Särsenbi, 13 Qaraşa 2019
Bilik 722 14 pikir 8 Qaraşa, 2019 sağat 10:42

Qazaqstan men Reseydiñ öñiraralıq forumında qanday qwjattarğa qol qoyıldı?

Memleket basşısı Qasım-Jomart Toqaev Qazaqstan men Reseydiñ XVI öñiraralıq ıntımaqtastıq forumına qatıstı. Bwl turalı Aqordanıñ baspasöz qızmeti jazdı.

Şekara mañı ıntımaqtastığın damıtudıñ özekti mäselelerine arnalğan forum jwmısına öñirler men oblıstardıñ basşıları, salalıq memlekettik organdar men eki eldiñ isker toptarınıñ ökilderi qatıstı.

Qazaqstan Prezidenti Forumnıñ memleketter arasındağı özara ıqpaldastıqtı damıtuğa bağıttalğan igi dästürge jäne tolıqqandı mehanizmge aynalğanın, ötken jıldardağı ıntımaqtastıqtıñ nätijesi osınıñ ayqın däleli ekenin atap ötti.

– Özara sauda-investiciyalıq ıqpaldastığımız aytarlıqtay keñeydi. 2003-2018 jıldar aralığında sauda kölemi 3,5 ese wlğaydı. 2018 jılı tauar aynalımı 6,5 trillion teñgeden astı nemese 19 milliard AQŞ dollarına jetti, – dedi Memleket basşısı.

Qasım-Jomart Toqaev energetika, mwnay-gaz salalarındağı ekijaqtı is-qimıldardıñ ösu qarqınına oñ bağa berdi.

– Kaspiy qwbır konsorciumı qwrılğan sätten bastap «Teñiz-Novorossiysk» mwnay qwbırı arqılı älemdik narıqqa 500 million tonnadan astam mwnay jetkizildi. Bwl – aytarlıqtay körsetkiş. Sonımen qatar konsorcium bizdiñ elderimizdiñ küş-jigerin biriktiru jäne senimdi şeteldik investorlardı tartu arqılı alınatın sinergiya twrğısınan tiimdi. Bizdiñ käsiporındarımız Qazaqstannıñ «Teñiz», «Korolevskoe» jäne «Qaraşığanaq» ken orındarında, sonday-aq, transşekaralıq «Hvalınskoe», «Central'noe» jäne «Qwrmanğazı» ken orındarında birlesken jwmıstar jürgizude, – dedi Prezident.

Memleket basşısı Euraziyalıq ekonomikalıq odaq ayasında jürgizilip jatqan ıqpaldastıqtardıñ nätijelerine toqtaldı. Onıñ aytuınşa, öñirlerdiñ Euraziyalıq ekonomikalıq odaqtıñ mümkindikterin belsendi paydalanuı özara sauda-sattıqtıñ artuına, jetkiziletin tauar nomenklaturasınıñ keñeyuine jäne investiciyanıñ wlğayuına ıqpal etti.

Qasım-Jomart Toqaev Qazaqstan men Reseydiñ ıntımaqtastığı ekonomikanıñ twraqtı ösimin qamtamasız etudiñ jäne halıqtıñ äl-auqatın arttırudıñ negizgi tetigi bola aladı dep esepteydi.

– Eki elde de investiciya tartu jäne eksportqa ıqpal etu üşin qwrılğan arnayı damu instituttarı jetkilikti. Bwl instituttar tauarlardı jetkizu üşin perspektivalı narıqtar men öñirlerimizdiñ investiciyalıq jäne infraqwrılımdıq mümkindikterin saraptap, ol jayında biznesti aqparattandırıp, elderimizdiñ şekaralas öñirleriniñ narıqtarın zertteu jönindegi birlesken bağdarlamanı äzirlep, iske asıra aladı. Bwl jwmıstı twraqtı äri jüyeli jürgizu kerek dep esepteymin, – dedi Memleket basşısı.

Qazaqstan Prezidenti şekara mañındağı öñirlerdiñ infraqwrılımdıq äleuetin nığaytuğa mümkindik beretin şekara mañı ıntımaqtastığınıñ bağdarlamasın äzirleudi wsındı.

– Şekara mañı aymaqtarınıñ infraqwrılımdıq äleuetin keñeytu jäne damıtu qajet. Qoldanıstağı infraqwrılım zamanaui talaptarğa say kelmeydi. Sondıqtan aldımızda auqımdı jwmıs bar. Qwrılğan transwlttıq dälizderdi, sonıñ işinde «Bir beldeu, bir jol» jäne «Soltüstik – Oñtüstik» megajobaların eskere otırıp, şekaralıq ötkizu beketterin jañğırtu kerek. Büginde ötkizu beketterin keñeytip, qosımşa birneşeuin aşu qajettigi tuındap otır, – dedi Qasım-Jomart Toqaev.

