلا الار ەمەس. شاعان جانە دەركول وزەندەرىندە سۋ دەڭگەيىنىڭ تومەندەۋى بايقالعانىمەن، ورال قالاسى مەن بىرقاتار اۋدانداردىڭ جاعدايى ءالى دە كۇردەلى. وسى جايت «ەگەمەن قازاقستان» گازەتىنىڭ بۇگىنگى نومىرىندەگى «جايىق تاسىپ بارادى جاردان اسىپ...» دەگەن ماقالاعا ارقاۋ بولعان. «وبلىس حالقى بىرنەشە كۇننەن بەرى تابيعي اپاتپەن بەل جازباي كۇرەسۋدە. مەكەمە-ۇيىمداردىڭ قىزمەتكەرلەرى مەن ەرىكتىلەر توبى قۇتقارۋشىلارعا تاۋلىك بويى كومەك كورسەتۋدە. جەكە كولىگىمەن كەلىپ ادامداردى كوشىرۋگە اتسالىسىپ جۇرگەندەر دە بار. سىن ساعاتتا توزىمدىلىك پەن ۇيىمشىلدىق تانىتقان باتىسقازاقستاندىقتارعا ۇكىمەت قارجىلاي قولداۋ كورسەتۋگە دايىن ەكەندىگىن مالىمدەگەن بولاتىن»، - دەپ جازادى باسىلىم.

وسى باسىلىمنىڭ «ءسىزدى نە تولعاندىرادى؟» ايدارىندا ءماجىلىس دەپۋتاتى روزاقۇل حالمۇرادوۆتىڭ «جەتىمدەرى مەن جەسىرلەرىن جىلاتپاعان ەل ەدىك» دەگەن شاعىن ماقالاسى باسىلدى. «قازىرگى تاڭدا قازاقستاندا 46 مىڭنان استام بالا ءتۇرلى سەبەپتەرمەن اتا-انانىڭ قامقورلىعىنسىز قالىپ وتىر. سوڭعى ون جىلدان بەرى جەتىم بالالار شەتەلدىكتەرگە اسىراپ الۋعا بەرىلىپ جاتىر. رەسمي مالىمەتتەرگە قاراعاندا، التى مىڭنان استام بالا شەت ەل اسقان، ونىڭ 5308-ءى اقش ازاماتتارىنىڭ ۇلەسىنە ءتيىپتى. ولاردىڭ كوپشىلىگىنىڭ بۇگىنگى تاعدىرى نە بولىپ جاتقانى بەلگىسىز»، - دەپ جازادى ماقالا اۆتورى.

***

«الاش ايناسى» گازەتىنىڭ جازۋىنشا، پرەزيدەنت ن. نازارباەۆ كەزەكتەن تىس سايلاۋدا قايتادان سايلانىپ، سوعان وراي بيلىكتە ورىن العان اۋىس-تۇيىستەردىڭ سوڭعىسى ءارى اسا ماڭىزدى كادرلىق شەشىمدەر كەشەگى سەناتتىڭ جالپى وتىرىسىندا جۇزەگە استى. «دەسە دە، بۇۇ-داعى جوعارى لاۋازىمدى قىزمەتكە اۋىساتىنى بەلگىلى بولعان قاسىم-جومارت توقاەۆتىڭ ورنىنا باسقا كانديدات كەلەتىنى اۋەلدەن-اق تۇسىنىكتى بولاتىن. ءسويتىپ، كەشە ەلباسىنىڭ ۇسىنۋىمەن سەناتتىڭ تاريحىنداعى بەسىنشى توراعالىقتىڭ تىزگىنىن بۇعان دەيىن ەلىمىزدىڭ باس پروكۋرورى قىزمەتىن اتقارىپ كەلگەن قايرات ءمامي ۇستادى. سونداي-اق، سەنات وتىرىسىندا بيلىكتىڭ بارلىق دەڭگەيىندەگى كادرلىق وزگەرىستەرگە نۇكتە قويىلىپ، قر جوعارعى سوتى مەن قر باس پروكۋرورى قىزمەتىنە جاڭا باسشىلار تاعايىندالسا، ۇلتتىق قاۋىپسىزدىك كوميتەتىنىڭ بۇرىنعى باسشىسى ءوز قىزمەتىنە قايتا كىرىستى»، - دەپ جازادى باسىلىم. سەنات تورىندە وتكەن بۇدان دا باسقا بيلىكتەگى اۋىس-تۇيىستەر جايىندا «سەنات تاريحىنداعى بەسىنشى توراعا سايلاندى» دەگەن ماقالادا كەڭىنەن باياندالعان.

