«اباي» سايتىندا جاريالانعان «جەلتوقساندا جەتكەن وي» اتتى ماقالامدى تالقىلاعان  كەيبىر ادامداردىڭ وي-پىكىرىن وقىپ، ءوزىمنىڭ اتالمىش شاتپاعىمداعى قازاقتاردىڭ جاعىمسىز قىلىقتارى مەن بولمىسى جايلى كوزعاراسىمنىڭ دۇرىستىعىنا تاعى دا كوزىم جەتكەندەي بولدى. كوپتەگەن پىكىرلەر ناقتى مالىمەتسىز، جۇيەسىز ايىپتاۋلارعا، وسەك-اياڭعا قۇرىلعان. ولاردىڭ بويىنداعى شەگى كورىنبەيتىن جەككورۋشىلىككە، اقىلدان ادا ىزاقورلىققا تاڭ قالعانىم دا راس. باسى جوق، اياعى جوق ايىپتاۋلاردى قارۋ ەتۋ، ەشقانداي نەگىزسىز بالاعاتتاۋلاردى ميىنا تولتىرىپ، اۋىزى مەن جازۋىن اياماي قارشا بوراتۋ،  «اباي» اتامىزدىڭ اتىنداعى  سايتتى  اياماي ايعىزداعان «پىكىرشىل» ازاماتتاردىڭ ۇيرەنشىكتى ءىسى بولسا، بۇل جاقسى قۇبىلىس دەي المايمىن.  بۇل ازاماتتاردىڭ ساناسىندا، جىگىتتىك قاسيەت  تۇگىلى  مادەنيەتتىڭ  ءوزى ءزارۋ  تاۋارعا اينالعان سياقتى. مەن سىزدەردىڭ كوبىڭىز سياقتى بۇتاق ارتىنا تىعىلىپ، بىرەۋلەردىڭ اتىنان بوس وسەك پەن بەتپاق اشۋدى توگەتىن پەندە ەمەسپىن. بارلىق ۋاقىتتا تەك قانا ءوز اتىمنان سويلەيمىن، ءوز سوزىمە جاۋاپ بەرە الاتىن جىگىتپىن. ەسىمىم - سەرىك، قۇجاتتاعى قازىرگى فاميليام اباس-شاح (بۇرىن اباسوۆ) بولعانمىن. «حابار» اگەنتتىگىندە جۇمىس ىستەگەنىمە 7-ءشى  اقپان كۇنى بيىل ون ءتورت جىلدان استى. ورىنعا جابىسقان تۇگىم جوق، سوڭعى ۋاقىتتا جىل سايىن، جوعارىداعىلارعا  قىزمەتتەن بوساتۋ تۋرالى ءوتىنىشىمدى ايتامىن، باسشىمىز ازىرگە بوساتپاي جاتىر.

