Düysenbi, 21 Qırküyek 2020
COVID-19 QAZAQSTANDA. Jwqtırğandar — 107307. Jazılğandar — 101941. Qaytıs bolğandar — 1671
Bilik 1580 13 pikir 3 Şilde, 2020 sağat 10:29

Nwrswltan Nazarbaev Qazaqstan halqına ündeu jasadı

Qazaqstannıñ bwrınğı prezidenti, qazirgi Qauipsizdik keñesi men «Nwr Otan» partiyasınıñ törağası Nwrswltan Nazarbaev bügin Qazaqstan halqına ündeu joldadı. Elbasınıñ ündeui «Egemen Qazaqstan» gäzetinde jariyalanıptı. Biz atalğan ündeudiñ tolıq mätinin oqırman nazarına wsınıp otırmız...


Qımbattı otandastar! Qadirli dostar!

Özderiñiz biletindey, koronavirus infekciyasınıñ qaterli pandemiyası älemniñ köptegen elin, sonıñ işinde Qazaqstandı da şarpıdı. Milliondağan adam osı auır dertpen sırqattandı, ol meni de aynalıp ötken joq. Birqatar şet memleketter men ükimetter basşılarınıñ, kör­nekti sayasatkerler men qoğam qayratkerleriniñ şınayı janaşırlığın tanıtıp, mağan moral'dıq qoldau körsetkeni köñilimdi tebirentti. Barşası qaltqısız niettestigin jetkizip, sergektik tilep, tezirek sauığıp ketuime tilektestigin joldadı, sol üşin bärine zor rizaşılığımdı bildiremin.

Olardıñ qatarında Resey Prezidenti Vladimir Putin, Qıtay Halıq Respublikasınıñ Törağası Si Czin'pin, Qır­ğızstan Prezidenti Sooronbay Jeenbekov, Özbekstan Prezidenti Şavkat Mirzieev, Täjikstan Prezidenti Emomali Rahmon, Türik­menstan Prezidenti Gur­ban­gulı Berdımuhamedov, Tür­kiya Prezidenti Redjep Tayip Erdoğan, Amerika Qwrama Ştattarınıñ Memlekettik hatşısı Maykl Pompeo, Birikken Arab Ämirlik­teriniñ Prezidenti Halifa Zaid Äl Nahayan, Ündis­tannıñ Prem'er-ministri Naren­dra Modi, Japoniya Prem'er-minis­tri Sindzo Abe, Iordaniya Koroli İİ Abdalla ben äl-Huseyn, Äzerbayjan Prezidenti Il'ham Äliev, Armeniya Prezidenti Armen Sarkisyan, Ukraina Prezidenti Vladimir Zelenskiy, Koreya Respublikasınıñ Pre­zidenti Mun Çje In, Päkstan Prezidenti Arif Alvi, Izrail' Prezidenti Reuven Riv­lin, Serbiya Prezidenti Aleksandr Vuçiç, Horvatiya Prezidenti Zoran Milanoviç jäne t.b. bar. Bärin tügel atap şığu mümkin emes, biraq men olardıñ barlığınıñ joldağan hat-habarımen tanıstım. Qım­battı dostar, sizderdiñ şın köñilden şıqqan tilekteriñiz, ıstıq ıqılastarıñız mağan küş berip, ömirge qwlşınıs-quatımdı arttırdı. Barşañızğa basımdı iip, zor densaulıq pen tabıs tileymin!

Men elimizdiñ köptegen ön­diris wjımdarınan, eñbek ar­dagerlerinen, äskeri qızmet­şilerden, studentter men oqu­şı­lardan – öz qoldauı men tilek­testikterin jetkizip, mağan mıqtı densaulıq tilep, tolıq sauığıp ketuime niettestik bildirgen köp qazaqstandıqtardan hattar men jedelhattar, sonday-aq äleumettik jeli arqılı joldanğan hat-habarlar aldım.

Mağan şınayı janaşırlığı men qoldauın ğılımi qoğam­dastıq pen şığarmaşılıq ziyalı qauımnıñ ökilderi de bildirgenin rizaşılıqpen ayta ketkim keledi. Olardıñ arasında Serik Qirabaev pen Äliya Beysenova, Bibigül Tölegenova, Töregeldi Şarmanov, Mırzatay Joldasbekov, Swltan Orazalin, Ğarifolla Esim, Nesipbek Aytwlı, Jandarbek Mälibekov, Talğat Temenov jäne basqa da Qazaqstanğa keñinen tanımal qayratkerler boldı.

