قر تۇڭعىش پرەزيدەنتى نۇرسۇلتان ءابىشۇلى نازارباەۆ مەملەكەت قارجىسىنىڭ دۇرىس جۇمسالۋىن قاداعالاۋ كەرەكتىگىن ايتتى - دەپ حابارلايدى اباي-اقپارات. 

نازارباەۆ بۇل ويدى قازاقستان رەسپۋبليكاسىنىڭ مەملەكەتتىك بيۋدجەتىنىڭ اتقارىلۋىن قاداعالايتىن رەسپۋبليكالىق ەسەپ كوميتەتىنىڭ ءتورايىمى ناتاليا گودۋنوۆانى قابىلداعان كەزىندە ايتقان.

نۇرسۇلتان ءابىشۇلى: "بۇل كوميتەتىنىڭ باستى مىندەتى – مەملەكەت قارجىسىنىڭ دۇرىس جۇمسالۋىن قاداعالاۋ. سوندىقتان دا، سىزدەردىڭ الدارىڭىزدا باقىلاۋ ىسىنەن اۋديتكە كوشۋگە بايلانىستى جاڭا مىندەتتەر جۇكتەلىپ وتىر" دەي كەلىپ، ناتاليا گودۋنوۆاعا ەسەپ كوميتەتىنىڭ تالاپتارىن كۇشەيتۋدى، بيۋدجەت قارجىسىن قاتاڭ قاداعالاۋدى، ءاردايىم  مەملەكەت قارجىسىن باقىلاپ وتىرۋدى جانە ونى ءوز ورنىمەن جۇمسالىپ، دۇرىس باعىتتا يگەرىلۋىن ۇيىمداستىرۋدى تاپسىردى.

ناتاليا گودۋنوۆا ءوز كەزەگىندە بيۋدجەتتى يگەرۋدىڭ الەمدىك تاجىريبەلەرىن مىسال ەتە وتىرىپ، مەملەكەت قارجىسىن وڭدى جۇمساۋعا اۋديت جۇرگىزۋ بارىسىنىڭ قالاي بولعانىن دا ايتتى. سوڭعى ۋاقىتتا وسى سالاداعى قۇقىق بۇزۋشىلىقتىڭ ازايعانىن، قازاقستان بويىنشا قارجىلىق ءتارتىپتىڭ جاقسارا تۇسكەنىن ناقتى ساندار ارقىلى كورسەتىپ شىقتى.

سونداي-اق، ناتاليا گودۋنوۆا نۇرسۇلتان ءابىشۇلىنا 2018 جىلدىڭ قورىتىندىلارى تۋرالى ايتىپ كەلىپ، مەملەكەتتىك بيۋدجەتتى يگەرۋدەگى جەتكەن جەتىستىكتەر مەن ءىشىنارا بولعان كەمشىلىكتەر تۋرالى مالىمدەدى.

ەسەپ كوميتەتىنىڭ ءتورايىمى ناتاليا گودۋنوۆا قر تۇڭعىش پرەزيدەنتى - ەلباسىنا مەملەكەتتىك ءھام سالالىق باعدارلامالار بويىنشا بيۋدجەتىڭ ءتيىمدى يگەرىلۋىنە جۇرگىزىلگەن باقىلاۋلاردىڭ ناتيجەلەرىن ناقتى دەرەكتەرمەن بايانداپ بەردى. سونىمەن قاتار، قارجىلىق جوسپارلاۋ مەن جالپى ەكونوميكالىق سالانىڭ ساپاسىن ارتتىرۋ ءۇشىن ۇكىمەتپەن بىرلەسىپ جۇمىس جاساپ جاتقانىن دا باياندادى.

ناتاليا گودۋنوۆا، قازاقستان رەسپۋبليكاسىنىڭ مەملەكەتتىك بيۋدجەتىنىڭ اتقارىلۋىن قاداعالايتىن رەسپۋبليكالىق ەسەپ كوميتەتىنىڭ ءتورايىمى:

– ەسەپ كوميتەتى الداعى ۋاقىتتا تيىمدىلىك اۋديتىنە كوشۋ ءىسىن كەشەندى تۇرلە جالعاستىرا بەرەتىن بولادى. ءبىز وسى تيىمدىلىك ءاۋديتىن جۇرگىزۋ ارقىلى 2018 جىلى جالپى سوماسى 430 ميلليارد تەڭگە قاراجاتقا بايلانىستى ءتارتىپ بۇزۋشىلىق بولعانىن انىقتادىق. مۇنىڭ سىرتىنداعى بۋحگالتەرلىك ەسەپسىز جاسالعان قۇقىق بۇزۋشىلىقتى ەسەپكە الساق، ونىڭ مولشەرى 16 ميلليارد تەڭگەگە جەتەدى. ەندى وزدەرىڭىز ەسەپتەڭىزدەر. 2017 جىلى بۇل كورسەتكىش 70 ميلليارد تەڭگەنى قۇراعان بولاتىن. ياعني، وسى ناتيجەدەن-اق، مەملەكەت قارجىسىن ءتيىمدى پايدالانۋدىڭ ارتقانىن، قارجىلىق قۇقىق بۇزۋشىلىقتىڭ ازايعانىن بايقاۋعا بولادى.  

كەزدەسۋ اياعىندا ەلباسى نۇرسۇلتان نازارباەۆ

كەزدەسۋ سوڭىندا مەملەكەت باسشىسى قازاقستان رەسپۋبليكاسىنىڭ مەملەكەتتىك بيۋدجەتىنىڭ اتقارىلۋىن قاداعالايتىن رەسپۋبليكالىق ەسەپ كوميتەتىنىڭ ءتورايىمىنا «نۇر وتان» پارتياسىنىڭ XVIII سەزىندە ايتىلعان الەۋمەتتىك باعدارلامالار مەن باستامالاردىڭ جۇزەگە اسىرىلۋىنا دا ءتيىستى باقىلاۋ جاساۋ كەرەكتىگىن ايتتى.

Abai.kz