«اباي» سايتىندا جاريالانعان «جەلتوقساندا جەتكەن وي» اتتى ماقالامدى تالقىلاعان  كەيبىر ادامداردىڭ وي-پىكىرىن وقىپ، ءوزىمنىڭ اتالمىش شاتپاعىمداعى قازاقتاردىڭ جاعىمسىز قىلىقتارى مەن بولمىسى جايلى كوزعاراسىمنىڭ دۇرىستىعىنا تاعى دا كوزىم جەتكەندەي بولدى. كوپتەگەن پىكىرلەر ناقتى مالىمەتسىز، جۇيەسىز ايىپتاۋلارعا، وسەك-اياڭعا قۇرىلعان. ولاردىڭ بويىنداعى شەگى كورىنبەيتىن جەككورۋشىلىككە، اقىلدان ادا ىزاقورلىققا تاڭ قالعانىم دا راس. باسى جوق، اياعى جوق ايىپتاۋلاردى قارۋ ەتۋ، ەشقانداي نەگىزسىز بالاعاتتاۋلاردى ميىنا تولتىرىپ، اۋىزى مەن جازۋىن اياماي قارشا بوراتۋ،  «اباي» اتامىزدىڭ اتىنداعى  سايتتى  اياماي ايعىزداعان «پىكىرشىل» ازاماتتاردىڭ ۇيرەنشىكتى ءىسى بولسا، بۇل جاقسى قۇبىلىس دەي المايمىن.  بۇل ازاماتتاردىڭ ساناسىندا، جىگىتتىك قاسيەت  تۇگىلى  مادەنيەتتىڭ  ءوزى ءزارۋ  تاۋارعا اينالعان سياقتى. مەن سىزدەردىڭ كوبىڭىز سياقتى بۇتاق ارتىنا تىعىلىپ، بىرەۋلەردىڭ اتىنان بوس وسەك پەن بەتپاق اشۋدى توگەتىن پەندە ەمەسپىن. بارلىق ۋاقىتتا تەك قانا ءوز اتىمنان سويلەيمىن، ءوز سوزىمە جاۋاپ بەرە الاتىن جىگىتپىن. ەسىمىم - سەرىك، قۇجاتتاعى قازىرگى فاميليام اباس-شاح (بۇرىن اباسوۆ) بولعانمىن. «حابار» اگەنتتىگىندە جۇمىس ىستەگەنىمە 7-ءشى  اقپان كۇنى بيىل ون ءتورت جىلدان استى. ورىنعا جابىسقان تۇگىم جوق، سوڭعى ۋاقىتتا جىل سايىن، جوعارىداعىلارعا  قىزمەتتەن بوساتۋ تۋرالى ءوتىنىشىمدى ايتامىن، باسشىمىز ازىرگە بوساتپاي جاتىر. كەتكىم كەلگەنى، وكپەلەگەننەن نەمەسە «حاباردان» ءبىر قالىپتى تىرشىلىگىنەن تۇڭىلگەننەن ەمەس، ءوز بەتىمشە ستۋديا اشىپ، تەلەسەريال ءتۇسىرىپ، تارالىمى مول گازەت شىعارىپ، جاڭاشا تىرشىلىك ەتسەم دەگەن ماقسات تۇتقاندىقتان.  داريعا نازارباەۆانىڭ قاراماعىندا قىزمەت ىستەگەنىمدى جاسىرمايمىن، سول كىسىمەن بىرگە اتالمىش تەلەارنانى قۇرۋعا قاتىسقانىمدى جانە ونى تانىمال تەلەشاڭىراق دەڭگەيىنە  جەتكىزۋگە تامشىداي بولسا دا ۇلەسىم بولعانىن ماقتان تۇتامىن. ەل باسشىلىعى اۋىسىپ، قوعام وزگەرىپ جاتسا دا مەن ول كىسىنى ساتپايمىن، قاجەت ەتسە قاسىندا بولۋعا ءازىرمىن. 