Düysenbi, 24 Aqpan 2020
Jañalıqtar 1296 7 pikir 22 Qañtar, 2020 sağat 15:02

"Qazaqmıs" keñsesindegi janjalğa qatıstı istiñ män-jayı belgili boldı

Jezqazğan qalasındağı "Qazaqmıs" keñsesinde janjal şığıp, bir adam öz-özine qol jwmsadı. Eki adam pışaq jaraqatımen auruhanağa tüskeni habarlandı. Aymaqtağı policiya departamentiniñ dereginşe, 21 qañtarda tau-ken bayıtu kombinatı direktorınıñ kabinetinde şıqqan janjal soñı qayğımen ayaqtalğan.

"Qazaqmıs korporaciyası" qauımdastığı käsipodağınıñ jetekşisi [Toğızbay] Tajbenov janjal kezinde [tau-ken bayıtu kombinatı direktorı Amangeldi] Minigulovtı jäne "Qazaqmıs korporaciyası" kompaniyasınıñ mamanı [Sabırjan] Tembaevqa pışaq salğan. Kuägelerdiñ sözinşe, keyin Tajbenov öz keudesine pışaq swğıp, sol jerde köz jwmğan. Minigulov pen Tembaev auruhanağa jatqızılğan. Qazir osı is boyınşa is qozğaldı" dep habarladı Qarağandı oblıstıq policiya departamentiniñ baspasöz qızmeti.

Policiyanıñ habarlauınşa, oqiğa 18.20 şamasında bolğan. Jelide tarağan videoda kompaniya keñsesin policiya qorşauğa alğanı, jedel järdem kölikteri twrğanı köringen. Azattıq tilşisine kuägerler "Qazaqmıs" keñsesi mañında oq atılğan dauıs estilgenin ayttı. Policiya oq atılğanın joqqa şığarğan joq ya rastamadı.

Janjalğa ne sebep bolğanı belgisiz.

"Qazaqmıs korporaciyası" qauımdastığı qwramına "Jezkazğancvetmet", "Balqaşcvetmet", "Qarağandıcvetmet" jäne birneşe bayıtu fabrikası kiredi.

Qauımdastıq mıs, altın, kümis jäne qorğanıs öndiredi. "Qazaqmısqa" Forbes tizimindegi qazaqstandıq Vladimir Kim ielik etedi. Amerikalıq jurnal onıñ baylığın 4,6 milliard dollar dep eseptegen.

Abai.kz

7 pikir