Särsenbi, 16 Qazan 2019
Osı ğoy endi... 3499 0 pikir 27 Tamız, 2014 sağat 12:04

«DOSTARDAN» BYUDJETTİÑ QARJISIN AYAP NE KÖRİNİPTİ...

Ötken bir maqalamızda bizdiñ oblıstıñ äkimi Qostanay qalası küni merekesinde arşığan jwmırtqaday äppaq ğimarat — neke sarayınıñ aşıluı saltanatına oray nekege twruğa kelgen jas jwbayğa «Gor'ko» dep ayqaylağanın jazğan edik (http://abai.kz/post/view?id=1449 ). Sirä, orısşa söylep, orısşa oylaytın äkimimiz qattı quanğannan qazaqtıñ saltın orıstıñ saltımen şatastırıp alsa kerek. Äkimniñ bwl «bastamasın» köpşilik dwrıs tüsinbepti. Oğan qoldau körsetudiñ ornına osı sayttağı şıqqan maqalamızdı «Nur.kz» sekildi sayttar köşirip basıp, talay oqırmandardıñ köñilin köterip tastadı.

   Al endi qazir sol kezde «mınaday keremet Saltanat sarayın saldım» dep äkimimizdiñ töbesi kökke eki eli jetpey qalğanday bolıp örekpegen köñili su sepkendey basılıp qaldı. Öytkeni bwl saraydıñ dauı oblısımızdan asıp, baytaq elimizge keñinen tarap ketti. Söytsek, «baqsaq baqa eken» degendey Elbası kelgende jarqırqıratıp körsetip, bir bedel jinap qalamın degen nietpen salınğan dünieniñ bılığı jeterlik körinedi. Osındağı «Tobıl» äleumettik-seriktestik korporaciyası anau-mınau emes, tura 375 million teñge jwmsap salğan sarayınıñ rahatın jeke menşik ieleri körip jatır. Neke sarayı iske qosılğannan keyin sonda nekege twruğa barğan jastar mwndağı tirkelu bağasın estigende talıp qala jazdağan körinedi. Söytse, älgi saraydıñ nekege twru saltanatın ötkizetin, erekşe äsemdelgen, qımbat materialdarmen kömkerilgen tügel ekinşi qabatın «Mereke Love» degen firma jalğa alıp, bwl şaranı ötkizu üşin 110 mıñ teñge talap etipti. Sonda qalay, özi kommunaldıq käsiporın bolıp tabılatındıqtan memlekettiñ qarjısına salğan ğimarattıñ paydasın nege jeke menşik körui tiis? Byudjetke tüsetin tiın-tebendi öz qwlqınınan asırıp otırğan jeke menşik firmanıñ bwl qareketi qanday zañğa siyadı? Bwl batpan qwyrıqtı olarğa kim sıylaptı? Osınşa zor kölemdegi qarjınıñ qaytarımı kimniñ moynında? Oblıstağı qwqıq qorğau organdarı qayda qara otır?

    Asılı, soñğı swrağımız tım artıqtau sekildi. Öytkeni älgi «Tobıl» korporaciyasınıñ äkesi de, kökesi de oblıs äkimi bolıp tabıladı. «Elbası keler qarsañında bir jaqsı sıylıq dayındayıq» dese ol korporaciya ne dey aladı? Jalğız qojayınına qarsı şığuğa qauqarı jete me? Ärine, jetpeydi. Öytkeni, «batırğa da jan kerek». Al byudjettiñ aqşasına qazir kimniñ janı aşıp jatır deysiñ. Qwqıq qorğau organdarı da aqımaq emes qoy. Imdı olar da tüsinedi. Jeldiñ qay jağınan soğıp twrğandığın biletin jandar üşin bwl jwmbaqtıñ jauabı qiınğa soqpaydı.

   Mwnı bir deñiz. Ekinşiden, dayın ğimaratqa kök tiın da salmastan ekinşi qabattı tügel jalğa alıp, bwl jerdi tegin tabıs közine aynaldırıp otırğan jandar da tegin adamdar emestigi belgili boldı. Ol firmanıñ iesi anau-mınau emes, oblıstağı ülken alpauıttardıñ biri, atınan at ürketin Viktor Solojenkov degenniñ Andrey degen wlı körinedi. Äkesi oblıstı aşsa alaqanında, jwmsa jwdırığında wstaytın ataqtı «Aray» firmasınıñ qojayını bolsa, kimnen ayılın jisın? Viktor degen käsipkerimiz osındağı atağı jer jaratın «Ivolga holding» firmasınıñ qojayını Vasiliy Rozinovten keyingi tükirigi jerge tüspeytin ekinşi mıqtı. Endi mwnday oblıstıñ twtqasın wstap twrğan azamattıñ aytqanın qalay eki etersiñ. Mwnday «dostardan» byudjettiñ qanday da qarjısın ayap ne körinipti. Jelge wşqan halıqtıñ qarajatınan älgindey käsipkerlerdiñ köñili qımbat.

Şirkin, mwnday «dostarı» köp äkimniñ ne armanı bar deysiñ....

P.S. Aytpaqşı, bizdiñ oblıs ortalığında keyingi kezderi qazaq tilin mazaq etetin «AynaLine», «Dala Holl», «Aydana Plase» sekildi qoyırtpaqtar tım köbeyip ketti. Soğan, mine, Elbasına arnalğan «sıylığımızdıñ» atın «Mereke Love» dep atap, mäz bolıp otırğan jayımız bar.

Mwratbek Däurenwlı

Qostanay

Abai.kz

0 pikir