Särsenbi, 3 Mausım 2020
COVID-19 QAZAQSTANDA. Jwqtırğandar — 11796. Jazılğandar — 6240. Qaytıs bolğandar — 44
Saualnama 2057 28 pikir 22 Mamır, 2020 sağat 14:13

Wlttıq keñes qoğam aldında özin däleldey aldı ma?

Keşe Prezident keñesşisi Erlan Qarin 27-mamır küni QR Prezidentiniñ janındağı Wlttıq qoğamdıq senim keñesiniñ üşinşi otırısı ötetinin mälimdedi. 

Wlttıq keñestiñ alğaşqı otırısı ötken jıldıñ qırküyek ayında ötken bolatın. Onda keñes müşeleri qoğamda qordalanğan birqatar mäselelerdi ortağa salıp, naqtı wsınıstarın jetkizdi. Mäselen, sol otırısta sayasi jañğıru tobınıñ müşesi Aydos Sarım 5 zañğa özgeris engizudi, tipti qayta jazıp şığudı wsındı. Ol: mitingiler turalı zañ, sayasi pariyalar turalı zañ, BAQ turalı zañ, Saylau turalı jäne QR Parlament jäne onıñ depuattarı turalı zañ edi.

Al, ekinşi otırıs 2019 jıldıñ jeltoqsan ayında ötti. Keñestiñ 40-tan astam müşesi Täuelsizdik sarayında törağa Toqaevpen kezdesti. Onda negizinen birinşi otırısta aytılğan mäselelerdiñ nätijesi talqılandı.

Endi aldağı künderi senim keñesiniñ üşinşi otırısı ötpek. Onlayn formatta ötetin bwl jiında qanday mäseleler köteriledi? Biz bwl turalı keñes müşelerimen söylesip, birneşe saual qoyğan edik.

Sonımen:

1. Wlttıq qoğamdıq senim keñesiniñ üşinşi otırısında qanday mäseleler köterilui mümkin?

2. Keñes osı uaqıtqa deyin qoğam üşin ne istey aldı jäne onıñ müşesi retinde siz qanday röl atqardıñız?

3. Keñes konsul'tativtik qwrılım retinde qoğam aldında özin däleldey aldı ma?


Aygül Orınbek, zañger, WQSK-niñ müşesi:

Bilim jäne densaulıq mäseleleri talqılanadı

1. Bwl Wlttıq keñes müşelerimen aldın-ala kelisip jasalğan joba bolğannan keyin - ol jerde bilim salasına qatıstı mäselelerge köñil bölip otır. Jäne, densaulıq salasına baylanıstı mäseleler köteriledi degen oydamın. Biz bwl mäseleni aldın-ala özimizdiñ äleumettik top arqılı özara talqılap, özimizdiñ wsınıstarımızdı aytıp, bizdiñ atımızdan kimniñ söyleytinin tañdap, barlığın sol kisi aytıp şığuğa keliskenbiz.

Öñirdegi problemalar öte mañızdı

2. Biz üş top bolıp bölindik qoy: Äleumettik, ekonomikalıq jäne sayasat dep. Öziñiz körip otırğanday, bizde eñ birinşi mäsele – sayasat tobınıñ müşeleri söyledi. Al büginge deyin keñes ne istey aldı? Eñ birinşi bizde zañnamalarğa özgerister engizilip, jurnalisterdiñ qudalanuı boyınşa 130-bap äkimşilikke auıstırıldı. Bwl arqılı bir ülken özgeris jasadıq dep aytsaq boladı. Sebebi, bizde öziñiz bilesiz, köptegen jurnalister osı bap boyınşa qudalauğa wşırap jattı. Qılmıstıq is qozğalğandar da bar. Bwl bap qazir BAQ ökilderine de, basqa adamdarğa da qatıstı äjeptiuir jeñildetildi dep oylaymın.

