ساياسي رەپرەسسياعا ۇشىراعان قانشاما ازامات تۋعان جەرگە جەتە الماي سىرتتا بوسىپ ءجۇر. "انا تىلىمدە سويلەپ جاتقان داۋىستى ەسىتىپ، جىلاپ جىبەردىم" دەپ جازىپتى كەشە فبعا قازاعىن زارىعىپ ساعىنعان ءبىر بوسقىن.

ەل ىشىندە ساياسي قۋعىن كورىپ جۇرگەن قانشاما ازامات ءۇشىن "كيسلورود" جابىلدى. ەلىمىزدىڭ مىقتى مەملەكەت بولىپ قالىپتاسۋىنا ۇلەس قوساتىن ءبىلىمى تەرەڭ، بىلىگى جەتىك قانشاما مەملەكەتشىل تۇلعا مىناۋ جۇيەنىڭ ايتاعىنا كونبەگەنى ءۇشىن دە ءۇيىنىڭ قابىرعاسىن كۇزەتە عۇمىر كەشىپ، ارماندا كەتىپ جاتىر. بيلىكتى كولگىرسي ماقتاپ قىزمەتى وسكەندەردىڭ كولەڭكەسىندە جۇرگەن مىقتىلار قانشاما؟! ساياسي سەبەپتەرمەن موينىنا اقشا ءىلىنىپ، جالامەن تۇرمەدە وتىرعان قازاقتار جوق ەمەس. كەدەيشىلىك پەن اينالا تولعان زاڭسىزدىقتان شارشاعان قانشاما قازاق شەتەل اسىپ كەتىپ جاتىر.

جۋىردا قۇربىم زۆونداپ:"شەتەلگە ءبىراز تانىسىم كوشىپ كەتتى. ءۇي تازالاپ، كەمپىر-شال باعىپ، اۋلا سىپىرىپ بىزدىكىلەر اقشانى كۇشتى تاۋىپ جاتىر ەكەن، سوندا كەتۋىم مۇمكىن",-دەيدى. ودان جۋىردا امەريكاعا كەتكەن ءبىر دوسىم:"دينا، امەريكادا بومجدارعا 900 دوللار جاردەماقى تولەنەدى ەكەن. مۇندا قاڭعىباستارىڭ شالقىپ ءومىر سۇرەدى",-دەپ ازىلدەيدى.

ال ءبىزدىڭ قازاق ءۇشىن 900 دوللار - 342 مىڭ جالاقى دەگەنىڭ ارمان عوي! ەكى ەلدىڭ ەكونوميكاسىن سالىستىرۋعا كەلمەيدى، دەسە دە، امەريكا كوشەدە جاتقان قاڭعىباستاردىڭ قامىن ويلاپ جاردەماقى تولەيدى. ال بىزدە كوپبالالى اسىل انالارىمىزعا جۋىردا تاعايىندالعان 21 مىڭىنىڭ ءوزىن (55 دوللار) اشىنعان مۇڭلىقتاردى جەردەن الىپ-جەرگە سالىپ، ءاجۋالاپ، مىسقىلداپ، "مەملەكەت ەشكىمدى اسىراۋعا مىندەتتى ەمەس" دەگەندى ملن رەت قايتالاپ، ودان قالدى ء"بىلىمسىز-توپاس، نادانعا" تەڭەپ، تەرلەپ-تەپشىپ، "يتكە سۇيەك لاقتىرعانداي" تولەۋگە مىندەت الدى. وندا دا 111 مىڭ كوپبالالىنىڭ بارىنە ەمەس. جارتىسىنىڭ جارتىسىنا.

قايران انالار-اي! قادىرىڭدى بىلەر جاقسى بولسا، مەملەكەتتىك اپپاراتتىڭ "اپپەتيتىن" ازايتىپ، بيۋدجەتتىك "بيزنەسمەندەردى" اۋىزداقتاپ، ەڭ ءبىرىنشى كەزەكتە كومەككە مۇقتاج جاندارعا جاعداي جاسار ەدى-اۋ...

ارعىماققا ءمىنىپ العان ۋاقىت شاۋىپ بارادى. جەتكىزبەيدى... ەندى سول ارعىماققا قارعىپ مىنەر ۋاقىت تاياپ قالدى.

"بيلىك ترانزيتىنە" تەك قانا بيلىكتەگىلەر ەمەس، قوعام دا دايىندالۋى ءتيىس. بۇل - ءبىزدىڭ تاعدىر! ميلليونداردىڭ تاعدىرى! بولاشاقتىڭ تاعدىرى!
ۋاقىتتىڭ قوجايىنى - ءبىز!

ارعىماعىمىز شاۋىپ ءوتىپ، ءومىر ءوتىپ كەتپەسىن! ەلدەگى ساياسي پروتسەسستەرگە بەلسەنە ارالاسىپ، قىراعى وتىرايىق!

دينا ەلگەزەكتىڭ facebook پاراقشاسىنان

Abai.kz