Bayandamada eki eldiñ öndiristik kooperaciyası salasındağı Birlesken is-qimıldar bağdarlamasınıñ mañızdı röl atqaratınına basa män berildi. Prezident salalıq ministrlikterdi, öñirlerdi, eksporttı damıtu jäne qoldau instituttarın üşinşi elderdiñ narıqtarına birlese şığu kezinde özara belsendi is-qimıl jasauğa şaqırdı. Sonımen qatar ol eki eldiñ baqılauşı organdarınıñ arasında tığız ıntımaqtastıq ornatu paydalı dep sanaydı.

– Auıl şaruaşılığı – kez kelgen ekonomikanıñ asa mañızdı sektorlarınıñ biri ekeni jasırın emes. Baqılauşı organdardıñ osı salağa erekşe nazar audaruı tüsinikti jäne tiimdi. Biraq ol şekten şıqpauı tiis. Sondıqtan äkimşilik kedergilerdi boldırmau, tuındaytın mäselelerdi şeşude jedeldikti qamtamasız etu üşin tiisti ministrlikter men vedomstvolar arasında tolıqqandı, kündelikti baylanıs qajet, – dedi Memleket basşısı.

Qasım-Jomart Toqaev Sport salasındağı ıntımaqtastıq bağdarlamasın äzirleudi, sonday-aq, Qazaqstan astanasında Bauman atındağı universitettiñ bazasında fizika-matematika mektebin aşu jönindegi bastamanı qoldadı. Säykesinşe, Reseydiñ şekaralas aymaqtarınıñ birinde «Nazarbaev Ziyatkerlik mektebiniñ» filialın aşuğa boladı dep sanaydı.

Qasım-Jomart Toqaev söziniñ soñında ekologiyalıq problemalardı şeşudiñ mañızdılığın ayta kele, kelesi öñiraralıq forumdı 2020 jılı Kökşetau qalasında ötkizudi, sonday-aq, onıñ taqırıbın «Ekologiya jäne jasıl ösim salasındağı ıntımaqtastıq» dep ataudı wsındı.

Forum qorıtındısı boyınşa mınaday qwjattarğa qol qoyıldı:

– «Qazaqstan-Resey» şekara mañı ıntımaqtastığı bağdarlamasınıñ twjırımdaması;

– Qazaqstan Respublikasınıñ Mädeniet jäne sport ministrligi men Resey Federaciyasınıñ Mädeniet ministrligi arasındağı 2020-2022 jıldarğa arnalğan ıntımaqtastıq bağdarlaması;

– Qazaqstan Respublikasınıñ Industriya jäne infraqwrılımdıq damu ministrligi men Resey Federaciyasınıñ Kölik ministrligi arasındağı Qazaqstan-Resey şekarasındağı ötkizu beketteriniñ jwmısı jönindegi birlesken is-qimıl bağdarlaması;

– Qazaqstan Respublikasınıñ Aqparat jäne qoğamdıq damu ministrligi men Resey Federaciyasınıñ Jastar isi jönindegi federaldıq agenttigi arasındağı Jastar sayasatı salasındağı özara tüsinistik turalı memorandum;

– Qostanay oblısınıñ äkimdigi men Çelyabi oblısınıñ ükimeti arasındağı sauda-ekonomikalıq, ğılımi-tehnikalıq, äleumettik, mädeni jäne gumanitarlıq ıntımaqtastıq turalı kelisim;

– Pavlodar oblısınıñ äkimdigi men Qorğan oblısınıñ ükimeti arasındağı sauda-ekonomikalıq, ğılımi-tehnikalıq, gumanitarlıq jäne özge de salalardağı ıntımaqtastıq turalı kelisim;

– Qazaqstan Respublikası Pavlodar oblısınıñ äkimdigi men Resey Federaciyası Novosibir oblısınıñ äkimşiligi arasındağı 2019-2021 jıldarğa arnalğan sauda-ekonomikalıq, äleumettik, ğılımi-tehnikalıq jäne mädeni ıntımaqtastıq turalı kelisimdi iske asıru jönindegi is-şaralar josparı;

– «Damu» käsipkerlikti damıtu qorı» akcionerlik qoğamı men «Reseydiñ şağın jäne orta käsipkerlikti qoldau banki» akcionerlik qoğamı arasındağı ıntımaqtastıq turalı kelisim.

Abai.kz

14 pikir