Ekinşiden, miting. Beybit şeruler turalı zañdarğa özgerister engizildi.

Meniñ köterip otırğan mäselelerim - öñirdegi problemalar. Jergilikti atqaruşı bilikpen halıqtıñ arasındağı şeşilmey jatqan mäseleler. Halıqtıñ köptegen şağımın joğarğı jaqqa jetkizip, birneşe mäselelerdiñ şeşiluine wyıtqı boldıq. Onıñ bärin tizip ayta berseñ öte köp. Mäselen, mwğalimderdiñ bedeli, berilmey jatqan aylıqtar, dwrıs bölinbey jatqan ASP-lar, audan, auıldardağı tender boyınşa köptegen jürgiziletin kanalizaciya jwmıstarı, salınbağan joldar, jarıq jürgizilmegen jerler t.b. Onıñ bärin tizip ayta berseñ öte köp. Endi mwnıñ bäri auıl-aymaqtağı mayda jwmıs bolıp köringenimen, öte mañızdı. Sondıqtan, osınıñ bärin qazir joğarı jaqqa jazıp, jetkizu arqılı birtindepi orındalıp jatır. Bwl öñirler boyınşa. Men endi Türkistan oblısı öñirinde bolğannan keyin osındağı köp halıqtıñ şeşilmey jatqan öte özekti mäselelerin köterip jatırmız...

Bizdi şeneunik retinde sınaudıñ qajeti joq

3. Bwl jerde ärkimniñ oyı ärtürli. Meniñ oyımşa, är adam öz nätijesin isi arqılı däleldeydi ğoy. Bağasın halıq beru kerek. Endi men öz basım WQSK konsul'tativtik keñes retinde öziniñ därejesin körsetip, däleldep berdi dep oylaymın. Sebebi, qazir şağım aytuşı, prezidenttiñ senimdi ökilisiz ğoy, dep kelip jatqan halıq köp. Ärine, sıni pikirler boladı. Azamattıq qoğam bolğan jerde solay bolu kerek negizi. Bizde bireu taqqa otırsa, sol adamğa tek qana jağımpazdanıp, maqtau aytsa dep otıradı ğoy. Negizi sın bolğan dwrıs. Biraq, sınağan kezde de bizdi şeneunik retinde sınaudıñ qajeti joq. Biz ol jerde eşqanday aylıq almaymız, eşqanday da payda tappaymız, eşqanday jeke bas müddesi üşin barğan joqpız.

Mäselen, biz kez-kelgen auıl-aymaqtardı aralap, şağımdarın tıñdağan kezde özimizdiñ qarajatımızğa baramız, Astanağa da men özimniñ qarajatımmen barıp, halıqtıñ şağımın jetkizip jürmin. Bwl bir jeke basımnıñ müddesin paydalanu emes. Bwl jerde azamattıq qoğamnıñ damıp, memlekettiñ örkenietti el qatarına qosıluı üşin qosıp jatqan ülesimiz dep esepteymin. Al, onı keybireuler dwrıs tüsinbey jatır. Köp adam habarlasıp: «Sen neğıp otırsıñ, sağan Prezident östip berdi ğoy», deydi. Men: «Prezident mağan halıq senip otırğannan keyin osınday mümkindik berdi. Eger sizderdiki dwrıs bolsa, sizderdiñ janayqaylarıñızdı jetkizemin. Al, öziñizdiñ jeke basıñızdıñ müddesi üşin bolsa, onda keşirersiz, men bireudiñ qolşoqparı emespin. Tek qana qoğamdıq, halıqqa kerek is bolatın bolsa ğana men bwnı jetkizemin», dep aytamın. Biraq, köbisi öziniñ jeke bas mäselesine şeşuge kelgende osınday wlttıq keñes müşelerin paydalanğısı keletini ras.

Ashat Sadırbay, jurnalist, WQSK-niñ müşesi

Talqı - bilim salası turalı bolmaq...