1997-2001-ءشى جىلدارداعى «حابار» مەن قازىرگى «حاباردى» سالىستىرساق، اراسى جەر مەن كوكتەي ەكەنى راس. ول كەزدە اگەنتتىكتىڭ بەدەلى وتە بيىك بولدى.  ول كەزدە وسى ەلدىڭ  «مەن» دەگەن لاۋازىمدىلارى داريعا نۇرسۇلتانقىزىمەن باس يزەپ امانداسقاننىڭ ءوزىن مارتەبە سانايتىن، مەرەكە سايىن ول كىسىگە الماتىنىڭ ەڭ قىمبات گۇلدەرىن سىيلاۋ ءۇشىن «حاباردىڭ» تار دالىزىندە وتىرىك جىميىپ كەزەكتە تۇراتىن. قازىر  سول كىسىلەردىڭ ءبارى «باتىر»، بۇرىنعى «حاباردى» كۇندەلىكتى سىنىنا ىلىگىپ كەتۋدەن ولەردەي ۇركەتىن ولار، بۇگىندە كوكتەن دە، كوپتەن دە قورىقپايدى، ءتىلى باسقاشا «سايرايدى». كابينەتتەرىندە جايلى ورىندىققا جايعاسىپ وتىرىپ العان ولار، قۇرىپ كەتپەۋ ءۇشىن بارىنە كونىپ جاتقان بايعۇس ارناعا اقىلگويسىپ كەڭەس بەرەدى، جاعىمپازدىقتىڭ جاڭا جوسپارلارىنىڭ اياسىندا  «ۇسىنىستار» ايتادى.  دال وسى جەردە قازىر جۇرتتىڭ كەيبىرىنە «جەكسۇرىن»، كوزىنە سۇيەل بولىپ بىتكەن «حاباردىڭ» تاريحىنا قىسقاشا مالىمەت بەرىپ كەتكىم كەلەدى. «حابار» ەشقاشان تۇگەلىمەن جەكە قولدا بولعان ەمەس.  ول باستاپقى كەزدە مەملەكەتتىك كاسىپورىن رەتىندە جۇمىس ىستەدى، كەيىن اق بولىپ اۋىستى. بىراق، جارتىلاي جەكە اكتسيونەرلەردىڭ قولىندا بولعان كەزدە دە قالعان جارتىسىنىڭ ءسال استامى مەملەكەت قولىندا بولدى. ءبىز، ياعني تەلەجۋرناليستەر مەن رەجيسسەرلەر، پروديۋسەرلەر مەن رەداكتورلار بارلىق ۋاقىتتا دا ءوزىمىزدى مەملەكەتتىڭ وكىلى رەتىندە سەزىندىك، پاتريوت ازامات رەتىندە «حاباردىڭ» ابىرويى ءۇشىن كۇرەستىك. 2000-شى جىلداردىڭ باسىندا، تەلەارنانىڭ ەفيرىندە ءبىز قالامايتىن وزگەرىستەر بايقالا باستاعان كەزدە، قاراپ جاتپادىق. جاڭالىقتار قىزمەتىنىڭ  شىنشىلدىعىن ساقتاپ قالۋ ءۇشىن ايقاستىق، ءوندىرىس ءبولىمىنىڭ جوعارى دەڭگەيلى جۇمىسىن ساقتاپ قالۋ ءۇشىن شىرىلدادىق، تەلەارنانىڭ جوعارى  رەيتينگىن  تۇسىرمەۋ ءۇشىن جۇيكە توزدىردىق، تەلەۆيزيانىڭ مىندەتى ءبىر پارتيا نەمەسە ءبىر باعىت-توپتىڭ ماقساتىنا قىزمەت ىستەۋ ەمەس، حالىققا جۇمىس ەتۋ كەرەكتىگىن دالەلدەۋگە تىرىستىق. وكىنىشكە قاراي، 2001-ءشى جىلدىڭ سوڭىنان باستاپ شىعار، ايگىلى راحات اليەۆتىڭ ادامدارى تەلەارنانىڭ باسشىلىق جۇمىسىنا بەلسەنە ارالاسا باستادى. بۇل تۇستا، جوعارىداعى ماسەلەلەردى شەشۋ وڭاي شارۋا