ەلباسىنىڭ "قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ" اتتى قازاقستان حالقىنا ارناعان جولداۋىندا وڭىرلەردىڭ ينۆەستيتسيالىق الەۋەتىن كوتەرۋگە باس نازار اۋدارعانى بەلگىلى.

وسىعان وراي، تۇركىستان وبلىسىندا «TURKISTAN INVEST» كومپانياسى  جالپى قۇنى 507 ملرد تەڭگەنى قۇرايتىن 19 جاڭا ءىرى جوبانى تارتۋ بويىنشا جۇمىستار باستالدى. بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە "تۇركىستان" اكك" اق توراعاسى ايتمۇحاممەد الداجاروۆ مالىمدەدى، دەپ حابارلايدى Abai.kz, قازاقپاراتقا سىلتەمە جاساپ.

ايتمۇحاممەد الداجاروۆتىڭ ايتۋىنشا، «تۇركىستان» الەۋمەتتىك-كاسىپكەرلىك كورپوراتسياسى» اكتسيونەرلىك قوعامىنىڭ كەڭسەسى جانىنان بۇگىندە «TURKISTAN INVEST»، «تسيفرلاندىرۋ ورتالىعى» جانە «تۇراقتاندىرۋ قورى» فيليالدارى قۇرىلعان. قازىرگى تاڭدا «تۇركىستان» اكك» اق - قۇرىلىس، الەۋمەتتىك ماڭىزدى جوبالار، تۋريزم، ينۆەستيتسيا تارتۋ، تسيفرلاندىرۋ، تۇراقتاندىرۋ قورى سىندى باعىتتار بويىنشا جۇمىس اتقارادى.

بريفينگتە «TURKISTAN INVEST» كومپانياسىنىڭ باسشىسى الىبەك نەسىپبەكوۆ تە ءسوز سويلەپ، تۇركىستان وبلىسىندا قولايلى ينۆەستيتسيالىق جاعداي جاسالىپ جاتقانىن اتاپ ءوتتى. ءوڭىردىڭ ينۆەستيتسيالىق الەۋەتىن كوتەرۋ ماقساتىندا قۇرىلعان ينۆەستيتسيالىق كومپانيانىڭ جۇمىسىمەن تانىستىردى.

«19 جوبانىڭ ىشىندە بالامالى ەلەكتر ەنەرگياسىن ءوندىرۋ بويىنشا - 6, اۋىلشارۋاشىلىق سالاسىنا قاتىستى - 5, وڭدەۋ ونەركاسىبىنە قاتىستى 8 جوبا بار. 4 كاسىپورىننىڭ بيىل قۇرىلىسى باستالدى. بارلىق جوبالاردى جۇزەگە اسىرۋ اياسىندا 14 مىڭعا جۋىق جاڭا جۇمىس ورىندارى پايدا بولادى دەپ جوسپارلانۋدا. ولاردىڭ قاتارىندا جالپى قۇنى 13 240 ملن تەڭگەلىك «ەكوپروتەح-استانا» جشس كۇن ەلەكتروستانتسياسى - 20 ادامدى، قۇنى 95 000 ملن تەڭگەنى قۇرايتىن «Standard Petroleum & Co» جشس مۇناي وڭدەۋ زاۋىتى - 1 000 ادامدى جۇمىسپەن قامتىماق»، - دەدى الىبەك نەسىپبەكوۆ.

سونىمەن قاتار بريفينگتە ينۆەستيتسيالىق كومپانيا تاراپىنان الەۋەتتى ينۆەستورلارعا اقپاراتتىق قولداۋ كورسەتۋ ماقساتىندا IInvestInTurkistan.org ينۆەستيتسيالىق پورتالى ازىرلەنگەنى ايتىلدى. ونداعى اقپارات اعىلشىن، فرانتسۋز، قىتاي،تۇرىك، اراب، ورىس جانە قازاق تىلدەرىن كورسەتىلگەن. بۇل پورتالدىڭ كومەگىمەن ينۆەستور الەمنىڭ كەز كەلگەن بۇرىشىنان، كەز كەلگەن ۋاقىتتا وزىنە قاجەتتى وڭىرىمىزدەگى ينۆەستيتسياعا قاتىسى بار اقپاراتتى الۋ مۇمكىندىگىنە يە بولادى.

Abai.kz