1. Bwl keñestiñ otırısı ötken jolğı keñes otırıstarına qarağanda erekşe boladı. Öytkeni onlayn formatta ötedi. Ekinşiden, biz bwl jolı bilim taqırıbına, bilim salasına köbirek den qoyıp, osı mäseleniñ aynalasındağı problemalardı kötersek degen niettemiz. Aqpan ayında özimizdiñ jwmıs tobınıñ jinalısında bwl mäsele talqılanğan bolatın. Keñes müşeleriniñ köpşiligi sol kezdiñ özinde osı bilim mäselesin kötereyik, osığan köñil böleyik dep wsınıs aytılıp, sol jerde özara aqıldasqan bolatınbız. Sondıqtan taqırıp -  bilim mäselesi. Bügin wlttıq keñestiñ hatşısı Erlan Qarin mırza da ol jayında aytıp ötti ğoy.

Qazir ne körip otırmız?

2. Wlttıq keñes ne istey aldı degenge keletin bolsaq, wlttıq keñestiñ osığan deyin eki otırısı ötti. Eñ alğaşqı otırısında birneşe wsınıstar aytıldı. Söz söylegenderdi bilesizder. Birneşe mäselelerdiñ töñireginde ärtürli taqırıptar boyınşa, äleumettik, sayasi, ekonomikalıq bağıttağı mäseleler töñireginde birneşe mäseleler qozğaldı. Wsınıstar da berildi. Odan bölek wlttıq keñestiñ müşeleriniñ birazı Prezidentpen kezdesude boldı. Olar da öderiniñ wsınıstarın, problemaların aytıp ülgerdi. Ekinşi keñeste wlttıq keñestiñ birinşi otırısınan keyingi jwmıstardıñ nätijesine köp uaqıt bölindi.

Al, qazir ne körip otırmız? Sayasi reformalarğa keletin bolsaq, birneşe zañ jobaları qazirgi tañda wsınılıp, qaralıp, Prezidenttiñ qol qoyıluı ğana kütilip otır. Ol beybit jiındar turalı zañdar. Tağı da baptarğa baylanıstı mäsele. Odan keyin qwqıqtıq zañnamalıq kodekske baylanıstı, partiya turalı zañğa qatıstı. Bwl da sol wlttıq keñestiñ otırısında köterilgen edi. Osınday-osınday eldiñ sayasi mäselesine qatıstı, ekonomikalıq äleumettik mäselesine qatıstı köptegen mäseleler köterildi. Endi olar osılay birte-birte şeşimin tauıp kele jatqanına quanamın.

Odan keyin, men ne istey aldım degende kelsek, bwl jerde wlttıq keñestiñ müşeleri biz özimiz birneşe topqa bölingenbiz. Men osı äleumettik-mädeni toptamın. Bwl jerde de bizdiñ topta ülken ağalarımız, äpkelerimiz wlttıq keñestik birinşi otırısında söz alğan bolatın. Biraz mäsele aytıldı. Endi bizde qazirgi tañda tek qana wlttıq keñestiñ şeñberinde emes, jalpı eldegi özekti mäselelerdi köterip jatırmız. Keybireui jergilikti biliktiñ aralasuımen, nazar audaruımen şeşilip jatsa, keybireuleri äli künge nazardan tıs qaluda degen siyaqtı. Endi ärtürli. Biz birinşi otırısta da, ekinşi otırısta da özimizdiñ naqtı wsınıstarımızdı berdik. Ol mäseleler qaralıp jatır. Odan bölek, biz ministrlermen kezdestik. Ol kezde de özimizdiñ qoğamda mazalap jürgen birneşe swraqtardı ministrge qoyğan bolatınbız. Ol jayında men özimniñ äleumettik jelidegi paraqşamda jazdım. Biz qoğamda bolıp jatqan problemalardı zertteuge jäne onı köteru, jetkizu, sol problemanı şeşudiñ joldarın izdestiruge küş salıp jatırmız.

