Senbi, 4 Şilde 2020
COVID-19 QAZAQSTANDA. Jwqtırğandar — 41065. Jazılğandar — 13614. Qaytıs bolğandar — 188
Bilgenge marjan 3670 1 pikir 27 Mausım, 2020 sağat 13:26

Koronavirustan üyde qalay emdeluge boladı?

Qazaqstannıñ key öñirlerinde auruhanalarğa adam sıymay, auruhanalar pacientterdi qabıldaudan bas tartıp jatqanı aqparatta aytıldı, jazıldı. Resmi statistika kovid nauqastarınıñ 80%-ğa juığı jeñil türde auırıp jatqandar deydi. Sondıqtan da därigerler keñes berip, qazir koronaviruspen auırğan adamdardıñ deni üyde emdelip jatır, bilesizder.

Koronavirus nauqastarınıñ jeñil türdegilerin jwqpalı aurular stacionarına jatqızu talap etilmeytini jäne üy jağdayında emdeluge bolatını da aqparatta aytıldı. Degenmen, nauqas jağdayınıñ odan äri naşarlauına jol bermeu üşin üy jağdayında emdelip jatqan adam ne isteu kerek? Koronavirustan üyde qalay emdeluge boladı?

QR DSM Qoğamdıq densaulıq saqtau wlttıq ortalığınıñ ökili Jazira Emberdieva aytqan keñesterdi nazarlarıñızğa wsınğandı jön kördik. Ret-retimen:

- Eger sizde koronavirus infekciyasınıñ alğaşqı belgileri bayqalsa, birden qorqınışqa boy aldırmañız. Üyde qalıp, basşıñızğa habarlañız, otbası müşelerinen oqşaulanıñız, twrğılıqtı mekenjayıñızdağı emhana nemese 1406 nömirine Call-ortalıqqa habarlasıñız. Sonımen qatar uçaskelik därigerge öziñizdegi  koronavirus infekciyasınıñ simptomdarı turalı aytıñız.

- Aurudıñ eñ jii bayqalatın belgileri: jalpı älsizdik, tamaqtıñ jıbırlauı, qwrğaq jötel, iisti, dämdi sezbeu, dene qızuınıñ 38-39 gradusqa deyin jäne odan da joğarı köterilui, deneniñ qaltırauı, bastıñ qattı auıruı, bwlşıq ettiñ auıruı. Keyde  auru as qorıtudıñ bwzıluımen – qwsıp, iştiñ ötuimen de jalğasadı. Keyde 4-8 künderde keude quısı auırıp, demikpege wlasadı. Tınıs alu qiındaydı. Mwnday kezde uçaskelik därigerdi şaqırıp, jedel järdem qızmetine habarlasqan jön.

- Virustıñ simptomdarı üyrenşikti suıq tiyuge nemese twmauğa qarağanda, aytarlıqtay wzaq (aurudıñ jeñil türde ötui kezinde 10-14 künnen bastap kürdeli jağday kezindegi birneşe aptağa deyin) boladı. JRVI, twmau kezinde auru 5-7 künge deyin ortaşa deñgeyde ötedi.

- Koronavirus infekciyasına küdigiñizdi rastau üşin uçaskelik därigerge qaralıñız. Däriger simptomdardı ayqındap, silemeyli qabıqşada virus bölşekterin PTR ädisimen anıqtau üşin mwrınnan jäne añqadan alınğan jağındını COVID-19-ğa tekseruge jiberedi.

- Oqşaulau ornın däriger belgileydi. Emhana därigeri klinikalıq kartinanıñ negizinde şeşim qabıldaydı — eger sizdiñ hal- jağdayıñız sub'ektivti türde naşarlay bastasa, auır dem alsañız, keude twsıñız auırsa, tösekten twra almasañız jäne älsirey bastasañız, onda sizdiñ auruhanada emdelgeniñiz dwrıs.

- Ambulatoriyalıq jağdayda koronavirus infekciyası tek qana qoldauşı terapiyanı talap etedi. Bwl virustıñ özine äser ete alatını däleldengen medikamentter äzirşe joq degendi bildiredi. Sondıqtan, COVID-19 kezinde eñ mañızdısı – organizmge aurumen özdigimen tötep beruge kömektesu. Swyıqtıqtardı – sudı, şäydi, morstı köp mölşerde işu, joğarı (38,5 ℃-tan joğarı) temperaturanı tüsiru, jeke bölmede oqşaulanu kerek.

Därigermen kelisken jağdayda mına därilerdi qabıldauğa boladı:

1. Paracetamol, aspirin, nimesulid tabl.- temperaturanı tüsiru üşin;

2. Ingavirin 90 mg künine 1 kapsula – 5 kün nemese

3. Tamiflyu 75 mg-nan künine 2 ret, 5 kün;

4. ACC 600mg-nan künine 2 ret, 5 kün;

5. Tamaqtı furacilin eritindisimen künine 4-5 ret şayu.

- Eger sizde qatar jüretin sozılmalı aurular bolsa, bazisti terapiyanı jalğastırıñız.

- Koronavirus infekciyasınıñ simptomdarı basqa JRVI kezindegidey emes, 2 ese sozıluı mümkin. Pacientter tağamnıñ iisin jäne dämin sezbegen kezde, quat alu üşin tamaq jeuge öziñdi köndiru qanşalıqtı qiın ekenin aytadı. Nätijesinde jağdayı naşarlağan kezde olar susızdanğan jäne älsiregen küyde auruhanağa tüsken. Sondıqtan üyde dwrıs tamaqtanu kerek, negizinen, botqa, qışqıl süt önimderi, balıq, jemis-jidek jäne kökönis siyaqtı jeñil qorıtılatın kaloriyalı tağam jeu qajet. Dene belsendiligin şekteu kerek, jaqsılap  wyqını qandırudıñ da mañızı zor.

- Eger siz auır dem alsañız, onda işiñizben jatqanıñız abzal. İş quısındağılardıñ diafragmanı qıspauı jäne ökpeniñ auamen, qanmen qanığuına kedergi keltirmeui üşin keude quısıñızğa jäne jambasıñızğa jastıqşa töseñiz. Bwl tınıs aludı jeñildetip, keude quısıñızdıñ auıruın azdap basadı.

- Eger siz üyde emdelseñiz, öziñiz tirkelgen mekenjaydağı aumaqtıq emhananıñ baqılauında bolasız. Sizben uçaskelik däriger nemese meyirger habarlasadı. Olar haliñizdi baqılaydı, temperaturañızdı tekseredi, jalpı köñil-küyiñizdi qadağalap, wsınımdar beredi.

- Eger demikpeden ädettegi üy jwmısın atqaru (mısalı, tamaq dayındau), söyleu qiındıq keltirse jäne qarapayım gigienalıq proceduralardı jasay almasañız, tez arada emdeuşi därigerge habarlasu kerek nemese medicinalıq jedel järdemdi şaqırıñız.

Swyıqtıq köp işip, uaqıtımen tamaqtanudı wmıtpañız. Künine eki ret dene qızuın, pul's, tınıs alu jiiligin, arterialdı qısımdı jäne zär bölu jiiligin tekseriñiz. Emhana därigerimen ünemi habarlasıp twrıñız. Hal-jağdayıñız naşarlağan kezde jäne demikpe simptomdarı artsa jäne tınıs alu qiındasa – stacionarğa jatu üşin jedel järdem şaqıru kerek.

Densaulığıñız mıqtı bolsın, küş-qayratıñız tausılmasın!

Abai.kz

1 pikir