دۇيسەنبى, 24 اقپان 2020
جاڭالىقتار 1297 7 پىكىر 22 قاڭتار, 2020 ساعات 15:02

"قازاقمىس" كەڭسەسىندەگى جانجالعا قاتىستى ءىستىڭ ءمان-جايى بەلگىلى بولدى

جەزقازعان قالاسىنداعى "قازاقمىس" كەڭسەسىندە جانجال شىعىپ، ءبىر ادام ءوز-وزىنە قول جۇمسادى. ەكى ادام پىشاق جاراقاتىمەن اۋرۋحاناعا تۇسكەنى حابارلاندى. ايماقتاعى پوليتسيا دەپارتامەنتىنىڭ دەرەگىنشە، 21 قاڭتاردا تاۋ-كەن بايىتۋ كومبيناتى ديرەكتورىنىڭ كابينەتىندە شىققان جانجال سوڭى قايعىمەن اياقتالعان.

"قازاقمىس كورپوراتسياسى" قاۋىمداستىعى كاسىپوداعىنىڭ جەتەكشىسى [توعىزباي] تاجبەنوۆ جانجال كەزىندە [تاۋ-كەن بايىتۋ كومبيناتى ديرەكتورى امانگەلدى] مينيگۋلوۆتى جانە "قازاقمىس كورپوراتسياسى" كومپانياسىنىڭ مامانى [سابىرجان] تەمباەۆقا پىشاق سالعان. كۋاگەلەردىڭ سوزىنشە، كەيىن تاجبەنوۆ ءوز كەۋدەسىنە پىشاق سۇعىپ، سول جەردە كوز جۇمعان. مينيگۋلوۆ پەن تەمباەۆ اۋرۋحاناعا جاتقىزىلعان. قازىر وسى ءىس بويىنشا ءىس قوزعالدى" دەپ حابارلادى قاراعاندى وبلىستىق پوليتسيا دەپارتامەنتىنىڭ ءباسپاسوز قىزمەتى.

پوليتسيانىڭ حابارلاۋىنشا، وقيعا 18.20 شاماسىندا بولعان. جەلىدە تاراعان ۆيدەودا كومپانيا كەڭسەسىن پوليتسيا قورشاۋعا العانى، جەدەل جاردەم كولىكتەرى تۇرعانى كورىنگەن. ازاتتىق تىلشىسىنە كۋاگەرلەر "قازاقمىس" كەڭسەسى ماڭىندا وق اتىلعان داۋىس ەستىلگەنىن ايتتى. پوليتسيا وق اتىلعانىن جوققا شىعارعان جوق يا راستامادى.

جانجالعا نە سەبەپ بولعانى بەلگىسىز.

"قازاقمىس كورپوراتسياسى" قاۋىمداستىعى قۇرامىنا "جەزكازعانتسۆەتمەت", "بالقاشتسۆەتمەت", "قاراعاندىتسۆەتمەت" جانە بىرنەشە بايىتۋ فابريكاسى كىرەدى.

قاۋىمداستىق مىس، التىن، كۇمىس جانە قورعانىس وندىرەدى. "قازاقمىسقا" Forbes تىزىمىندەگى قازاقستاندىق ۆلاديمير كيم يەلىك ەتەدى. امەريكالىق جۋرنال ونىڭ بايلىعىن 4,6 ميلليارد دوللار دەپ ەسەپتەگەن.

Abai.kz

7 پىكىر