Äzirge bağa beru asığıstıq bolar...

3. Keñeske qazir bağa beru qiın. Bwl konsul'tativtik qwrılımnıñ qwrılğanına bir jıl da bolğan joq. Sondıqtan, meniñşe äzirge bağa beru asığıstıq bolar. Qazir jwmıstıñ nätijelerin jaylap-jaylap körip jatırmız ğoy. Äsirese, mınau birneşe baptarğa qatıstı... Sondıqtan, küzge qaray, mümkin osı jıldıñ soñına qaray biraz jañağı köterilgen mäseleler şeşimin tauıp, bolmasa naqtı bir qadamdar jasalğan kezde barıp tolıqqandı bağa beruge bolatın şığar. Biraq, osı atqarılğan jwmıstı da biz joqqa şığara almaymız. Onıñ da öziniñ ornı bar. Onıñ özi de atap ötetin närse.

Endi sıni közqaras qaşanda ärtürli boladı. Wlttıq keñestiñ ornına basqa organ bolsa da, basqa mäsele bolsa da ärtürli közqaras boladı. Öytkeni biz qwqıqtıq-zayırlı memlekette ömir sürip jatırmız. Bizde ärbir azamattıñ erkin pikir bildiruge qwqı bar. Sizdiñ de, meniñ de... Sondıqtan, bwl jerde sın aytıldı eken, bolmasa mınanday pikir aytıldı eken dep artımızğa qaraylap toqtap qalmay, qayta osı berilgen mümkindikti paydalanıp, el üşin mañızdı jüyelerdiñ özgeruine, osı mümkindik berilip twrğanda qol qusırıp otırğanşa, sonı paydalanıp birnärse isteuimiz kerek dep oylaymın. Sözden iske!

Rasul Jwmalı, sayasattanuşı, WQSK-niñ müşesi:

Köp närse atqaruşı orındar men Aqordağa kelip tireledi

1. Aldağı 27-mamırdağı kezdesu onlayn formatta ötedi. Äzirge belgili bolğan negizgi taqırıptardıñ biri - bilim beru salasındağı reformalar. Bwl keñes aqırındap jüyelenip kele jatqan qwrılım ğoy. Birinşi, ekinşi otırısında qanday mäseleler köterilgeni belgili. Meniñ oyımşa, osı bağıtpen jüretin siyaqtı. Bwğan deyin işki sayasat, ekonomika, ruhaniyat twrğısında birtalay mäseleler köterildi. Atap aytqanda, alğaşqı otırısta eñ negizgi basımdıqtar aytılıp ketti. 2019-dıñ jeltoqsan ayında ötken ekinşi otırısta osı aytılğan wsınıstar, pikirler jüyelenip, olardıñ birtalayı Prezidenttiñ sözinde, mälimdemesinde körinis taptı. Sonıñ nätijesinde naqtı tapsırmalar berildi. YAğni, birinşi otırıs pen ekinşi otırıstıñ arasında jwmıs toqtap qalğan joq. Nätijesinde, biqatar zañdarğa özgerister engizu kerektigi aytıldı. Onıñ birqatarı BAQ-ta, äleumettik jelilerde taraldı. Onı kördiñizder.

Mısalı, men kiretin sayasi topqa qatıstı aytar bolsam, bwl top saylau jayındağı zañ, sayasi partiyalar turalı zañ, miting ötkizu jayındağı zañ siyaqtı mäselelerdi köterdi. Ol boyınşa naqtı özgeristerdiñ engizilip jatqanın körip otırmız. Ärine, olarğa qatıstı sıni pikir de, köñil tolmauşılıq ta joq emes. Meniñşe, osı mäseleler kelesi otırıstıñ kün tärtibinde qaralatın siyaqtı. Degenmen, bir jeñildetuler engizildi. Biraq, orta deñgeyde, atqaruşılar deñgeyinde. Äli de birqatar şekteuler, kedergiler saqtaluda. Meniñ oyımşa, osı mäseleler köteriletin şığar.

