قازاقستان حالقىنىڭ 42 پايىزى اۋىلدىق جەرلەردە تۇراتىنى بەلگىلى. بۇل رەسمي ستاتيستيكا. ال ەندى سول اۋىل تۇرمىسىن كوتەرۋ ءۇشىن مەملەكەت تاراپىنان "اۋىل - ەل بەسىگى" اتتى ارنايى جوبا قابىلدانعان. بۇگىن سول جوبا تۋرالى ءسوز ەتەمىز.

"رۋحاني جاڭعىرۋ" باعدارلاماسى اياسىندا قولعا الىنعان "اۋىل - ەل بەسىگى" ارنايى جوباسى ەلدى مەكەندەر مەن اۋىلدىق ايماقتاردىڭ تۇرمىس الەۋەتىن دامىتۋعا باعىتتالعان. وسى ماقساتتا ۇكىمەت تاراپىنان پەرسپەكتيۆاسى بار دەگەن 1500-دەن استام ەلدى مەكەن انىقتالعان ەكەن. الداعى ۋاقىتتا اۋىلدىق جەرلەردى كوركەيتۋ ءۇشىن جىل سايىن مەملەكەت قازىناسىنان 30 ميلليارد تەڭگە بولىنبەك. وسىشايشا، اينالاسى ءۇش جىلدىڭ ىشىندە اۋىلداردى قارجىلاندىرۋ جوباسى قولعا الىناتىن بولادى. ينجينەرلىك كوممۋنيكاتسيالىق ينفراقۇرىلىمدار، الەۋمەتتىك نىساندار بوي كوتەرەدى دەپ جوسپارلانۋدا.

بيۋدجەت  2019-2021 جىلدارعا ەسەپتەلگەن. جوبا تۇزىلگەن. ەندى بۇل جوبانى ءماجىلىس ماقۇلداۋى كەرەك.

"اۋىل - ەل بەسىگى" ارنايى جوباسى بىلتىر، ياعني 2018 جىلى باستالعان. 2018 جىلى قازاقستان حالقىنا جولداۋ جولداعان مەملەكەت باسشىسى نۇرسۇلتان نازارباەۆ اۋىلدىق جەرلەردىڭ الەۋمەتتىك ورتاسىن جاڭعىرتۋدى تاپسىرعان. وسى ماقساتتا "رۋحاني جاڭعىرۋ" باعدارلاماسى اياسىندا ارنايى جوبا قولعا الىنعان.

"اۋىلدىق جەرلەردىڭ الەۋمەتتىك ورتاسىن جاڭعىرتۋعا دا كىرىسۋىمىز قاجەت. وسىعان بايلانىستى "اۋىل - ەل بەسىگى" اتتى ارنايى جوبانى جۇزەگە اسىرۋ كەرەك. بۇل ارقىلى قازاقستاندىقتاردىڭ جەرگىلىكتى جەردەگى ەڭبەگىنە قاتىستى يدەولوگيانى قولعا الۋىمىز قاجەت. بۇل اكىمشىلىكتەردىڭ مىندەتى", دەگەن ەدى مەملەكەت باسشىسى.

قازىرگى تاڭدا جاڭا جۇمىس ورىندارىن اشۋ مۇمكىندىگى مول دەگەن 1781 ەلدى مەكەن ىرىكتەلگەن. بيۋدجەتى 90 ميلليارد تەڭگەنى قۇرايتىن ارنايى جوبا دا ازىرلەنگەن. ەندى ونى جۇزەگە اسىرۋ ءۇشىن زاڭ جوباسى ماجىلىستە، سونان سوڭ سەناتتا ماقۇلدانۋى قاجەت.

اۋىل – قازاق ەلىنىڭ جۇرەگى. اۋىل – قازاقتىڭ قاسيەتتى قۇت مەكەنى، قاينار كوز، التىن بەسىگى. كيەلى قازاق دالاسى عاسىرلار بويى حالىقتىڭ وزەگىن تالدىرمادى. ءوسىپ-ونۋىنە مۇمكىندىك بەردى. بۇگىندە وركەنيەتتى ەل بولىپ، دامۋ جولىن قالادان تاپقانىمىزبەن، اۋىلدىڭ الار ورنى ەرەكشە. ال مەملەكەت باسشىسىنىڭ باستاماسىمەن قولعا الىنعان "اۋىل - ەل بەسىگى" ارنايى جوباسى سول اۋىلدى كوركەيتۋگە جاسالعان ناقتى قادام بولماق.

بولاشاعى زور اۋىلداردى دامىتۋ ءۇشىن "اۋىل – ەل بەسىگى" ارنايى جوباسى قارجىلاندىرىلادى. ءۇش جىل ىشىندە 90 ملرد تەڭگە بولىنەدى. 1,5 مىڭعا جۋىق پەرسپەكتيۆالىق اۋىلدار قامتىلاتىن بولادى. پەرسپەكتيۆا كولەمى، ورنالاسۋى، دامۋ الەۋەتى جانە ت.ب. نەگىزىندە انىقتالادى. بۇدان باسقا، مونوقالالار مەن شاعىن قالالاردى دامىتۋعا جىلىنا 10 ملرد تەڭگە بولىنەدى. بۇل وڭىرلەردە 100-گە جۋىق ينجەنەرلىك-كوممۋنيكاتسيالىق ينفراقۇرىلىمدى سالۋ نەمەسە قايتا قۇرۋدى قامتاماسىز ەتەدى.

Abai.kz