«بۇگىن - عىلىم كۇنى. وسىعان بايلانىستى كەشە ءبىلىم جانە عىلىم ءمينيسترى باقىتجان جۇماعۇلوۆ ءبىر توپ ەلوردالىق عالىمدارمەن كەزدەسىپ، مەرەكەلىك جيىن وتكىزدى»، - دەپ جازادى «الاش ايناسى» گازەتى.  باسىلىمنىڭ اتاپ وتۋىنشە، ەلىمىزدە عىلىمي-زەرتتەۋ ۋنيۆەرسيتەتتەرى مەن ينستيتۋتتاردىڭ ءرولى ارتىپ كەلەدى. وسىعان وراي قازىرگى كەزدە ارنايى جۇمىستار اتقارىلىپ، الداعى ۋاقىتتا 21 ۋنيۆەرسيتەتكە يننوۆاتسيالىق دارەجە بەرۋ كوزدەلىپ وتىر. ول ءۇشىن عىلىمداعى باسەكەنى ارتتىرىپ، سانى كوپ ساپاسىز وقۋ ورىندارىنان ارىلۋ قاجەت بولادى. ب. جۇماعۇلوۆ وسى ماسەلە بويىنشا جۇمىس ىستەپ، جوعارى وقۋ ورىندارىنىڭ دايىندىعىنا قاراي قازاقستاندا تەك 50 ۋنيۆەرسيتەتتى عانا قالدىرۋدى جوسپارلاپ وتىرعانىن اتاپ ءوتتى. ماقالا «عىلىم كۇنى قارساڭىندا ەلوردالىق ءبىر توپ عالىم ماراپاتتالدى» دەگەن تاقىرىپپەن بەرىلگەن.

***

حوككەيدەن 18 جاسقا دەيىنگى قازاقستان قۇراماسى بيىل دا الەم چەمپيوناتىنىڭ 1-ديۆيزيونىندا ءساتسىز وينادى. بۇل تۋرالى «ايقىن» گازەتىندە جارىق كورگەن «ەندىگى ءۇمىت - باس قۇرامدا» دەگەن ماقالادا باياندالعان. «ا» توبىنداعى كوماندالاردىڭ باسىن قوسقان لاتۆيا جەرىندەگى باسەكەنى ۆاسيلي ۆاسيلچەنكو جاتتىقتىراتىن جاس حوككەيشىلەرىمىز جاپ-جاقسى باستاعان ەدى. ءبىرىنشى كەزدەسۋدە ۆەنگرلەردەن 0:2 ەسەبىمەن جەڭىلىپ تۇرىپ، وۆەرتايمدا ءبىر ويىنشىسى كەم بولعانىنا قاراماستان، ۇتىپ كەتكەن قۇرامامىزدىڭ قادامىنا ەرەكشە قۋانعان ەدىك. بىراق كەيىنگى ەكى كەزدەسۋدەن كەيىن-اق ورەكپىگەن كوڭىلىمىز ورنىنا ءتۇسىپ، قۋانىشىمىز سۋ سەپكەندەي باسىلدى»، - دەپ جازادى باسىلىم. تولىعىراق گازەتتىڭ سەنبىلىك سانىنان بىلە الاسىزدار.

وسى باسىلىمنىڭ «مىنبەر» ايدارىندا «رۋحانيات» ورتالىعىنىڭ ديرەكتورى ەربول تىلەشوۆپەن اراداعى سۇحبات «ەلباسى قازاق ءتىلىنىڭ دامۋىنا ۇنەمى كوڭىل ءبولىپ كەلەدى» دەگەن تاقىرىپپەن بەرىلگەن. ەكەۋارا اڭگىمە بارىسىندا ول: «ءبىز - عاسىرلارعا ەسەسى كەتكەن حالىقپىز. ورىستاردىڭ نەمەسە اعىلشىنداردىڭ عاسىرلارعا ەسەسى كەتكەن جوق. ءبىزدىڭ دۇشپانعا، جاۋلاۋشىلارعا ەسەمىز كەتكەن، ءتىپتى زاماندار مەن داۋىرلەرگە دە ەسەمىز كەتتى. ەندى ءبىز سول عاسىرلارعا كەتكەن ەسەمىزدى قايتارىپ جاتىرمىز. ال ونى قايتارۋدىڭ ءبىر امالى، ودان ايىعۋدىڭ جولى - الاش يدەولوگياسىن، قازاق بولۋ يدەياسىن بۇگىنگە اكەلىپ ورنىقتىرۋ»، - دەيدى.

***

كەشە قر پرەزيدەنتى ن.نازارباەۆتىڭ شاقىرۋىمەن ەلىمىزگە رەسمي ەكى كۇندىك ساپارمەن ءۇندىستاننىڭ پرەمەر-ءمينيسترى مانموحان سينگح كەلدى. وسىعان وراي «كازاحستانسكايا پراۆدا» باسىلىمى بۇگىنگى نومىرىندە «ۆرەميا ستراتەگيچەسكيح رەشەني» دەگەن تاقىرىپپەن مارتەبەلى مەيمانمەن اراداعى سۇحباتتى جاريالادى. باسىلىمنىڭ بارلىق ساۋالدارىنا تۇششىمدى جاۋاپ بەرگەن م.سينگح: «ءبىزدىڭ وڭىرلىك جانە جاھاندىق ماسەلەلەرگە كوزقاراستارىمىز ۇقساس جانە ءبىز حالىقارالىق فورۋمداردا ءبىر-ءبىرىمىزدىڭ باستامالارىمىزعا قولداۋ كورسەتىپ كەلەمىز، سونىمەن بىرگە، كوپتەگەن حالىقارالىق ۇيىمداردىڭ ەگيداسىمەن ىنتىماقتاسىپ جۇمىس ىستەۋدەمىز»، - دەيدى.

سونداي-اق وسى سۇحباتتىڭ قازاقشا نۇسقاسىن «ەگەمەن قازاقستان» گازەتىنىڭ سەنبىلىك سانىنان دا وقي الاسىزدار.