Meniñ atıma Ol'ga Rıpakova, Dmitriy Balandin, Il'ya Il'in, Äliya YUsupova, Zarina Dias siyaqtı belgili sportşılarımız izgi tilekterin bildirdi. Bar­şañızğa köp rahmet aytamın! Men bäriñizdi de bilemin. Sizder jäne basqa da jastar – täuelsizdik perzentterisizder. Densaulıq pen baqıt tileymin!

Därigerlerdiñ küş-jigeri jäne olardıñ talaptarın mültiksiz orındaudıñ, sonday-aq barşanıñ qoldauı men jılı sözderiniñ arqasında men sırqattan sauı­ğıp şıqtım, qazir özimdi jaqsı sezinemin, tolıqqandı jw­mıs­qa kiriskeli otırmın. Hal­qımmen birge bwl sırqattıñ bü­kil auırtpaşılığın sezindim, qazir emdelip jatqandardıñ bärine tözim men qajır-qayrat jäne tezirek sauığıp ketulerin tileymin.

Biz ötkerip jatqan kürdeli kezeñ – bükil adamzattıñ basına tüsken sın sağat. Sırqatpen kürestiñ eñ aldıñğı şebinde jürgen därigerler adamdardı aman alıp qalu üşin barlıq küşin jwmsauda. Bwl rette medicina qızmetkerleriniñ eñbegine bağa jetpeydi – mwnı qazirgi uaqıt ayqın körsetip otır. Bolaşaqta da otandıq densaulıq saqtau salasına basa köñil audarıp, onı damıtuğa qajetti qarjılıq jäne materialdıq resurstar bölu kerek. Osı oraylı sätte elimizdiñ medicina qızmetkerlerine erekşe rizaşılığımdı bildiremin.

Esteriñizde bolar, täuel­siz­diktiñ bastapqı jıldarı meniñ şeşimimmen arnau­lı Wlttıq qor qwrılıp, altın-valyuta rezervi jasaldı. Bwl bizge älemdik eki birdey dağdarıstı jeñip şığuğa septigin tigizdi jäne sol qarajat qazir Ükimetke pandemiyağa qarsı auqımdı jwmıs pen twrmısı tömenderge qoldau körsetu barısında kömegin tigizude. Eger aldağı uaqıtta onı aqılmen, ünemdep paydalana bilsek, özge sın-qaterlerdi de tiimdi eñsere alamız. Qazaqstannıñ basqa elder aldında qarızı eñ tömen memlekettiñ biri ekeni de bizdiñ artıqşılığımız.

Elimizdiñ Prezidenti men Ükimeti qalıptasqan jağdaydı tüzetu üşin qajetti barlıq şaranı qabıldauda. Biraq köp närse özimizge baylanıstı. Därigerler biz üşin qoldarınan kelgenniñ bärin jasap jatır. Alayda bwl aurudı jwqtırudan saqtanu köbinese är adamnıñ özine baylanıstı. Tözimdi bolu kerek, äsirese jastarğa. Qajetti gigiena talaptarın orındap, tezirek vakcina payda bolarına ümittene otırıp, auru jwqtırudan barınşa wzağıraq uaqıt sau boluğa tırısqan jön. Tärtip saqtap, öz densaulığımızdı, tuğan-tuıstar men jaqındardıñ amandığın oylauımız qajet, därigerlerge senu kerek.

Halqımız basqa tüsken qiın­dıqtı öziniñ qayrat-jigeri, wyımşıldığı, bolaşaqqa degen wmtılısı arqılı bükil halıqaralıq qoğamdastıqpen birge layıqtı türde eñserip, aman-esen şığarına senimdimin. Biz tağı da jeñimpaz bolamız. Elimizdiñ jaqsı künderi alda. Biz birgemiz! Biz jeñemiz! Bizdiñ wranımız osı.

Barlıq otandastarımızğa mıqtı densaulıq pen igilik, elimizge baq-bereke tileymin!

Nwrswltan Nazarbaev

Abai.kz

13 pikir