مەملەكەت باسشىسى ن.نازارباەۆتىڭ باستاماسىمەن قولعا الىنعان "7-20-25" مەملەكەتتىك تۇرعىن ءۇي باعدارلاماسى ءۇيسىز جۇرگەن وتانداستاردىڭ ءۇمىتىن جاققان، جالپىحالىقتىڭ قولداۋىنا يە بولعان باستامالاردىڭ ءبىرى ەكەنى بەلگىلى. ەلباسى ۇكىمەت پەن جەرگىلىكتى باسقارۋ ورگاندارىنا، ۇلتتىق بانككە اتالمىش يپوتەكالىق باعدارلامانى جۇزەگە اسىرۋ ءۇشىن بىرقاتار تاپسىرمالار مىندەتتەگەن ەدى.

وسى ۋاقىتقا دەيىن قاتارداعى قاراپايىم قازاقتى قولجەتىمدى باسپانامەن قامتاماسىز ەتۋگە باعىتتالعان بۇل باعدارلاما بويىنشا ءبىراز شارۋانىڭ شەتى قايىرىلعان. دەسەدە، ماسەلە تولىق شەشىم تاپتى دەۋگە تاعى كەلمەيدى.

سول سەبەپتى دە ەلباسى ۇكىمەت پەن ۇلتتىق بانككە تاعى دا تاپسىرلامار جۇكتەدى.

"7-20-25" باعدارلاماسىن جۇزەگە اسىرۋ ءۇشىن ۇلتتىق بانك پەن ۇكىمەت بىرلەسە جۇمىس ىستەۋى قاجەت. "ۇلتتىق بانكتىڭ، ەكىنشى دەڭگەيلى بانكتەر مەن قور نارىعىنىڭ مۇمكىندىكتەرىن ىسكە قوسۋ كەرەك. ۇلتتىق بانك كەمىندە 1 تريلليون تەڭگە قارجىنى تارتاتىن ارنايى كومپانيا قۇرىپ، ونى بانكتەردىڭ جوعارىدا ايتىلعان شارتتارىنا جاۋاپ بەرەتىن جاڭا يپوتەكالىق نەسيەلەرىن ساتىپ الۋعا جۇمساۋى قاجەت. باعدارلامانى جۇزەگە اسىرۋ ناتيجەسىندە ميلليون قازاقستاندىق باسپانا الۋ مۇمكىندىگىنە يە بولادى", – دەگەن ەدى ەلباسى.

وسىعان وراي الماتى وبلىسىنىڭ اكىمى اماندىق عابباسۇلى اۋدان جانە قالا اكىمدەرىنىڭ باسىن قوسىپ القا-قوتان جيىن وتكىزگەن. ول جيىندا "7-20-25" مەملەكەتتىك تۇرعىن ءۇي باعدارلاماسىنىڭ جۇزەگە اسىرىلۋى بارىسى تالقىلاندى.

اكىمنىڭ اقپاراتىنا سۇيەنسەك، اتالمىش يپوتەكالىق باعدارلامانىڭ ورىندالۋ كورسەتكىشى الماتى وبلىسىنا قارايتىن ەڭبەكشىقازاق، جامبىل، ەسكەلدى، قاراتال، پانفيلوۆ، اقسۋ اۋداندارىندا تومەن. ال كوكسۋ، ىلە، سارقان جانە الاكول اۋداندارىندا ايتارلىقتاي العا جىلجۋ بايقالادى.

سونداي-اق، وبلىس باسشىسى اۋدان جانە قالا اكىمدەرىنىڭ ەسەپتەرىن تىڭدادى. مەملەكەتتىك تۇرعىن ءۇي باعدارلاماسىنىڭ يگەرىلۋى بويىنشا جۇمىس جۇرگىزۋ ءۇشىن اكىمدەردە ءبىر اپتا ۋاقىت بەردى.

"كوكسۋ اۋدانىنان ۇلگى الىڭدار، شاعىن اۋدان بولسا دا، بانكتىڭ كەلىسىمىن 30 ادام الىپ ۇلگەرگەن، 15-ءى كەلىسىمشارت جاساستى. ال الماتىنىڭ ماڭىنداعى ءىرى اۋداندار قۇرىلىس قارقىندى ءجۇرىپ جاتسا دا، كوشتەن قالىپ وتىر. تۇرعىن ءۇي باعدارلاماسىن ورىنداۋدا كىمنىڭ بار ىنتاسىمەن جۇمىس ىستەپ جاتقانىن، ال كىمنىڭ قول قۋسىرىپ قاراپ وتىرعانىن وسىدان-اق كورۋگە بولادى", - دەدى اماندىق عابباسۇلى.

مەملەكەت باسشىسىنىڭ تاپسىرماسىنا سايكەس، وبلىس باسشىسى ەكىنشى دەڭگەيلى بانك وكىلدەرىنە دە قايرىلا سويلەدى. بانك وكىلدىكتەرى جەرگىلىكتى اتقارۋشى ورگاندارمەن قويان-قولتىق  جۇمىس جاساۋعا شاقىردى.

"7-20-25» باعدارلاماسى – حالىقتى قولجەتىمدى باسپانامەن قامتۋعا ارنالعان پرەزيدەنتتىك تۇرعىن ءۇي باعدارلاماسى. جەرگىلىكتى اتقارۋشى ورگاندار سىزدەرمەن قويان-قولتىق جۇمىس ىستەۋى كەرەك. الدارىڭىزعا كەلگەن ءاربىر تۇرعىنعا باعدارلاما بويىنشا ءۇي الۋدىڭ شارتتارى مەن ونداعى جەڭىلدىكتەردى تۇسىنىكتى، قاراپايىم تىلمەن ۇعىندىرىپ بەرۋگە تيىسسىزدەر. ازىرگە مەن مۇنداي بىرلەسكەن، ءتيىمدى جۇمىستى كورىپ تۇرعان جوقپىن", - دەدى وبلىس باسشىسى.

جيىندى قورىتىندىلاعان اماندىق باتالوۆ ءبىرىنشى كەزەكتە باعدارلاماعا قاتىسۋشىلار پۋلىن قالىپتاستىرۋ كەرەكتىگىن اتاپ ءوتتى.

"7-20-25» باعدارلاماسىن ىسكە اسىرۋ - مەنىڭ جەكە باقىلاۋىمدا. ءاربىر اۋدان، قالا اكىمدەرى باعدارلامانىڭ ورىندالۋىن جەكە جاۋاپكەرشىلىكتەرىنە السىن. قول جەتكىزگەن ناتيجەلەرىڭ جەرگىلىكتى جەردەگى جۇمىستارىڭنىڭ ساپاسىن ايقىندايتىن بولادى", - دەدى باتالوۆ.

Abai.kz