Wlttıq keñestiñ jwmısınıñ özi keñes beru, konsul'tativti organ ğoy. Mwnı da eskeru kerek. Bwl otırısta barlıq mäseleni şeşip jiberedi, tez arada eñserip jiberedi degen de ağat pikir siyaqtı. Mwnda köp närse atqaruşı orındarğa, biliktiñ özine, Aqordağa kelip tireledi.

Wlttıq keñeske qatıstı meniñ öz oyım, közqarasım – joqtan bar jaqsı. Osınday wyımnıñ bolmağanınan bolğanı dwrıs. Öziniñ bar ekendigin, öziniñ qajet ekendigin öte qarqındı deñgeyde bolmasa da, uaqıt ötken sayın däleldep kele jatqan qwrılım. Ärine, qoğamdı da, jekelegen azamattardı da, azamattıq belsendilerdi de tüsinuge boladı. Osınday özgerister, jaña uäde etilgen reformalar, onıñ işinde sayasi reformalar neğwrlım tez ötse degendey pikirler aytıladı. Neğwrlım şapşpañ jürgizilse degen ümit-tilek te joq emes. Biraq, ökinişke qaray sayasatta reformalar populizmmen, asığıs-üsigis jasalğanı dwrıs emes. Qayta artıq qılam dep tırtıq qıladı. Meniñ meñzep otırğanım - sayasatta reformalar baysaldı türde, şeginen şığıp ketpey, onıñ işinde twraqtılıq pen qauipsizdikke nwqsan keltirmey, asıra silteuşilikke wrınbay jürgizilgeni dwrıs. Degenmen, qoğamdağı tezirek bolsa eken degen köñil tolmauşılıqtı tüsinuge boladı.

Biraq, ekinşi jağınan sayasattıñ öz zañdılıqtarı, öziniñ şındığı da osında. Meniñ negizgi aytıp otırğanım - qoğamdıq keñestiñ bolğanı dwrıs. Ärine, özimizdiñ işimizdegi keybir dünielerge köñil tolmauşılıq bar. Mısalı, nelikten partiya qwru üşin 40 mıñ dauıstıñ ornına 20 mıñğa deyin qısqardı. Odan äri qısqartuğa bolar edi degendey mäseleler. YA bolmasa mitingter men şerulerge qatıstı birtalay äkimşilik kedergilerdiñ köbine oydan şığarılğanı qalayşa payda boldı degen mäseleler. Biraq, qaytalap aytamın, joqtan bar jaqsı.

Qayta, osı alañnıñ bolğanı bilik pen qoğamnıñ arasında qosımşa örkenietti pikir almasudıñ bir mümkindigi bolıp otır. Meniñşe, onı  paydalanıp qalğan dwrıs. Sondıqtan orısşa aytqanda «ostorojnıy optimizm» deydi ğoy...

Tağı bir ayta keterligi - qoğamdıq keñeste tek qana onıñ qoğamnan şıqqan ökilderi ğana emes, biliktiñ özi, onıñ işinde törağası Prezident te öziniñ mälimdemesimen, öziniñ közqarastarımen bölisip twratını belgili. Sondıqtan bwl jerde Prezident Qasım-Jomart Toqaev ta meniñşe qosımşa bir mäselelerdi qozğaytın şığar.

Eldegi koronavirusqa, karantin şaralarına baylanıstı qazir keñestiñ jwmısı kişkene toqırap qaldı. Ol endi ob'ektivti, tüsinikti jağday. Biraq, qazir karantin älsin-älsin alınıp jatır ğoy. Sondıqtan Wlttıq keñestiñ jwmıstarına da kişkene jan bitedi.