بولعان جوق. ءبىز، داريعانىڭ كومانداسى بولىپ تابىلاتىن شىعاراشىلىق توپ «جەڭىلىسكە ۇشىرادىق»، ءبىراز ديرەكتورلار  قىزمەتىنەن ىسىرىلدى، سول كەزەڭدە كوپتەگەن جاقسى ماماندار قىزمەتتەن كەتۋگە ءماجبۇر بولدى. ءدال سول كەزدە، باس پروديۋسەر رەتىندە ءوز قىزمەتىمدى مورالدىك تۇرعىدا ويداعىداي اتقارىپ شىقتىم دەپ ايتا الامىن. بۇيرەگى رەسمي ءتىلدى ونىمدەرگە بۇرىپ تۇراتىن باسشىلىقتىڭ قولداۋى از بولعاندىعىنا قاراماستان، قازاق ءتىلدى باعدارلامالار ءوندىرىسىن سول كۇيىندە ساقتاپ قالۋعا تىرىستىق. (قازىر، «حابار»، «ەلارناعى» كاسىبي دەڭگەيى جوعارى  رەجيسسەرلەر مەن پروديۋسەرلەردىڭ بارلىعى دەرلىگى مەنىڭ شاكىرتىم ەكەنىن ماقتانىشپەن ايتا الامىن. ولاردىڭ كەيبىرى «قازاقستان» ارناسىندا دا ءجۇر). كەرەك جەردە سالعىلاستىم، قاجەت جەردە ايعالاستىم، نە كەرەك، ار-ۇياتىمنىڭ دەڭگەيىندەگى مۇددەلەردى قورعاۋ ءۇشىن بەلسەنە «سوعىستىم» دەۋگە دە بولادى. ءتىپتى، قازاق ءتىلدى باعدارلامالاردىڭ  نامىسىن جىرتىپ  ۇلكەن كابينەتتە توبەلەسكەنىم دە راس. ەشكىمگە ءوز  نامىسىمدى دا، قازاقتىڭ نامىسىن دا تاپتاتقان ەمەسپىن، تاپتاتپايمىن دا!  راحات اليەۆكە  «ءولىپ-ءتىرىلىپ» قىزمەت ەتكەن  «كتك-نىڭ» سول كەزدەگى بەلسەندى باسشىلارى «حابار» تىزگىنىن قولدارىنا الماقشى بولىپ، عيماراتتىڭ ىشىندە الشاڭ باسىپ ءجۇرىپ، تىستەنە بۇيرىق بەرە باستاعان كەزدە، اليەۆتىڭ  باق ماسەلەسى بويىنشا وڭ قولى بولىپ سانالاتىن قۇدىرەتتى كلەششەنكوۆقا  (كەيىن مارقۇم بولىپ كەتتى)  اشىق قارسى شىققان جانە ولاردى رەسمي تىلدە اشىق «پوسلات» ەتكەن جالعىز ءوزىم بولدىم. ولاردى «حاباردان» مەن قۋىپ شىقتىم دەپ ايتا المايمىن، الايدا مەنىڭ سوتقارلىعىم ولارعا ءسال دە بولسا توقتاۋ بولعانىنا سەنىمدىمىن. مەن بۇنى ماقتانۋ ءۇشىن نەمەسە اقتالۋ ءۇشىن ايتىپ جاتقان جوقپىن. بىقسىتپا پىكىرلەردى لاجسىز وقىپ وتىرعان كوزى قاراقتى وقىرمانعا بولعان ءجايدىڭ شەتىن شىعارعىم كەلگەندىكتەن جازىپ وتىرمىن.

ال، ەندى ءوزىم سىرتىنان جاقسى سىيلايتىن قاسىم امانجولوۆتىڭ  سايت بەتىندە بەلسەنە تالقىلانىپ جاتقان سۇحباتى مەن  «حابار»  ەفيرىندە كورسەتىلگەن «اقيقات» ءفيلمى جايلى تاقىرىپقا  كەلسەك، بۇعان دا جاۋاپ بەرۋگە تىرىسايىن.

