نارازىلار 2005-2009 جىلدارى يپوتەكالىق كرەديت الىپ، ءتۇرلى جاعدايعا تاپ بولعان سوڭ قارىزىن تولەي الماي وتىرعان ازاماتتاردىڭ قارىزىن كەشىرۋدى تالاپ ەتتى. نارازىلار "بانكتەر ازاماتتارعا تارتىپ العان ءۇيدى قايتارۋى كەرەك. تۇرمىسى تومەن وتباسىلاردىڭ قارىزى كەشىرىلۋى كەرەك" دەپ تە تالاپ قويدى. جينالعاندار "ازاماتتار زاڭدى تۇردە ءوز قۇقىقتارىن قويۋى ءۇشىن" سوت جۇيەسىن رەفورمالاۋ مەن جەكە سوت ورىنداۋشىلار قىزمەتىن الىپ تاستاۋ قاجەتتىگىن ايتتى.
نارازىلار بيلىك وكىلدەرىنە تالاپتارىن 9 ماۋسىمدا وتەتىن كەزەكتەن تىس پرەزيدەنت سايلاۋىنا دەيىن ورىنداۋدى سۇرادى. "ناقتى ءىس كۇتەمىز، ناقتى ءىس دەگەنىمىز كرەديت امنيستياسى بولۋى كەرەك" دەدى جۋرناليستەرگە "ارنامىس-5" قوعامدىق بىرلەستىگىنىڭ توراعاسى قاناعات تاكەەۆا.
نارازىلاردى "نۇر وتان" پارتياسىنىڭ الماتىداعى فيليالىنىڭ وكىلى، قازاقستان پرەزيدەنتتىگىنە كانديدات قاسىم-جومارت توقاەۆتىڭ الماتىداعى شتابىنىڭ مۇشەسى بوريس جاپاروۆ قابىلدادى. ول "جينالعانداردىڭ تالابى ورىندى" دەدى.
- ايتقاندارىڭىز - ۇكىمەت پەن ۇلتتىق بانك جۇمىس ىستەۋى تۇرارلىق ماسەلەلەر. تالاپتارىڭىز - تۇرمىستىق جاعدايىن كوتەرۋى ءۇشىن يپوتەكا الىپ، كۇتپەگەن قيىندىققا تاپ بولعان ادامداردىڭ ءۇنى، - دەدى ول.
جاپاروۆ "مىندەتىمىز بەن سىزدەر بىزدەن كۇتەتىن نارسەنى جاسايمىز. بىراق ۇكىمەتتىڭ شەشىمىنە جاۋاپ بەرە المايمىز" دەدى.
Abai.kz