Bir-eki kezdesude barlığın qamtu mümkin emes

2. Endi keñeske äu basta öziñiz bilesiz 40-tan astam qoğamnıñ türli salalarınıñ ökilderi endi. Äu basta biz kelisip alğan bolatınbız. Bwl qoğamdıq keñes öziniñ atına zatı layıq boluı kerek. Sondıqtan keñestiñ 40-tan astam müşesi öziniñ ğana kökeyinde jürgen mäselelermen şektelip qalmay, wjımdıq twğırda boluı kerektigi, sol arqılı eñ negizgi basımdıqtarda ortaq oy-pikirge kelu qajettigi kelisilgen. Sonıñ nätijesinde wlttıq keñes dabıra oylar, tek qana bir-birimen kelispeuşilik, disbuttardan köz aşpau siyaqtı düniege boy aldırmay, naqtı bir şeşimderge toqtalıp otır. Ärine, kökeyde jürgen mäseleler ärkimde jetkilikti. 40-tan astam müşe meniñşe ärqaysısı on emes, jüzdegen wsınıstardı engizuge müddesi bar edi. Biraq, dese de kez-kelgen qwrılımnıñ öziniñ bir reglamenti, şekteuleri boladı. Onıñ işinde wyımdastıruşılıq, uaqıttıq şekteuler. 24 sağat boyı keñesip otıru qayda? Sondıqtan bar mümkindikterdi eskere otırıp, sol 40 müşeniñ öz ortasında üş topqa bölindik. Sonıñ işinde öz basım sayasi topqa tüstim. Kün tärtibinde köptegen mäseleler bar. Biraq, barlığın bir uaqıtta nemese bir-eki kezdesude qamtıp ötu mümkin emes.

Bizdiñ ortaq wyğarımımız – osı jüye qwrauşı birneşe zañğa özgerister engizu. Sebebi, osı özgerister engiziletin bolsa, olar qalğan özekti mäselelerdi artınan süyrep äkelgendey äleuetke ie bolar edi. Sondıqtan  basqalardıñ aldında basımdıq berdik. Söz bolıp otırğanı bwl saylau, sayasi partiyalar, baspasöz, özin-özi basqaru jäne özin-özi jergilikti basqaru jäne miting, şeruler mäselesi. Olardıñ barlığı da keremettey eskerildi, keremettey iske asıp jatır dep tağı ayta almaymız. Onıñ sub'ektivti, ob'ektivti sebepteri bar. Biraq, eşnärse tındırılğan joq deuge jäne bolmaydı.

Bwl jwmıs ötken jıldıñ qırküyek ayınan osı uaqıtqa deyin jalğasın tauıp otır. Onıñ naqtı körinisin resmi qabıldanğan, jariya etilgen şarualardan bayqauğa boladı. Onıñ işinde endi şama-şarqımızşa, äsirese Astanadağı wlttıq keñes ökilderi parlamenttiñ jwmısına ne bolmasa ükimettik mekemelerdiñ keñesterine qatısıp twrdı. Tek qana sayasi mäseleler emes. Ekonomikalıq mäseleler, jer taqırıbına qatıstı, basqa da özekti taqırıptar. Sol jerde özimizdiñ oyımızdı bildirip, özimizdiñ müddemizdi jetkizdik. Sondıqtan bwl jerde men naqtı men mınanı bitirdim, mınanı bitirdim dep ayta almaymın. Wjımdıq jwmıs bolğannan keyin barlığı ortaq. Bir ayta keterligi, bwl jerde de äli bayağı bir inerciya küşin saqtap otır. Reformağa onşa barğısı kelmeytin. Äsirese atqaruşı, orta deñgeydegi. Dese de sonı tüsindiru, ömirdiñ özgergenin, qoğamnıñ talabınıñ özgergenin jetkize otırıp, jañağıday mämilege kelu twrğısınan meniñşe äjepteuir qozğalıs bar.