1. «اقيقات» فيلمىندە  بەينەلەرى كورىنگەن قاسىم امانجولوۆ، راحات مامىربەكوۆ جانە بولات ءمۇرسالىم سەكىلدى ازاماتتاردى ەفيردە دە، ستسەناري ماتىنىندە ەشكىم زىكىرشى دەپ اتاعان جوق. ول جەردە ءفيلمنىڭ باستى كەيىپكەرلەرىنىڭ (ياعني، زىكىرشىلەردىڭ) رەسپۋبليكالىق ارناداعى كەيبىر باعدارلامالار ارقىلى جۇرتقا اسەر ەتۋگە تىرىسقانى تۋرالى ايتىلادى.  جوعارىداعى جىگىتتەردىڭ «حابارعا» كەلگەنى جانە ماعان جولىققانى راس. مەن وسى كەزدە الماتىدا ءىس-ساپارمەن جۇرگەن ەدىم. ولار رەنىشتەرىن ءبىلدىردى. مەن ولارعا تۇسىنىستىكپەن قارادىم. ىڭعايسىز جاعداي، ارينە. ولار ماعان ەكى-ءۇش سۇراق قويدى، مەن دە ولارعا ءبىر سۇراق قويدىم. جاۋاپ الىستىق. بىراق، كەيبىر سۇراق-جاۋاپتار سول جەردە قالادى دەپ كەلىسكەندىكتەن جانە راحات پەن بولات بۇل تۋرالى سىرتقا ەشتەڭە دەمەگەندىكتەن، مەن دە ءبارىن اشىپ  ايتقىم كەلمەيدى. ال، ەندى قاسىم امانجولوۆتىڭ  مەنى «راحات اليەۆتىڭ قىلمىستىق توبىنا، سونىڭ اقپاراتتىق رەسۋرستارىنا قاتىستى سىبايلاس ەتىپ جىبەرۋ» تۋرالى سۇراعىنا كەلسەك، مەن ونى ەستىگەن جوقپىن. مۇمكىن، ونى قاسىم ىشىنەن نەمەسە ساۋالدىڭ دىبىستالۋ دەڭگەيىن وتە تومەندەتىپ ايتقان بولار، بايقامادىم؟ قايتا، مەنىڭ ءوزىم ولارعا، «مەن» «اساردىڭ» بەلسەندىسى بولماسام دا، داريعا نۇرسۇلتانقىزىنىڭ ماڭىندا جۇرگەندىكتەن اتالمىش پارتيانىڭ ءارتۇرلى شارالارىنا  تىلەكتەس رەتىندە قاتىسىپ ءجۇرىپ، سۋرەتكە نەمەسە بەينەتاسپاعا ءتۇستىم. كەيىن وعان دا قاتىستى بىرەۋ سۇراق قويۋى مۇمكىن عوي، مەن وعان اشۋلانبايمىن، باس تارتپايمىن، ساۋالدى دۇرىس قابىلدايمىن، وعان جاۋابىم دايىن»، دەپ وي تاستادىم. قاسەكەڭ، مەنىڭ وسى ءسوزىمدى وزىنىڭكى دەپ ويلاپ قالىپ، تەك «اسار» مەن راحاتتىڭ ورنىن اۋىستىرىپ، باسقا «سۇراققا» اينالدىرعانى قىزىق بولدى. ونىڭ ۇستىنە، قاسىم مىرزانىڭ راحات اليەۆتىڭ «اقپاراتتىق رەسۋرستارىنا» دەگەن «جەككورىنىشتى» سەزىمىن ونشا تۇسىنە المادىم. ەگەر، سونشالىقتى ءپرينتسيپشىل بولسا، 2007-ءشى جىلى اليەۆتىڭ «قازاقشا كوزى مەن قۇلاعى» بولىپ جۇرگەن قادىرجان زابيح «ەل ارناعا» ديرەكتور بولىپ تاعايىندالعان كەزدە، قاسىم مىرزا نەگە «حابار» جاعالاپ ءجۇردى ەكەن دەگەن ورىندى ساۋال تۋادى؟ ءدال سول كەزدە راحاتتىڭ «ەرلىكتەرى» كۇن سايىن باسىلىم بەتتەرىندە ورىن الا باستاعان شاق بولاتىن. ارينە، قارىن اشقان كەزدە كەيبىر ارنانى «قىلمىستىق توپقا» بايلانىستىرۋدى ۇمىتىپ كەتەتىنىمىز بار. ايتپاقشى، راحات اليەۆ كەتە سالىسىمەن قادىرجان زابيح ورنىنان الىندى،  ال ءسىزدىڭ تۇسىرىلۋگە جەتپەي قالعان جوباڭىزعا دايىندالعان دەكوراتسيانى باسقا باعدارلاماعا پايدالاندىق. مەنىمەن بىرگە «سىبايلاس» بولىپ كەتپەگەنىڭىز قانداي جاقسى بولعان؟ايتپەسە، ءسىز دە «قىلمىستىق توپتىڭ» «اقپارات رەسۋرسىندا» باسقاشا «شىننىڭ ءجۇزىن» ايتىپ، «ءجۇزىپ» جۇرەر ەدىڭىز.  ارينە، جۇرتتىڭ جاپپاي تالقىلاۋىنا تۇسكەن فيلمنەن سوڭ، ولاردىڭ ەشقايسىسىنا وڭاي ەمەس. ايتپاقشى، قاسىم «مۇنداي وقيعادان سوڭ، بىزبەن قانداي تەلەارنا جۇمىس ىستەيدى» دەپ سۇراعان كەزدە، وعان مەن ىستەيمىن دەپ جاۋاپ بەردىم. راسىندا دا، ماعان شىعارماشىلىق ادامىنىڭ ءتۇر-ءتۇسى، رۋ-ءجۇزى،  جەكە كوزعاراسى،  يماندىلىعىنىڭ ولشەمى ەشقانداي اسەر ەتپەيدى. تەك، ءوز جۇمىسىن كاسىبي دەڭگەيدە ەڭ باستىسى ءادىل ىستەسە بولعانى. مەن «ساقالىڭىزعا» دا، «زىكىرىڭىزگە» دە قارسى ەمەسپىن. بىراق، «ساقال» مەن «زىكىر» جۋرناليستيكانى قارۋعا، حالىقتى ساياسي قۇرالعا اينالدىراتىن بولسا، مەن وعان ءۇزىلدى-كەسىلدى قارسىمىن. تاعى ءبىر ءجايت، كەزىندە رەسپۋبليكالىق گازەتتەردىڭ بىرىندە جۇرگەندە جۇلدىز ءابدىلدا سياقتى دارىندى جاس جۋرناليستەرمەن بىرگە وسى قاسىم امانجولوۆتى دا ەڭ العاش تەلەۆيزيا سالاسىنا ءوزىم شاقىرعان ەدىم. بىراق، ول كەزدە بەلگىلى ءبىر سەبەپتەرمەن جۇمىس باستاپ كەتە المادىق.

2. «اقيقات» فيلمىنە مەنىڭ ەشقانداي قاتىسىم جوق دەپ ايتسام، ەشكىم سەنبەس ەدى. قاتىسىم بار. ويتكەنى، وسى فيلم دايىندالعان تەلەارنانىڭ باس پروديۋسەرىمىن. اتىپ تاستاساڭىزدار دا، شاۋىپ تاستاساڭىزدار دا وسى. بۇل ءۇشىن قۇدايدان باسقا ەشكىمنەن قورىقپايمىن. ءوزىم ءۇشىن جاۋاپ بەرە الامىن. فيلم سوڭىندا ونى جاساۋشىلاردىڭ اتى-ءجونى نەگە كورسەتىلمەگەن ساۋالدارىڭىزعا جاۋابىن ايتايىن. ءتۇسىرۋ كەزىندە شىعارماشىلىق توپتىڭ ارتىنان اڭدۋلار بولدى، تەلەفون ارقىلى ۇركىتۋ ەسكەرتپەلەرى دە جاسالدى. سوندىقتان، جەكە قاۋىپسىزدىگىن ساقتاۋ ماقساتىندا ولاردىڭ كىم ەكەندىگىن جاريالامادىق.

3. فيلم جاسالۋ بارىسىندا شىعارماشىلىق توپتىڭ  قولىندا كوپتەگەن ماتەريالدار بولدى. ونىڭ ىشىندە ناعىز شىندىقتى كورسەتەتىن  (كەيبىرى ادام شوشىرلىق) بەينەتاسپالار جەتكىلىكتى. كوبىسى پايدالانىلعان جوق. كورمەگەندەرىڭىز سىزدەرگە دا جاقسى شىعار، ايتپەسە، ماقتاپ-ماداقتاپ جاتقان ازاماتتارىڭىز بەن تاقسىرلارىڭىز تۋرالى ادەمى تۇسىنىكتەرىڭىز مۇلدەم وزگەرۋ دە مۇمكىن.