Kez-kelgen mümkindikti paydalanu kerek

3. Däleldedi, däleldegen joq dep meniñ bağa berip jatqanım kişkene orınsızdau bolar. Sebebi, özim osı qwrılımnıñ müşesi bolğannan keyin meniñ oyım kişkene sub'ektivti boladı. Sondıqtan, bağanı qoğam beru kerek. Ekinşiden, uaqıt ötkennen keyin jalpı halıqtıq közqaras qanday boladı? Naqtı nätije berdi me, bergen joq pa? Meniñşe kez-kelgen joba bolsın, bağdarlama bolsın, qwrılım bolsın onıñ jwmısı naqtı nätijesimen anıqtaluı kerek.

Ärine, äu basta qwrılımğa enesiz be degen wsınıs kelip tüskende, birqatarımız, onıñ işinde mende barmın, kümändanıp, kiru kerek pe, kirmeu kerek pe, mwnıñ paydası bola ma, sözden aspaytın jay otırıs bola ma, degen oylar boldı. Sebebi, bwğan deyin demokratiya mäseleleri boyınşa komissiya, jer mäseleleri boyınşa komissiya köbine sol sözden şığa almay, pikir-talastan asa almay toqırap qalğan. Dese de joqtan bar jaqsı. Osınday mümkindik tuğanda nege paydalanıp qalmasqa degen wstanım öz basıma äser etti. Äu basta ayta ketu kerek, bwl qwrılımğa birtalay azamattar kirmey qaldı. Bas tartqanı bar. Men senbeymin bwdan birnärse şığatınına dep. Bwl ärine özderiniñ qwqığı. Ol üşin olardı eşkim ayıptamaydı.

Biraq, qaytalap aytamın – osı keñesten ne şığadı, bolmay-aq qoysın, bäribir tük bitirmeydi degen pikirge men öz basım kelispeymin. Sayasat mwnıñ eñ negizgi anıqtauıştarınıñ biri. Sayasat degenniñ özi mümkindikter alañı. Bwl wzaq merzimdi küres. Key kezderi közge körinbeytin. Bwl pikirler sayısı. Jäne örkenietti jolmen jüremiz desek, bwl jerdegi kez-kelgen mümkindikti paydalanu kerek. Osı twrğıdan alğanda keñestiñ qwrılğanı onıñ qwrılmağanınan, bolmağanınan jaqsı.

Elestetip köreyik, keñes bolmasa?

Ärine, eşnärse qwrdımğa ketpes edi. Biraq, mısalı osıdan bir jıl-bir jarım jıl bwrın oylap kördik pe miting turalı zañğa özgerister enetinin. Baspasöz turalı zañ qayta qarastırıluı ıqtimal ekenin. Partiyalar jayındağı da solay. Osıdan 1-1,5 jıl bwrın mülde eşkim läm-mim auzın aşpağan. Sondıqtan bwl twrğıda men üşin jağımdı täjiribe. Keremettey bolmasa da, qatelikteri bolsa da...

Endi qatelespeytin adam joq. Tek qana eşnärse istemegen, eşnärse bitirmegen adam ğana qatelespeydi. Mwnı da moyındau kerek.

Al, Wlttıq keñes jayında, bwdan eşnärse şıqpaydı, bäri beker, bäri satılıp ketken, bäri WQK-niñ adamdarı dep otıra bersek, qoğamda wyqılı jağdayda boladı, bilik te toqırağan jağdayında qala beredi. Arasındağı mäseleler şeşilmeydi. Kürdelene beredi, uşığa beredi. Sondıqtan, osınday täuekelderdiñ arasında qoğamdıq kelisimniñ payda bolğanı, örkenietti pikir almasudıñ qosımşa bir alañınıñ jasaqtalğanı men üşin bwl jağımdı jañalıq.

Dayındağan Nwrbike Bekswltanqızı

Abai.kz

28 pikir