4. بىرەۋلەر جازىپتى، اتالمىش فيلم «ساقالدىلار» تاپسىرىس بەرگەن سوڭ جاسالعان شىعار دەپ؟ ولاي ەمەس، قۇداي قالاسا، سول «ساقالدىلاردىڭ» وزدەرى  تۋرالى دا فيلم جاسايتىن شىعارمىز. ءبىز ءۇشىن ولاردىڭ كىم ەكەنى، قانداي لاۋازىمدا وتىرعانى نەمەسە كىمنىڭ تۋىسقانى ەكەنى ەشقانداي رول اتقارمايدى. ءبىز قازاقتى بولەتىندەردىڭ بارىمەن ايانباي كۇرەسەمىز. حالىقتىڭ كوزىن اشۋ كەرەك.

5. يسماتۋللا مىرزاعا دا، سايات مىرزاعا دا جانە باسقالارعا دا مەنىڭ ەشقانداي تەرىس كوزقاراسىم جوق. ولار دا قازاقتىڭ اتپال ازاماتتارى. ولار دا ءوز كوزقاراستارىن دۇرىس دەپ ساناۋعا قۇقى بار. بىراق، كەز-كەلگەن كوزقاراس تەك بەيبىت جولمەن عانا كۇش-قۇرالسىز  جۇزەگە اسۋى كەرەك. مەن ول كىسىلەردىڭ تەز ارادا بوستاندىققا شىعىپ، ءوز وتباسىلارىنا ورالۋىن شىن جۇرەكپەن تىلەيمىن.

6. «شىمكەنتتىك» ەكەنىم راس. اينالاسى تولعان شىمكەنتتىك دەپ ەشكىم ايىپتاي المايدى. بۇل جايلى، مەندە جۇمىس جاسايتىن (جاعىراپيالىق جاعىنان ءارالۋان بولىپ كەلەتىن) شىعارماشىلىق توپتىڭ مۇشەلەرىنەن سۇراپ بىلۋلەرىڭىزگە بولادى. ال، شىمكەنتتىكتەر تۋرالى جازعان ءازىل شاتپاقتارىمدى تەرىس ءتۇسىنىپ جاتقاندارعا ارتىق ەشتەڭە ايتا المايمىن. مەنىڭ جازعاندارىم باياۋ ويلايتىندار مەن پالە ويلايتىندارعا ارنالماعان.

7. «حابار» ارناسى بيلىككە قىزمەت ەتەدى. ول بيلىكتىڭ ناسيحاتشىسى. ىستەگەن جۇمىسىمىزعا ءدان ريزامىن دەپ ايتا المايمىن. «حاباردىڭ» رەيتينگىن كوتەرۋ كەرەك دەپ كۇرەسىپ جۇرگەن پەندەلەردىڭ ءبىرىمىن. وزگەرتكىم كەلەدى، وزگەرگىم كەلەدى. بىراق، ونىڭ ءبارى بىزگە قاتىستى ەمەس، ونى وزدەرىڭىز دە بىلەتىن شىعارسىزدار.

8. جۇمىس وتە كوپ. سەنبى، جەكسەنبى كۇندەرى دە جۇمىس ىستەيمىن. سىزدەرمەن سالعىلاسىپ جاتۋعا ۋاقىتىم جوق. «اباي» سايتىنا اندا-ساندا شىمشىما شۋماقتار جازىپ تۇراتىنمىن. بىراق، جۇرتتىڭ تالقىلاۋلارىن وقىمايتىنمىن. ەندى وقىدىم. ماسقارا! بۇدان كەيىن ەشقاشان، ەشقانداي تالقىلاۋدى وقىماۋعا شەشىم قابىلدادىم.